1 የሱሲ ጌሻ አያናን ኩምድ ዮርዳኖሰ ሻፋፐ ስምዳ መላ አያናይ እያ መላ ብታ ኤፍስ። 2 ያን ኦይታሙ ጋላስነ ቃማ ፃላሄን ፓጨትስ። ሄ ጋላሳታን አይኮካ ሞና ጋምእዳ ግሾ ዉርሰን ኮሻትስ።

3 ፃላሄይ እያኮ፥ "ኔኒ ፆሳ ናአ ግድኮ አነ ሀይስ ሹቻይ ኡይ ግዶ ጋዳ ኪታ" ያግስ።

4 የሱሲ ዛሪድ፥ "አስ ኡይ ፃላላን ዴና ጌተትድ ፃፈትስ" ያግስ።✝

5 ሄሳፈ ጉየ፥ ፃላሄይ የሱሳ አዱሳ ደረ ቦላ ከስድ ሀ አላምያ ካዎተታ አይፈ ቅጵ ዛራናዉ በስስ። 6 ፃላሄይ፥ "ሀ ኡባስ ማታይነ ቦንቾይ ታዉ እመትስ። ታኒ ዶስዳ ኦደስካ እምያ ግሾ ነዉ እማና። 7 ሄሳ ግሾ፥ ኔኒ ታዉ ጎይንኮ ኡባይ ነዉ ግዳና" ያግስ።

8 የሱሲ ዛሪድ፥ "ነ ጎዳ፥ ነ ፆሳ፥ እያ ፃላላ ጎይና ጌተትድ ፃፈትስ" ያግስ።✝

9 ዉርሰን ፃላሄይ የሱሳ የሩሳላመ ኤፍድ ፆሳ ኬስ ሁጵያ ቦላ ኤስድ፥ "ኔኒ ፆሳ ናአ ግድኮ አነ ዱገ ሳአን ነና የጋ። 10 አይስ ጊኮ፥

" ‘ነና ናግያ ኪታንቾታ

ፆሳይ ነ ግሾ ኪታና።✝

11 ኤንቲ ነ ቶሆይ ሹቻን በቶና መላ፥

ባንታ ኩሽያን ቁ ኦድ ነና ደንና’ ጌተትድ ፃፈትስ"

ያግስ።

12 የሱሲ ዛሪድ፥ "ነ ጎዳ ፆሳ ፓጮፋ ጌተትድ ፃፈትስ" ያግስ።✝

13 ፃላሄይ የሱሳ ፓጭያ ዉርስዳፐ ጉየ ሀራ እንጀ ዎደ ደማና ጋካናዉ እያፐ ሻከትስ።

14 የሱሲ አያና ዎልቃን ኩምድ ጋልላ ስምስ። እያ ሱንይ ሄራን ደእያ ቢታ ኡባን ከይስ። 15 እ አይሁደ ዎሳ ኬ ገልድ ታማርስስ፤ አሳ ኡባይ እያ ጋላትዶሶና።

16 ያፐ እ ድጭዳ ካታማ ናዝረተ ይስ። ካሰ ሜዘትዳይሳዳ ሳምባታ ጋላስ አይሁደ ዎሳ ኬ ገልስ። ናባባናዉካ ደንድ ኤቅስ። 17 ናብያ እሳያሳ ማፃፋይ እያዉ እመትን፥ ዶይድ፥ ሀይሳዳ ያግድ ፃፈትዳይሳ ደምስ፦

18 "ጎዳ አያናይ ታ ቦላ ደኤስ፥

ማንቆታስ ዎንገላ ኦዳና መላ

ፆሳይ ታና ዶርስ።

ቃሸትዳይሳታስ ብለተ፥

ቆቅዳይሳታ ፄልሳናስነ

ኡንኤትዳይሳታ ብርሻና መላ፥✝

19 ፆሳይ ኬሀናዉ ቆፕዳ ላይ ኦዳና መላ ታና ኪትስ"

ያግስ።

20 ሄሳፈ ጉየ፥ ማፃፋ ፃፅድ ሀጋዘይሳስ እምድ ታማርሳናዉ ኡትስ። አይሁደ ዎሳ ኬን ደእያ አሳት ኡባይ ጫድ ፄሎሶና። 21 እ፥ "ሀይስ ህንተ ሀይን ህንተ ስእያ ሀ ማፃፋ ቃላይ ሀች ፖለትስ" ያግስ።

22 ኡባይ እያባ ዳርስድ ኦደቶሶና። ቃስ እያ ዶናፐ ከይያ አ ኬሀተን ኩምዳ ቃላን ማላለትሸ፥ "ሀይስ ዮሰፋ ናኣ ግደነዬ?" ያግዶሶና።

