1 የሱሲ ባ ታማረታኮ፥ "እስ ዱረ ኡራስ እያፐ ጋርሳራ እስ ሹም ደኤስ። ሄ ሹማይ ባ ጎዳ ሻሉዋ ቶቼስ ግያ ዎረይ ኬ አዋ ጋክስ። 2 ኬ አዋይ ሹማ ፄግስድ፥ ‘ታኒ ዎይግያባ ስአድና? ህዛፐ ኔኒ ታ ኬስ ሹማ ግዳዳ ኦናዉ ዳንዳኦና ግሾ፥ ታ ሻሉዋ ታዉ ሼ’ ያግስ።

3 "ሄ ሹማይ ባ ዎዛናን ሀይሳዳ ያግድ ቆፕስ፦ ‘ታ ጎዳይ ታና ሹማተፈ ዎና ሀኔስ፥ ጎያ አቃናዉ ዎልቅ ባዋ፥ ዎሳ ማናዉ ዬላዬስ፤ ያትን ታ ዋኖ? 4 ሹማተፈ ታ ዎያ ዎደ አሳይ ታና ሞካና መላ ኦናባ ታ ኤራይስ’ ያግስ።

5 "ሄሳ ግሾ፥ እያ ጎዳ አጮይ ደእያ አሳ እሱዋ እሱዋ ፄግ ኤህድ ኮይሮ ኡራኮ፥ ‘ነ ቦላ ታ ጎዳ አጮይ አይ መል ደኢ?’ ያግድ ኦይችስ።

6 "እ፥ ‘ላታሙ ባርሜለ ዛይተ አጮይ ደኤስ’ ያግስ።

"ሹማይ፥ ‘ዉለ ዋርቃትያ ሄኤ፥ ኤለሳዳ፥ ታሙ ባርሜለ ዛይተ አጮይ ደኤስ ጋዳ ፃፋ’ ያግስ።

7 "ሄሳፈ ካልድ ናምአንዋኮ፥ ‘ነዉ አፑን ደኢ?’ ያግስ።

"እ፥ ‘ሄ ፄታነ ላፑን ታሙ ኩንታለ ግስተ አጮይ ደኤስ’ ያግስ።

"ሹማይ፥ ‘ነ ዉለ ዋርቃትያ ሄኤ፥ ኤለሳዳ፥ 296 ኩንታለ ያጋዳ ፃፋ’ ያግስ። 8 ኬ አዋይ አማነትቦና ሹማ እያ ጭንጫተስ ናሽስ። ሀ አላምያ ናይት አሰ ኦይን ፖኦ ናይታፐ አዳ ዎዛናማታ።

9 "ሄሳ ግሾ፥ ታ ህንተዉ ኦዳይስ፤ ሀ አላምያ ሚሸይ ዉርያ ዎደ መርና ኬን ሞከታና መላ ሀ ሚሽያራ ህንተዉ ላገታ ሻምተ። 10 ኡባፈ ጉባን አማነትዳይ ዳሮባን አማነትዳይሳ ግዴስ። ቃስ ኡባፈ ጉባን አማነቶናይስ ዳሮባን አማነተና። 11 ህዛ፥ ሀ አላመ ሚሸን ህንተ አማነቶና እፅኮ፥ ቱማ ሚሸ ህንተዉ ኦን ሀዳራ እማኔ? 12 ህንተ ሀራ አሳ ሚሸን አማነቶና እፅኮ፥ ህንተ ቡዞ ሚሸ ህንተዉ ኦን እማኔ?

13 "እስ አይለይ ናምኡ ጎዳታስ ሃረታናዉ ዳንዳኤና። እሱዋ እፅኮ ሀንኩዋ ዶሴስ ዎይኮ እሱዋኮ ሺቅኮ ሀንኩዋ ካስ። ሄሳዳካ፥ ህንተ ፆሳስነ ሚሸስ ሃረታናዉ ዳንዳኤከታ።"✝

14 ሚሸ ዶስያ ፋርሳወት ሄሳ ስእዳ ዎደ የሱሳ ቀልቅስዶሶና። 15 እ፥ "ህንተ፥ ህንተና አሳ ስንን ፅልሴታ፥ ሽን ፆሳይ ህንተ ዎዛና ኤሬስ። አሳ ስንን ቦንቸትዳይስ ፆሳ ስንን ቦረትዳይሳ።

