1 ጭንጫ ማጫስ ባ ኬ ኬፃዉሱ፤
ሽን ኤያ ማጫስያ ባ ኬ ባ ኩሸን ላላዉሱ።
2 ሱረ ሄመትያ አስ ጎዳ ያዬስ፤
ሽን ባ ኦገ ጌላይያ አስ ጎዳ ካስ።
3 ኤያ ኦድ እያ ዞኩዋስ ፃምአ ኤሄስ፤
ሽን ጭንጫታ እንፃርሳይ ኤንታ ናጌስ።
4 ቦር ባይና እፅኮ ሻለይ ካይስ ግዴስ፤
ሽን ጎሻ ቦር ደእኮ፥ ነ ሻለይ ካን ኩሜስ።
5 አማነትያ ማርክ ኡባ ዎደ ቱማ ኦዴስ፤
ሽን ዎርዶ ማርክ ዎርዶ ፃላላ ኦደቴስ።
6 ቀልቅስያ አስ ጭንጫተ ኮዬስ፥ ሽን ደመና፤
አኬክ ደእያ አስ ኤራተ ደሞይ ዋይሰና።
7 ኤያ አሳፐ ሃካ፤
ኔኒ እያ ኦዳፐ ኤራተ ደማካ።
8 ጭንጫ አስ ጭንጫ ግድያ ባ ኦያባ ኤሬስ፤
ሽን ኤያ አሳ ኤያተይ እያ ባለስ።
9 ኤያት ናጋራ ኦሸ፥ ቂሮታናይሳ አግድ ቀልቅሶሶና፤
ሽን ሱረት ባንታ ናጋራይ አቶ ጌተታናዉ ኮዮሶና።
10 እስ እስ ዎዛን ባ አዛኑዋ ኤሬስ፤
እያ ኡፋይሳ ኦንካ እያራ ኮፀና።
11 ኢታታ ኬይ ላለታና፤
ሽን ሱረታ ኬይ ምንድ ዳና።
12 አሳስ ልከ ዳንያ ኦገይ ደኤስ፤
ሽን እያ ዉርሰይ ሀይቆኮ ጋስ።
13 ሚቻ ዎደካ ዎዛናን አዛኖይ ደኤስ፤
ኡፋይሳ ዉርሰይ አዛኖ ግዳናዉ ዳንዳኤስ።
14 ኢታ አስ ባ ኢታ ኦሱዋ ጋተ ኤካና፤
ሎኦ አስካ ባ ሎኦ ኦሱዋ ጋተ ኤካና።
15 ኤያ አስ ኡባባ አማኔስ፤
ሽን ጭንጫ አስ አኬክድ ታንጌስ።
16 ጭንጫ አስ ጎዳ ያዬስ፤ ኢታፐ ሃኬስ፤
ሽን ኤያ አስ ኤሶተስነ ኢታፐ ናገተና።
17 ኤለ ሀንቀትያ አስ ኤያ ኦሶ ኦስ፤
ሽን ጭንጫ አስ ዳንዳአንቾ።
18 አኬክ ባይና አስ ባ ኤያተ ጋትያ ኤኮሶና፤
ሽን ጭንጫ አስ ኤራተ ካላቻዳ ጎፆሶና።
19 ኢታት ሎኦታ ስንን ጉልባታና፤
ናጋራንቻት ፅሎታ ፐንገን ሆካና።
20 ማንቆይ ባ ሾሩዋን እፀቴስ፤
ሽን ዱረታስ ዳሮ ላገት ደኦሶና።
21 ባ ሾሩዋ ካያ አስ ናጋራ ኦስ፤
ሽን ማንቁዋ ማድያ አስ አንጀትዳይሳ።
22 ኢታባ ማቀተይሳት ባሎሶና ግዶኮና?
ሽን ሎኦባ ኦናዉ ሀልቸይሳት
አማነተነ ሲቆ ደሞሶና።
23 ምንድ ኦያ ኦሶ ኡባን ዎይ ደኤስ፤
ሽን ጮ ኦድ ማንቆተ ኤሄስ።
24 ጭንጫታስ ኤንታ ዱረተይ ኤንታዉ ካላቻ፤
ሽን ኤያት ጉጅ ጉጅ ኤዮሶና።
25 ቱማ ማርክ ሸምፖ አሼስ፤
ሽን ዎርዶ ማርክ ባለስ።
26 ጎዳ ያይያ አሳስ ምኖ ሚፃይ ደኤስ፤
እያ ናይታስ ባቃትድ አትያ በሲ ደኤስ።
27 ጎዳ ያሽ ደኦ ፑልቶ፤
ሀይቆ ፅሄፐ አሰ አሼስ።
28 ካዎ ግታተ እ ሃርያ አሳ ዳሮተና፤
ሽን ሃረትያ አስ ይኮ እካ ፓና።
29 ዳንዳአንቾ አሳስ ግታ አኬክ ደኤስ፤
ሽን ኤለ ሀንቀትያ አስ ባ ኤያተ ቆንጭሴስ።
30 ሳሮ ዎዛን አሳተስ ፓያተ እሜስ፤
ሽን ቃናተይ አሳተስ አጃጀ ሀርገ መላ።
31 ማንቆታ ናቅያ አስ ኤንታ መዳይሳ ጫዬስ፤
ሽን መቶታንቾታስ ኬህያ አስ ፆሳ ቦንቼስ።
32 ኢታት ባንታ ኢታ ኦሶን ኩንዳና፤
ሽን ፅሎታስ ሀይቆፐ አትያ ሚፅ ደኤስ።
33 አኬካንቾ አሳ ዎዛናን ጭንጫተ ኩምስ፤
ሽን ኤያት ጭንጫተ አይበኮ ኤሮኮና።
34 ፅሎተ እስ ካዎተ ቁ ቁ ኦስ፤
ሽን ናጋር አይ አስካ ካዉሼስ።
35 ኤራንቾ አይለታን ካዎይ ኡፋይቴስ፤
ሽን ዬላያ አይለይ ካዋ ሀንቀስ።