1 የሱሲ ታማነ ናምኡ ታማረታ ባኮ ፄግድ፥ ቱና አያናታ ከሳና መላነ ሀርገ ኡባ ፓና መላ ኤንታዉ ማታ እሚስ።

2 የሱሲ ኪትዳ ታማነ ናምኡ ሀዋረታ ሱንይ፦ ኮይሮይ ጰፅሮሳ ጌተትያ ስሞናነ እያ እሻ እንድርያሳ፥ ዛብድዮሳ ናኣ ያይቆባነ እያ እሻ ዮሃንሳ፥ 3 ፍልጶሳነ ባርተለሞሳ፥ ቶማሳነ ቃራፃ ቃንፅስያ ማቶሳ፥ እልፍዮሳ ናኣ ያይቆባ፥ ታድዮሳ፥ 4 ባ ቢታስ ምሸትያ ስሞናነ የሱሳ አድ እምዳ አስቆሮታ ይሁዳ።

5 ሄ ታማነ ናምአታ የሱሲ ኪትድ የድሸ፥ "አይሁደ ግዶና ደርያኮ ቦፕተ፥ ቃስ ሳማረታ ካታማካ ገሎፕተ። 6 ሽን እስራኤለ ኬፈ ግድዳ ህን ይዳ ዶርሳታኮ ቢተ። 7 ያ ብድ፥ ‘ሳሎ ካዎተይ ማታትስ’ ግድ ኦድተ።✝10:7 ሉቃ 10:4-12. 8 ሀርጋንቾታ ፓተ፥ ሀይቅዳይሳታ ሀይቆፐ ደንተ፥ ባሮ ሀርጋንቾታ ጌሽ ፓተ፥ ቱና አያናታ ከስተ። ህንተ ጮ ኤክዳይሳ ጮ እምተ። 9 ህንተ ኪሰን ዎርቃ፥ ዎይኮ ብራ ሳንትመ ኦይኮፍተ። 10 ህንተ ኦግያስ ካርፂቶ፥ ናምኡ አፍላ፥ ዎይኮ ጫማ ዎይኮ ፃምአ ኦይኮፍተ፤ ኦሳንቹዋስ ጋላሳ ካ ኮሼስ።✝10:10 2 ቆሮ 9:14፤ 1 ፅሞ 5:18.

11 "ህንተ እስ ካታማ ዎይኮ ጉታ ገልያ ዎደ ህንተና ሞክድ ኤካናዉ ኡፋይትያ ኡራ ኮይድ እያ ሶን ሸምፕተ፤ ህንተ ባና ጋካናዉ ያን ጋምእተ። 12 ቃስ ኦደ ሶካ ገልሸ ሳሮተ። 13 ሄ ኬይ ህንተና ሞክኮ ህንተ ሳሮዳ ሳሮይ ኤንታና ጋኮ፥ ሽን ኤንቲ ሞኮና እፅኮ ህንተ ሳሮዳ ሳሮይ ህንተዉ ጉየ ስሞ። 14 ኦንካ ህንተና ሞኮናነ ህንተ ኦድያባ ስኦና እፅኮ ሄ ኬፈ ዎይኮ ሄ ካታማፐ ከይሸ ህንተ ቶሁዋን ደእያ ባና ፕትድ ከይተ።✝10:14 ሀዋ 13:51. 15 ታ ህንተዉ ቱማ ኦዳይስ፤ ፆሳ ፕርዳ ጋላሳን ሄ ካታማፐ ሶዶመስነ ጋሞራ ካታማታስ ፕርዳይ ካዉያና።✝10:15 ማቶ 11:24፤ መ 19:24.

16 "ታ ህንተና ዶርሳታዳ ሱመታ ግዶ የዳና። ሄሳ ግሾ፥ ሾሻዳ ጭንጫታ፥ ሆለዳ አዳታ ግድተ።✝10:16 ሉቃ 10:3. 17 አሳይ ህንተና ፕርዳ ዳይናታስ አድ እማና፥ ቃስ አይሁደ ዎሳ ኬን ህንተና ጋራፋና። ሄሳ ግሾ፥ ኤንታፈ ናገትተ።✝10:17 ማር 13:9-11፤ ሉቃ 12:11-12፤ 21:12-15. 18 ታ ግሾ ግድ ህንተና ደርያ ሃረይሳታ ስንነ ካዎታ ስን ኤፋና። ኤንታ ስንንነ አይሁደ ግዶና ደርያ ስንን ኤቅድ ህንተ ታባ ማርካታና። 19 ሽን ህንተና ፕርዳስ አድ እምያ ዎደ፥ ዎይግድ ዛርኖ ግድ ኡንኤቶፍተ፤ ሄ ሳትያን ህንተ ጋናባ ፆሳይ ህንተዉ እማና። 20 አይስ ጊኮ፥ ህንተናን ኦደተይ ህንተ አዋ ጌሻ አያናፐ አትሽን፥ ህንተና ግደከታ።