16 "ሙሰ ህገይነ ናበታ ኪታይ ዮሃንሳ ጋካናዉ ህንተዉ ኦደትሸ ጋምእስ። ሄሳፈ ጉየ፥ ፆሳ ካዎተ ዎንገላይ ሳባከትሸ ጋምእስ። አስ ኡባይ ያ ገላናዉ ዳፈቴስ።✝ 17 ግዶሽን፥ ህግያፈ እስ ላፋ ፕዳለይ አታናፐ ሳሎይነ ሳእ አይስ ካዉዬስ።✝

18 "ባ ማችዉ የድድ ሀራ ኤክያ ኡባይ ላሜስ። ባ አዝናፐ አንጀትዳሮ ኤከይስካ ላሜስ" ያግስ።✝

19 "አልኦነ አሌቆ አፍላ ማእያ፥ ሳእ እንጀትን ጋላስ ጋላስ ኡፋይሳን ደእያ እስ ዱረ አስ ደኤስ። 20 ሀር ቃስ አሳተይ ኩመ ማዱንፅዳ እስ አላዛራ ጌተትያ ማንቆይ ሄ ዱረ ኡራ ካረን የገትድ አትዳይስ ደኤስ። 21 ኮሻፐ ደንዶይሳን ዱረ ኡራ ጋይታፐ ዎያ ቲፍያ ማናዉ አሞትሸ ደኤስ። ሀር አቶሽን፥ ካናት ይድ እያ ማዱን ላጮሶና።

22 "ሄ ማንቆይ ሀይቅስ፤ ኪታንቾት እያ አብራሃመ ክኦ ኤፍዶሶና። ቃስ ዱረ ኡራይካ ሀይቅድ ሞገትስ። 23 ስኦለን ኡንኤትድ ደእሸ ቁ ግድ ሃሆን አብራሃመነ እያ ክኦን ደእያ አላዛራ በእስ። 24 እ፥ ‘አዋዉ አብራሃመ፥ ታዉ ቃታርክ፤ ሀ ታማ ላጮን ኡንኤታዳ ደእያ ግሾ አላዛር ባ ብራያ ሃን የድድ ታ እንፃርሳ ላኮና መላ ሀያና እያ የዳርክ’ ያግድ ዋስስ።

25 "ሽን አብራሃመይ እያኮ፥ ‘ታ ናአዉ፥ ነ ሳአን ደእያ ዎደ ሎኦባታ ኤክዳይሳ፥ ቃስ አላዛር ኢታባታ ኤክዳይሳ አኬካ። ሽን ሀእ እ ሀይሳን ኡፋይቴስ፥ ቃስ ኔኒ ዋየታሸ ደኣሳ’ ያግስ። 26 ሀ ኡባፈ አድ፥ ‘ሃፐ ህንተኮ፥ ህንፐ ሃ ኑኮ አናዉ ኮየይሳት ፕኖና መላ ኑስነ ህንተዉ ግዶን ግታ አፎይ ደኤስ’ ያግስ።

27 "ዱረ ኡራይ፥ ‘አዋዉ፥ ያኮ አላዛራ ታ አዋ ሶ ኪታና መላ ታ ነና ዎሳይስ። 28 ታዉ እቻሹ እሻት ደእዶሶና፥ ኤንትካ ሀ ዋየ በሳ ዮና መላ ኤንታዉ ብድ ማርካቶ’ ያግስ።

29 "ሽን አብራሃመይ፥ ‘ኤንታዉ ሙሰራነ ናበታራ ደኦሶና፤ ኤንቲ ኦድያባ ስኦና’ ያግስ።

30 "ዱረ ኡራይ፥ ‘አዋዉ አብራሃመ፥ ሄሳ ግደና፤ እስ አስ ሀይቆፐ ደንድድ ቢኮ ኤንቲ ማሮታን ገላና’ ያግስ።

31 "አብራሃመይ፥ ‘ሙሰነ ናበታ ስኦና እፅኮ፥ ሀር አቶሽን ሀይቆፐ እስ አስ ደንድ ኦድኮካ አማኖኮና’ ያግስ።"