1 ቦንቾ ተዎፍሎሳ፥ ኑ ግዶን ፖለትዳባስ ዳሮት፥ ባንታዉ ዳንዳኤትዳ መላ ፃፍዶሶና። 2 ሄ ታርክያ ኤንቲ ፃፍዳይ ኮይሮፐ ዶምድ አይፈ ማርካትነ ቃላ ሀጋዘይሳት ኑስ ኦድዳይሳ። 3 ታካ ታ ባጋራ ኮይሮፐ አኬካ ፄልዳፐ ጉየ፥ ሄ ታርክያ ሀኖታ ማራያዳ ነዉ ፃፎይ ሎኦ ግድድ በንትስ። 4 ሄስካ፥ ነ ታማርዳባይ ቱማ ግደይሳ ኤርሳናሳ።

5 ይሁዳ ካዋ ሄሮዲሳ ዎደ አብያ ያራፐ ግድዳ ዛካርያሳ ጌተትያ አይሁደ ካህነይ ደኤስ። እያ ማችያካ አሮና ሼሻፐ። እ ሱንይካ ኤልሳቤፆ።✝ 6 ናምአይካ ጎዳ ዎጋነ ኪታ ኡባ ናግድ ቦረይ ባይና ፆሳ ስንን ፅሎተን ደእዶሶና። 7 ሀኖፐ አትሽን፥ ኤልሳቤፃ ማይን ግድዳ ግሾ ኤንታዉ ናእ ባዋ፤ ናምአይካ ቃስ ጭምዶሶና።

8 እስ ጋላስ ዛካርያስ ባ ግሹዋ ማራን ፆሳ ስንን ካህነተን ሀጋዜስ። 9 ካህነተ ዎጋን ፆሳ ኬ ገልድ እፃነ ጩይሳናዉ እያ ሳም ጋክስ። 10 እፃነይ ጩያ ዎደ አሳይ ካረን ዎሴስ።

11 ጎዳ ኪታንቾይ ያርሾ ያርሽያ በሳፈ ኡሻቻ ባጋራ ኤቅድ በንትስ። 12 ዛካርያስ እያ በእዳ ዎደ ዳጋምድ ዳሮ ያይስ። 13 ሽን ኪታንቾይ እያኮ፥ "ዛካርያሳ ያዮፋ፤ ነ ዎሳይ ስኤትስ። ነ ማችያ ኤልሳቤፃ አደ ናአ የላና፥ እያ ዮሃንሳ ጋዳ ነ ሱንና። 14 እ ነዉ እንጀነ ኡፋይስ ግዳና፤ ዳሮት እያ የለተን ኡፋይታና። 15 ጎዳ ስንን እ ግታ ግዳና፤ ዎይነ ኡሽ ግድን ሀራ ማይያ ኡሻ ኡየና። ባ አየ ኡሎን ደእሸ ጌሻ አያናን ኩማና።✝ 16 እስራኤለ አሳታፐ ዳሮታ ባንታ ጎዳ፥ ፆሳኮ ዛራና። 17 አዋታ ዎዛና ናይታኮ ዛራና፥ ኪተቶናይሳታ ፅሎታ ጭንጫተኮ ዛራና መላ፥ ጎዳስ በሲያ ደረ ጊግሳናዉ ኤልያሳ አያናንነ ዎልቃን ጎዳ ስንን ባና" ያግስ።✝

18 ዛካርያስ ኪታንቹዋኮ፥ "ታ ሄሳ አይብን ኤራኔ? ታራነ ታ ማቸራ ጭምዳ" ያግስ።

19 ኪታንቾይ ዛሪድ፥ "ታኒ ፆሳ ስንን ኤቅያ ጋብሬለ። ሀ ምሽራቹዋ ነዉ ኦዳናዉ ፆሳፈ ኪተታስ።✝ 20 ሄኮ፥ ዎድያ ናግድ ፖለትያ ታ ቃላ ነ አማኖና እፅዳ ግሾ፥ ሀይስ ፖለታና ጋካናዉ ኔኒ ሙመ ግዳና፥ ኦደታናዉካ ዳንዳአካ" ያግስ።

21 ሄ ዎደ ዛካርያስ ፆሳ ኬ ገልድ ጋምእዳ ግሾ፥ አይብ ሀንደ ግድ አሳይ ካረን ናግሸ ጋምእስ። 22 እ ካረ ከይድ ኤንታና ኦድሳናዉ ዳንዳእቤና። ማል በሶፐ አትሽን፥ ኦደታናዉ ዳንዳኦናይሳ በእዳ ዎደ ቆንጨ በእዳይሳ ኤርዶሶና።

23 ዛካርያስ ባ ሀጋዙዋ ፖልድ ሶ ስምስ። 24 ሄሳፈ ጉየ፥ እያ ማችያ ኤልሳቤፃ ቃንታሱ። እቻሹ አጌና ኩመ ባና ገንዳ ጋምአሱ። 25 እያ፥ "ጎዳይ ባ ማሮታን ታ ቦርያ አሳ ግዶፈ ድጋናዉ በእድ ሀ ዎድያን ሀይሳ ኦስ" ያጋሱ።

