1 እስ ሳምባታ ጋላስ የሱሲ ግስተ ጋደ ግዶራ አስ። የሱሳ ታማረት ትያ ባንጋ ዱድ ባንታ ኩሸን ሽርክድ ሞሶና።✝ 2 ሽን ፋርሳወታ ግዶፈ እሶት እሶት፥ "ሳምባታ ጋላስ ኦናዉ በሶናባ አይስ ኦቲ?" ያግዶሶና።

3 የሱሲ ኤንታኮ ዛሪድ፥ "ዳዊቲ ኮሻትዳ ዎደ ባራ ደኤይሳታራ እስፈ ኦይሳ ናባብበከቲ?✝ 4 ፆሳ ኬ ገልድ አይሁደ ካህነታ ፃላላስ በሲያ ዳቡዋ ምስ፤ ባራ ደኤይሳታስካ እሚስ" ያግስ።✝ 5 ቃስ የሱሲ፥ "አሳ ናአይ ሳምባታ ጎዳ" ያግስ።

6 ሀራ ሳምባታ ጋላስ የሱሲ አይሁደ ዎሳ ኬ ገልድ ታማርሴስ። ሄ በሳን ኡሻቻ ኩሸይ ስልዳ እስ አስ ደኤስ። 7 ህገ አስታማረትነ ፋርሳወት እያ ሞታናዉ ጋሶ ኮይድ ሳምባታ ጋላስ ፓኮ በአና ግድ ናጎሶና። 8 ሽን የሱሲ ኤንታ ቆፋ ኤርድ ኩሸይ ስልዳ ኡራኮ፥ "ደንዳዳ አሳ ግዶን ኤቃ" ያግስ። ኡራይካ ደንድ ኤቅስ።

9 የሱሲ፥ "አነ ታ ህንተና እስባ ኦይቻይስ፤ ሳምባታ ጋላስ ኦናዉ በሰይ ሎኦባየየ ኢታባዬ? ሸምፖ አሾየ ዎይኮ ይሶ?" ያግስ።

10 ቃስ የሱሲ እያ ዩሹዋን ደእያ አሳ ዩሽ ፄልድ ኡራኮ፥ "ነ ኩሽያ ፕድ ኦ" ያግስ። ኡራይካ እ ግዳይሳዳ ኦን ኩሸይ ፓፅስ። 11 ሽን ህገ አስታማረትነ ፋርሳወት ዳሮ ይሎትዶሶና። የሱሳ ቦላ አይ ኦኖ ግድ ባንታ ግዶን ማቀትዶሶና።

12 ሄ ዎደ ጋላሳታፐ እሱዋን የሱሲ ዎሳናዉ ዙማ ቦላ ከይስ። ቃማ ኩመ ዎስሸ አቅስ። 13 ዎንተ ባ ታማረታ ፄግድ ኤንታ ግዶፈ ታማነ ናምአታ ዶርድ፥ ኤንታና፥ "ሀዋረታ" ግድ ሱንስ። 14 ኤንትካ፥ ጰፅሮሳ ግድ ሱንዳ ስሞና፥ እያ እሻ እንድርያሳ፥ ያይቆባ፥ ዮሃንሳ፥ ፍልጶሳ፥ ባርተለሞሳ፥ 15 ማቶሳ፥ ቶማሳ፥ እልፍዮሳ ናኣ ያይቆባ፥ ባ ቢታስ ምሸትያ ስሞና፥ 16 ያይቆባ ናኣ ይሁዳነ የሱሳ አድ እምዳ አስቆሮታ ይሁዳ።

17 የሱሲ ኤንታራ እስፈ ዙማፐ ዎድ ደምባ በሳን ኤቅስ። እያ ታማረታፐ ዳሮት ሄ በሳን ደኦሶና። ይሁዳ ቢታ ኡባፈ የሩሳላመፐ፥ ፅሮሳፐነ ስዶና አባ ጋፃፐ ይዳ ዳሮ አሳይ ደኤስ። 18 ኤንቲ ይዳይ፥ እ ታማርስያባ ስአናዉነ ባንታ ሀርግያፈ ፓፃናሳ። ቱና አያናን ዋየትያ አሳትካ ፓፅዶሶና። 19 ዎልቅ እያፐ ከይድ አሳ ኡባ ፓያ ግሾ አሳይ እያ ቦቻናዉ ኮዮሶና።