23 እ፥ " ‘ነኖ ለ አዋዉ ነና አሻ፥ ቅፍርናሆማን ነ ኦዳባ ኑ ስኦይሳ ቃስ ሀይሳን ነ ካታማን ኦ’ ግያ ሌምሱዋን ህንተ ታና ጋናይሳስ ስይ ባዋ" ያግስ። 24 ቃስ፥ "ቱማ ኦዳይስ፤ ናበይ ባ የለትዳ ቢታን ቦንቸተና።✝

25 "ታ ህንተዉ ቱማ ኦዳይስ፤ ሳሎይ ሄ ላይነ ባጋ ጎርደትን ምኖ ኮሽ ቢታ ኡባን ደእያ ኤልያሳ ዎደ ዳሮ አምኤት እስራኤለን ደኦሶና።✝ 26 ኤልያስ ኤንታፈ እስነኮካ ኪተትቤና። ሽን ሳራፕታን ደእያ አምኤኮ ኪተትስ።✝ 27 ናብያ ኤልሳ ዎደ እስራኤለን ዳሮ ባሮ ሀርጋንቾት ደኦሶና። ሽን ሶረ ኡራ ንእማነፐ አትሽን፥ ኦንካ ፓፅቤና" ያግስ።✝

28 አይሁደ ዎሳ ኬን ደእያ አሳ ኡባይ ሄሳ ስእዳ ዎደ ዳሮ ይሎትዶሶና። 29 ባንታ ኡትዳ በሳፈ ደንድድ ደረ ቦላ ኬፀትዳ ካታማፐ ጋፃ ከስድ ሱግ የዳናዉ አፎ ዶና ኤፍዶሶና። 30 ሽን እ ኤንታ ግዶራ ካንድ አስ።

31 ያፐ ጋልላ ቢታን ደእያ ቅፍርናሆማ ካታማ ብስ። ያን ሳምባታ ጋላስ አሳ ታማርስስ። 32 እ ታማርሰይ ማታራ ግድያ ግሾ ኡባይ እያ ትምርትያን ማላለትዶሶና።✝

33 አይሁደ ዎሳ ኬን ቱና አያናይ ኦይክዳ ኡራይ ደኤስ። 34 እ፥ "ናዝረተ የሱሳ ኑና አይስ ዋይሳይ ኑፐ ሃካ፤ ኔኒ ይዳይ ኑና ይሳናሰዬ? ኔኒ ኦነኮ ታኒ ኤራይስ። ኔኒ ፆሳፈ ይዳ ጌሻ" ያግድ ዋስስ።

35 የሱሲ ቱና አያናኮ፥ "ስእ ጋዳ ሀ ኡራፐ ከያ" ያግድ ሀንቅስ። ቱና አያናይ ኡራ አሳ ኡባ ስንን ሆል የግድ አይኮካ ቆሆና የድድ ከይስ።

36 አሳ ኡባይ ማላለትዶሶና። ዎልኮ፥ "ሀኖስ፥ ሀይስ አይብ ትምርቴ? ቱና አያናታ ማታንነ ዎልቃን ኪቴስ፤ ኤንትካ ከዮሶና" ያግዶሶና። 37 እያ ሱንይ ሄራ ኡባን ከይስ።

38 ሄሳፈ ጉየ፥ የሱሲ አይሁደ ዎሳ ኬፈ ከይድ ስሞና ሶ ገልስ። ስሞና ማቸ አይያ ምኖ ቆፆ ምሻ ሀርገን ሳከታሱ። እዮ ፓና መላ የሱሳ ዎስዶሶና። 39 እ ሂፃኮ ሺቅ ሆክድ እ ሀርግያ ሀንቅስ። ምሻይ አግን ኤለሳ ደንዳዳ ኤንታ ሞካሱ።

40 አዋይ ዉላና ሀንሽን ዱማ ዱማ ሀርግያን ኦይከትዳ አሳ እያኮ ኤህዶሶና። እ እሱዋ እሱዋ ቦላ ባ ኩሽያ ዎድ ፓስ። 41 ቱና አያናት ቃስ፥ "ኔኒ፥ ፆሳ ናኣ" ግድ ዋስሸ ዳሮ አሳፐ ከይዶሶና። ሽን እ ኤንታና ሀንቅስ። እ ክርስቶሳ ግደይሳ ኤንቲ ኤርያ ግሾ፥ እስባካ ኦደቶና መላ ድግስ።

42 ቡሮ ዎንትያ ዎደ የሱሲ እስ ጌማ በሲ ብስ። አሳይ ኮይሸ እ ደእያ በሳ ይዶሶና። ኤንታፈ እ ሻከትድ ቦና መላ ድጋናዉ ኮይዶሶና። 43 ሽን እ፥ "ታኒ ሀራ ካታማታ ባዳ ፆሳ ካዎተ ዎንገላ ማርካታናዉ በሴስ። ታ ኪተትዳይ ሄሳሳ" ያግስ። 44 ይሁዳ ቢታን ደእያ አይሁደ ዎሳ ኬን ሳባክስ።