1 ቦነ ሻች፥ ካ ጫክያ ዎደ እር ኮሾናይሳዳ፥
ኤያስ ቦንቾ ኮሸና።
2 ካፎት ያነ ሃነ ፕራሸ አሰ ቆሆናይሳዳ፥
ጋሶይ ባይና ባድያ ባደ አሰ ጋከና።
3 ፓራስ ልሶ፥ ሀረስ ብፃላ ኮሸይሳዳ
ኤያ አሳ ዞኮስ ፃምአ ኮሼስ።
4 ኤያ አሳስ እያ ኤያተዳ ዛሮፓ፤
ዛርኮ ነ እያ መላ ግዳና።
5 ኤያ አሳስ እያ ኤያተ ቆንጭሳዳ ዛራ፤
ሄስ ሀኖና እፅኮ እ ባና ጭንጫ ግድ ቆፓና።
6 ኤያ አሳ ቦላ ኪታ የዶይ፥
ባ ቶሆ ቃንፅ የገይሳ መላ
ዎይኮ ዎያባ ኡየይሳ መላ።
7 ኤያ አሳ ሌምሶይ፥
ስልዳ ቶሆ መላ ማደና።
8 ኤያ አሳስ ቦንቾ እሞይ፥
ሹቹ ያምባርሻን ቃች ዎድ
ያምባራናዉ ፓጭያ አሳ መላ።
9 ኤያ አሳ ሌምሶይ
ማትዳ አስ ባ ኩሸ ጫድዳ አጉን
ከሳናዉ ባፀተይሳ መላ።
10 ኤያ አሳ ዎይኮ ባ ኦገ ብያ አስ
ኡነ ኦስሳናዉ ቃፃርያ አስ
ባ ቶራ ሻራን ፆንግያ አሳ መላ።
11 ካን ባ ጮሻኮ ጉየ ስሚድ ላጨይሳዳ፥
ኤያ አስ ባ ኤያተ ዛር ዛር ቆንጭሴስ።
12 ባና ጭንጫ ኦድ ፄልያ አሳፐ
ኤያ አሳስ ሎኦ ቃድ ደኤስ።
13 "አዛላ አስ ኦገን ጋሞይ ደኤስ፤
ያሽያ ጋሞይ ኦገን ዩዬስ" ያጌስ።
14 ሳንቅ ማፃፈ ቦላ ያነ ሃነ ቃፀይሳዳ፥
አዛላ አስ ባ ሂፃን ያነ ሃነ ሽረቴስ።
15 እስ እስ አዛላ አስ ሀር አቶሽን፥
ዎፀን ቱሽድ ባራናዉ ዋየቴስ።
16 አዛላ አስ ማርካራ ኦድያ ላፑን ጭንጫታፐ
ባና አዳ ጭንጫ ግድ ቆፔስ።
17 ባና ጋያባይ ባይናባን ፓላምያ አስ
ኦገራ ብያ ካና ሀይ ኦይክያ አሳ መላ።
18,19 ባ ሾሩዋ፥ "ታኒ ካሰ ጋይስ"
ያግድ ጭምያ አስ፥
ጎይድ ቦንቆ ታማ ሆልያ፥
ዎይኮ ዎያ ዶንገ ቶራ ዱክያ አሳ መላ።
20 ም ዉርኮ ታም ቶኤስ፤
ዝግርስ ይኮ ኦሽ አቴስ።
21 ፂፍ ቦንቆ ዳርሰይሳዳነ
ም ታማ ዳርሰይሳዳ
ፓላማ ዳርስያ አስ ኦሹ ዳርሴስ።
22 ዝግርሳ ቃል ማልኦ ካ መላ
ኡፋይስሸ ዱገ ጋንጀ ቤስ።
23 ዎዛናን ኢታባይ ደእሽን፥
ባ እንፃርሳን ጭሞ ቃላ ሃሳያ አስ
ብራን ላንፀትዳ ኡርቃ ሚሸ መላ።
24 ገነ አስ ባ ዎዛናን ደእያ ኢታተ
ባ እንፃርሳን ገንስ።
25 እያ ዎዛናን ላፑን ቱናት ኩምዳ ግሾ፥
እ ሎኦ ቃላ ሃሳይኮካ እያ አማኖፓ።
26 ባ ሞርከተ እ ገንኮካ፥
እ ኦያ ኢታይ ዳባባን ቆንጫና።
27 ሀራታስ ኦላ ቦክያ አስ ሄ ኦላን ባዉ ኩንዳና፤
ሀራታ ቦላ ሹቹ ጎንዶርስያ አሳ ቦላ
ሄ ሹቻይ ስሚድ ጎንዶረታና።
28 ዎርዶትያ እንፃርስ ባ ቆህዳ አሳታ እፄስ፤
ጭሞ ኦድ ኩንደ ካለስ።