26 ኤልሳቤፃ ቃንትን ኡሱፑን አጌናን፥ ፆሳይ ኪታንቹዋ ጋብሬለ ጋልላ ቢታን ደእያ ናዝረተ ካታማ ኪትስ። 27 ካዋ ዳዊታ ሼሻፐ ግድዳ ዮሰፋ ጌተትያ ኡራስ ኦይሸትዳ ጌላኤኮ ኪትስ። ሄ ጌላእያ ማይራሞ ጌተታዉሱ።✝ 28 ኪታንቾይ ኢኮ ብድ፥ "ዳሮ ዶሰትዳረ፥ ሳሮይ ነዉ ግዶ፥ ፆሳይ ኔራ ደኤስ፤ ኔኒ አንጀትዳሮ" ያግስ።

29 ማይራማ እያ ኦዳን ዳሮ ዳጋማዳ፥ "ሀይስ አይብ ሳሮ" ጋዳ ሄታሱ። 30 ኪታንቾይ ዛሪድ፥ "ማይራመ፥ ባቦፋ፤ ኔኒ ፆሳ ስንን ሳባ ደማዳሳ። 31 ሄኮ ኔኒ ቃንታና አደ ናአ የላና፥ እያ ሱን የሱሳ ጋዳ ሱንና።✝ 32 እ ግታ ግዳና፥ ኡባፈ ቦላ ፆሳ ናኣ ጌተትድ ፄገታና። ጎዳ ፆሳይ እያ አዋ ዳዊታ አራታ እያዉ እማና።✝ 33 እ ያይቆባ ሼሻ ቦላ መርናዉ ካዎታና፤ እያ ካዎተስ ዛው ባዋ" ያግስ።

34 ማይራማ ኪታንቹዋኮ፥ "ሄስ ዋንድ ሀናኔ? ታ አደ ኤርከ" ያጋሱ።

35 ኪታንቾይ ዛሪድ፥ "ጌሻ አያናይ ነ ቦላ ዎና፥ ኡባፈ ቦላ ፆሳ ዎልቃይ ነ ቦላ ኩያታና። ሄሳ ግሾ፥ የለትያ ጌሻ ናአይ ፆሳ ናኣ ጌተታና። 36 ሄኮ፥ ነ ዳብያ ኤልሳቤፃ ባ ጭማተ ላይን አደ ናአ ቃንታሱ። እያ ማይን ጌተትዳሮ፥ ሽን ሀእ ኡሱፑን አጌና ኦይካሱ። 37 ፆሳ ፆንያባይ ባዋ"✝ ያግስ።

38 ማይራማ፥ "ሄኮ፥ ታኒ ጎዳ አይልዉ፥ ነ ቃላዳ ታዉ ሀኖ" ያጋሱ። ሄሳፈ ጉየ፥ ኪታንቾይ ኢፐ ሻከትስ።

39 ማይራማ ሄ ሳምንታን ደንዳዳ ይሁዳ ቢታን ደእያ እስ ደረይ ዳርያ ካታማ ባሱ። 40 ዛካርያሳ ሶ ገላዳ ኤልሳቤፆ ሳሮሱ። 41 ኤልሳቤፃ ማይራም ሳሮዋ ስእዳ ዎደ እ ኡሉዋን ደእያ ናአይ ኡፋይሳን ጉፕስ። ኤልሳቤፃ ጌሻ አያናን ኩማዳ፥ 42 ባ ቃላ ቁ ኦዳ፥ "ኔኒ ማጫሳ ግዶፈ አንጀትዳሮ፥ ነ ቃንትዳ ናአይካ አንጀትዳይሳ። 43 ሀኖሽን፥ ታ ጎዳ አየ፥ ኔኒ ታኮ ያና መላ ታኒ ኦኔ? 44 ሄኮ ነ ሳሮዋ ታ ስእዳ ዎደ ታ ኡሉዋን ደእያ ናአይ ኡፋይሳን ጉፕስ። 45 ጎዳይ ፖላና ግድ እምዳ ቃላ አማንዳራ፥ እያ አንጀትዳሮ" ያጋሱ።