20 ባ ታማረታ ፄልድ ሀይሳዳ ያግስ፦

"ህንተኖ፥ ማንቆቶ፥ ህንተ አንጀትዳይሳታ፤

ፆሳ ካዎተይ ህንተሳ።

21 ህንተ ሀእ ኮሻተይሳት አንጀትዳይሳታ፥

ህንተ ካላና።

ህንተ ሀእ ዬከይሳት አንጀትዳይሳታ

ህንተ ሚጫና።

22 አሳይ ህንተና አሳ ናኣ ግሾ፥

እፅያ ዎደ፥

ህንተና ህልያ ዎደ፥

ህንተና ኤንቲ ቶችያ ዎደነ፥

ኢታ ሱን ኤንቲ ህንተዉ እምያ ዎደ

ህንተ አንጀትዳይሳታ።✝

23 "ሄኮ፥ ህንተ ዎይቶይ ሳሎን ግታ ግድያ ግሾ ሄ ዎደ ኡፋይሳን ጉፕተ። አይስ ጊኮ፥ በን ኤንታ አዋት ናበታ ቦላ ሄሳዳ ኦዶሶና።"✝

24 "ሽን ዱረቶ ህንተና አየ!

ህንተ ሀእ ሎኦ ዱሳ ኤክደታ።

25 ሀእ ካልዳይሳቶ ህንተና አየ!

ህንተ ኮሻታና።

ሀእ ሚጨይሳቶ ህንተኖሾ

ህንተ ካዮታናነ ዬካና።

26 አስ ኡባይ ህንተ ሎኦተ ፃላላ ኦድያ ዎደ ህንተና አየ!

ኤንታ አዋት በን ዎርዳንቾ ናበታ ቦላ ሄሳዳ ኦዶሶና።

27 "ሽን ታና ስእያ ህንተዉ ታ ኦዳይስ፤ ህንተ ሞርከታ ዶስተ፤ ህንተና እፀይሳታስ ሎኦባ ኦተ። 28 ህንተና ባደይሳታ አንጅተ፥ ህንተና ናቀይሳታስ ዎስተ። 29 እስ ባጋ ሻካላ ባቀይሳስ ሀንኮ ባጋ በሳ። ነ ላፃና ኤካና ገይሳስ ነ ሻምዝያ ጉጃዳ እማ። 30 ነና ዎስያ ኡባስ እማ፤ ኔፐ ኤክዳ ኦናካ ዛሮ ጋዳ ኦይቾፋ። 31 አሳይ ህንተዉ ኦና መላ ህንተ ኮያባ ኡባ ህንተካ አሳስ ኦተ።✝

32 "ህንተ፥ ህንተና ዶስያ አሳታ ፃላላ ዶስኮ፥ አይ ጋላት ህንተዉ ደኢ? ሀር አቶሽን፥ ናጋራንቾትካ ባንታና ዶሰይሳታ ዶሶሶና። 33 ህንተዉ ሎኦባ ኦይሳታ ፃላላስ ሎኦባ ኦኮ ህንተዉ አይ ጋላት ደኢ? ናጋራንቾትካ ሄሳዳ ኦሶና። 34 ታልኤ ዛራና አሳ ፃላላስ ህንተ ታልእኮ አይ ዱማ ጋላተተቲ? ናጋራንቾትካ ጉየ ዛራና አስ በእድ ታልኦሶና።"

35 "ሽን ህንተ ሞርከታ ዶስተ፤ ኤንታዉ ሎኦባ ኦተ። ጉየ ኤካናዉ ቆፖና ታልእተ። ሄሳን ህንተ ኤካና ዎይቶይ ግታ ግዳና። ህንተ ኡባፈ ቦላ ፆሳ ናይታ ግዳና። እ ባና ጋላቶናይሳታስነ ኢታታስ ኬሀ። 36 ህንተ አዋይ ኬሀ ግዶይሳዳ ህንተካ ኬሀ ግድተ።