21 "እሻይ ባ እሻ፥ አዋይ ባ ናአ፥ ሀይቆስ አድ እማና፥ ናይት ባንታና የልዳይሳታ ቦላ ደንድድ ኤንታ ዎሳና።✝10:21 ማር 13:12፤ ሉቃ 21:16. 22 ታ ግሾ ግድ አሳ ኡባይ ህንተና እፃና፥ ሽን ዉርሰ ጋካናዉ ምንዳይ አታና።✝10:22 ማቶ 24:9፤ ማር 13:13፤ ሉቃ 21:17፤ ማቶ 24:13፤ ማር 13:13. 23 እስ ሄራፐ ህንተና ኤንቲ ጎድኮ ሀራ ካታማ ባቃትተ። ታኒ ህንተዉ ቱማ ኦዳይስ፤ አሳ ናአይ ያና ጋካናዉ፥ ህንተ እስራኤለ ካታማ ኡባ ካንከታ።

24 "ታማረይ ባ አስታማርያፐ፥ አይለይ ባ ጎዳፐ አና።✝10:24 ሉቃ 6:40፤ ዮሀ 13:16፤ 15:20. 25 ታማረይ ባ አስታማርያ፥ አይለይ ባ ጎዳ ዳንኮ እያዉ ግዳና። ኬ ጎዳ ብኤል-ዘቡላ ጊኮ እያ ሶ አሳ ዋትድ ኢስድ ፄገኔ?✝10:25 ማቶ 9:34፤ 12:24፤ ማር 3:22፤ ሉቃ 11:15.

26 "ህዛ፥ አሳስ ያዮፍተ። ካመትዳባይ ቆንጮና፥ ቆሰትዳባይ ጌሽ ከዮና አተና።✝10:26 ማር 4:22፤ ሉቃ 8:17. 27 ታኒ ህንተዉ ማን ኦድያባ ህንተ ፖኦን ኦድተ፤ ታ ህንተዉ ሀይን ካልካሽዳባ ዳባባን አዋጅተ። 28 አሾፐ አትሽን፥ ሸምፖ ዎናዉ ዳንዳኦናይሳታስ ያዮፍተ። ሽን ሸምፑዋነ አሹዋ ጋናመን ይሳናዉ ዳንዳእያ ፆሳስ ያይተ። 29 ናምኡ ቡበት እስ ሳንትመን ባይዘቶኮናዬ? ሀኖፐ አትሽን፥ ኤንታፈ እስናካ ህንተ ፆሳይ ጎና ደእሽን ሳአን ዎኩ። 30 ሀር አቶሽን፥ ህንተ ሁጰ ብናናይካ ፓይደትድ ደኤስ። 31 ህዛ፥ ዳሮ ቡበታፐ ህንተ አያ ግሾ ያዮፍተ።

32 "አሳ ስንን ታዉ ማርካትያ ኡባስ ታንካ ሳሎን ደእያ ታ አዋ ስንን ማርካታና። 33 ሽን አሳ ስንን ታና ካደይሳ ታንካ ሳሎን ደእያ ታ አዋ ስንን ካዳና።✝10:33 2 ፅሞ 2:12.

34 "ታኒ ሳአን ሳሮ ኤሀናዉ ይዳ ህንተዉ ዳኖፖ። ታኒ ቶራፐ አትሽን፥ ሳሮተ ኤሀናዉ ያቢከ። 35 ታኒ ይዳይ፥

" ‘ናኣ አዋፐ

ማጫ ናእዉ አየፐ

ናኣ ማችዉ አዝና አየፐ ሻካናሳ።✝10:35 ምክ 7:6.

36 አሳስ ሞርከት እያ ሶ አሳታ ግዳና።’

37 "ታፐ አድ ባ አዋ ዎይኮ ባ አይዉ ዶሰይ፥ ታባ ግዳናዉ በሰና። ባ አደ ናአ ዎይኮ ባ ማጫ ናእዉ ታፐ አድ ዶሰይ፥ ታባ ግዳናዉ በሰና። 38 ባ ማስቃልያ ቶክድ ታና ካሎና ኦንካ ታባ ግዳናዉ በሰና።✝10:38 ማቶ 16:24፤ ማር 8:34፤ ሉቃ 9:23. 39 ባ ሸምፑዋ አሻናዉ ኮየይ ይሳና፥ ሽን ባ ሸምፑዋ ታ ግሾ አድ እመይ አሻና።✝10:39 ማቶ 16:25፤ ማር 8:35፤ ሉቃ 9:24፤ 17:33፤ ዮሀ 12:25.

40 "ህንተና ሞከይ ታና ሞኬስ፥ ታና ሞከይ ቃስ ታና ኪትዳይሳ ሞኬስ።✝10:40 ሉቃ 10:16፤ ዮሀ 13:20፤ ማር 9:37፤ ሉቃ 9:48. 41 ናብያ ናበ ሱንን ሞከይ፥ ናብያ ዎይተታና፤ ቃስ ፅሉዋ ፅሎ ሱንን ሞከይ፥ ፅሉዋ ዎይተታና። 42 ታ ህንተዉ ቱማ ኦዳይስ፤ ሀ ታ ታማረታፐ ጉፅያ እሱዋስ ታና ካልያ ግሾ ሀር አቶሽን ጉ እርፃ ሃ እምኮ እያ ዎይቶይ የና" ያግስ።