46 ማይራማ ሀይሳዳ ያጋሱ፦

"ታ ሸምፕያ ጎዳ ቦንቻዉሱ፥✝

47 ታ አያናይ ልያ ፆሳን ኡፋይቴስ።

48 እ ባ አይለ ካዉሻተ በእስ።

ሀችፈ ዶምድ የለተ ኡባይ ታና አንጀትዳሮ ጋና።✝

49 አይስ ጊኮ፥ ዎልቃማ ግድዳ እ፥ ታዉ ግታባ ኦስ።

እያ ሱንይ ጌሻ።

50 እያ ቦንቸይሳታ ቦላ፥

እያ ማሮተይ መርናፐ መርና ጋካናሳ።

51 ባ ቀስያን ምኖባ ኦስ፥

ባንታ ዎዛናን ኦቶርተይሳታ ላልስ።

52 ዎልቃማ ካዎታ አራታፐ ካዉሽስ፤

ባንታና ካዉሽዳይሳታ ካቦይስ።✝

53 ኮሻትዳይሳታ ሎኦባን ካልስስ፥

ሽን ዱረታ መላ ኩሸ የድስ።

54 ባ ማሮታ ቆፕድ፥

ባ አይልያ እስራኤለ ማድስ።

55 ሄስካ ኑ አዋታስ ኦድዳ ቃላ፥

አብራሃመስነ እያ ሼሻስ ግዳይሳ መርናዉ ፖላናሳ"✝

ያጋሱ።

56 ማይራማ ኤልሳቤፅ ማታን ሄ አጌና መላ ጋምአዳ ባ ሶ ስማሱ።

57 ኤልሳቤፅስ የሎ ቃማይ ጋክን አደ ናአ የላሱ። 58 እ ሾሮትነ እ ዳቦት ጎዳይ ግታ ማሮታ ኦዳይሳ ስእድ፥ ኢራ እስፈ ኡፋይትዶሶና። 59 ሆስፑን ጋላሳን ዮጋ ናኣ ቃፃራናዉ ይዶሶና። እያ አዋ ሱንን ዛካርያሳ ግድ ሱንናዉ ኮይዶሶና።✝ 60 ሽን አይያ፥ "አካይ፥ ዮሃንሳ ጌተታናዉ በሴስ" ያጋሱ። 61 ኤንትካ፥ "ነ ዳቦታፐ ሀ ሱንን ፄገትዳይ ኦንካ ባዋ" ያግዶሶና። 62 እያ አዋይ ኦና ግድ ሱንነኮ ኤራናዉ ኮይድ እያ ማላ ኦይችዶሶና። 63 እ ፃፍያባ ኦይች ኤክድ፥ "እያ ሱንይ ዮሃንሳ" ግድ ፃፍስ። ኡባይ እ ፃፍዳይሳ በእድ ማላለትዶሶና። 64 ኢራ ዛካርያሳ እንፃርሳይ ብለትስ፥ ፆሳ ጋላትሸ ኦደተ ኦይክስ። 65 ሾሮት ኡባይ ያሻን ኩምዶሶና። ሀ ሀንዳባይ ደረይ ዳርያ ይሁዳ ቢታን ኦደትስ። 66 ሄሳ ስእዳ ኡባይ፥ "ሀ ናአይ አይ ሀናንደሻ" ግድ ባንታ ግዶን ኦደትዶሶና። ጎዳ ኩሸይ እያራ ደኤስ።

67 ዮሃንሳ አዋይ ዛካርያስ ጌሻ አያናን ኩምድ ሀይሳዳ ያግድ ትንብተ ኦድስ።

68 "እስራኤለ ጎዳይ ጋላተቶ፥

ይድ ባ አሳ ዎዝስ።

69 ባ አይልያ ዳዊታ ኬን

አቶተ ካጭያ ደንስ።

70 ሄስካ በን ዎደ ጌሻ ናበታ ዶናን ኦደትዳይሳ መላ፥

71 እያ አሾይ ኑ ሞርከታፐነ

ኑራ ኤቀትያ ኡባ ኩሽያፐ።

72 ሄሳ እ ኦዳይ ኑ አዋታስ ባ ማሮታ በሳናስነ፥

ባ ጌሻ ጫቁዋ ናጋናሳ።

73 ኑ አዋ አብራሃመስ ጫቅዳ

ጫቁዋ ቆፓናስነ

74 ኑ ሞርከታ ኩሸፐ ከስድ

ያሽ ባይና እያ ሀጋዛና መላሳ።

75 ኑ ላይ ኡባን ጌሻተንነ ፅሎተን

ባ ስንን ኑና ኤሳናሳ።

76 ቃስ ላ ናአዉ፥ ኔኒ ኡባፈ ቦላ ፆሳ ናበ ጌተታና።✝

ጎዳ ኦግያ ሎይናዉ ነ እያ ስንን ባና።

77 ኤንታ ናጋራይ ቁሸትን፥

ኤንቲ አቶተ ደማናይሳ ነ ጎዳ ደርያስ ኦዳና።

78 ኑ ፆሳ ሎኦ ማሮተፈ ደንዶይሳን

ዎንታ ፃልቀይ ኑስ ሳሉዋፐ ከይስ።

79 ሄስካ ማንነ፥

ሀይቆ ኩያ ጋርሳን ደኤይሳታስ ፖእሳናሳ፥

ኑ ቶሁዋካ ሳሮ ኦግያኮ ዛራናሳ"

ያግስ።✝

80 ናአይ ድጭስ፥ አያናን ምንስ፥ እስራኤለ አሳስ ቆንጫና ጋካናዉ መላ ቢታን ደእስ።