10 የሱሲ ሳምባታ ጋላስ አይሁደ ዎሳ ኬን ታማርሴስ። 11 ሄ በሳን ታማነ ሆስፑን ላይ ቱና አያን ዞኮ ኩንስዳ እስ ማጫስያ ደአዉሱ። እያ ኩናፐ ደንዶይሳን ሱረ ኤቃናዉ ዳንዳኡኩ። 12 የሱሲ እዮ በእዳ ዎደ ፄግድ፥ "ሀ ማጫሰተ፥ ነ ሀርግያፈ ፓፃዳሳ" ያግስ። 13 ባ ኩሽያ እ ቦላ ዎን፥ እያ ኤለሳዳ፥ ሱራዳ ኤቃሱ። ፆሰ ጋላታሱ።

14 ሽን አይሁደ ዎሳ ኬ ሀላቃይ ይሎትድ አሳኮ፥ "ኦሶ ኦያ ኡሱፑን ጋላሳት ደኦሶና። ሄሳ ግሾ፥ ሄ ጋላሳታን ይድ ፓፅተፐ አትሽን፥ ሳምባታ ጋላስ ግደና" ያግስ።✝

15 ጎዳይ፥ "ጩቦቶ፥ ህንተ ግዶፈ ቦር ዎይኮ ሀረ ሳምባታ ጋላስ ዛዳሎፐ ብልድ ሃ ኡሻናዉ ኤፎናይ ኦኔ? 16 ያትን፥ ሀ ማጫስያ አብራሃመ ናአ ግዳሸ ፃላሄን ቃሸታዳ ታማነ ሆስፑን ላይ ኩመ ደእዳርስ ሳምባታ ጋላስ ብርሸተ ኮሸኔ?" ያግድ ኦይችስ።

17 እ ሄሳ ኦድዳ ዎደ ኤቀተይሳት ኡባይ ዬላትዶሶና። ሽን አሳ ኡባይ እ ኦዳ ማላልስያ ኦሶ ኡባን ኡፋይትዶሶና።