37 "አሳ ቦላ ፕርዶፍተ፤ ህንተ ቦላ ፕርደተና። ህንተ ቦረቶና መላ ኦናካ ቦሮፕተ። አቶ ጊተ፤ ፆሳይ ህንተዉ አቶ ጋና። 38 እምተ፤ ህንተዉ እመታና። ህንተ ማክዳባን ህንተዉ ዛር ማከታና፥ ኡባራካ ሎኦ ማክያባን ባቅድ፥ ሱድ ኩንድ፥ ላለታና ጋካናዉ ህንተዉ ማከት እመታና" ያግስ።

39 ቃስካ የሱሲ ያግድ ኤንታዉ ሌምሶ ኦድስ፤ "ቆቀይ ቆቀ ካለናዉ ዳንዳኢ? ካለኮ ናምአይካ ዎል ኤክድ አፎን ዉሎኮናዬ?✝ 40 ታማረይ አስታማረፐ አና። ሽን ሎይ ታማርዳ ኡራይ ባ አስታማርያ ሀኔስ።✝

41 "ነ እሻ አይፈን ደእያ ቡርያ አይስ በአይ? ነ አይፈን ደእያ ቱሱ ዳነይሳ አይስ በእኪ? 42 ነ አይፈን ደእያ ቱሱ ዳነይሳ በኦና ነ እሻኮ፥ ‘ታ እሻዉ፥ ነ አይፈን ደእያ ቡርያ ከሶ’ ጋናዉ ዋና ዳንዳኤይ? ነኖ ጩቡዋዉ፥ ኮይሮታዳ ነ አይፈን ደእያ ቱሱ ዳነይሳ ከሳ። ሄሳፈ ጉየ፥ ነ እሻ አይፈን ደእያ ቡርያ ከሳናዉ ጌሻዳ ፄላና።

43 "ሎኦ ም ኢታ አይፈ አይፈና፤ ሄሳዳካ ኢታ ም ሎኦ አይፈ አይፈና። 44 አይፈ አይፍያ ም ኡባይ ባ አይፈን ኤረቴስ። አጉንፈ ባላሰ አይፈይ ማፀተና ቃስ ላደፐ ዎይነ አይፈይ ማፀተና።✝ 45 ሎኦ አስ ባ ዎዛናን ኩምዳ ሎኦባፐ ሎኦባ ከሴስ። ኢታ አስ ባ ዎዛናን ኩምዳ ኢታባፐ ኢታባ ከሴስ። አስ ባ ዎዛናን ኩምድ ፓላህዳባፐ ባ ዶናን ኦደቴስ።✝

46 "ታ ገይሳ ኦከታ፥ ሽን ያትን አይስ ታና፥ ‘ጎዳዉ፥ ጎዳዉ፥ ጌቲ?’ 47 ታኮ የይነ ታ ቃላ ስእድ ፖልያ ኡባይ ኦና ዳንያኮ ታ ህንተና በሳና። 48 እ ኬ ኬፃናዉ ዝቅ ኦ፥ ኦላ ቦክድ፥ ጋርሳን ደእያ ዛላ ቦላ ኬ ኤስዳ ጭንጫ ኡራ ዳኔስ። ድኦይ ድእድ ሄ ኬ ሱግስ፥ ሽን ምንድ ኬፅዳ ግሾ፥ ቃፃናዉ ዳንዳእቤና። 49 ሽን ታ ቃላ ስእድ ኦናይ ባ ኬ ሻፈ ቦላ ኬፅዳ ኡራ ዳኔስ። ድኦይ ድእድ ሄ ኬ ሱግዳ ዎደ ኤለስድ ኩንድስ። ሄ ኬይ ዎልቃማ ኩንደ ኩንድስ" ያግስ።