ሶሎሞነ ሌምሶታ
1 ሀይሳቲ ሶሎሞነ ሌምሶታ።
ጭንጫ ናእ ባ አዋ ኡፋይሴስ፤
ሽን ኤያ ናእ ባ አይዉ አዛንስ።
2 ናጋራን ደምዳ ሚሸይ ጎኤና፤
ሽን ፅሎተ ሀይቆፐ አሼስ።
3 ጎዳይ ፅሎታ ኮሻይሰና፤
ሽን ናጋራንቾታ አሙዋ ፖልሰና።
4 አዛላተ ማንቅሴስ፤
ሽን ምንድ ኦሶይ ዱረዬስ።
5 ጭንጫ አስ ባ ካ ቦነ ሺሼስ፤
ሽን ካ ጫክያ ዎደ ስክያ አስ ካዉዬስ።
6 ፅሎ አስ አንጀቴስ፤
ሽን ናጋራንቾ አስ
ባ ማካላተ ዶናን ገንስ።
7 ፅሉዋ ሱንይ አንጆን ፄገትሸ ደኤስ፤
ሽን ናጋራንቾታ ሱንይ ኤለ ዶገቴስ።
8 ጭንጫ አስ ኪትዳባ ኦስ፤
ሽን ኤያ አስ ዮኮ ቤስ።
9 ሱረ አስ ሳሮ ደኤስ፤
ሽን ጌላ አስ ባ ጎመን ኦይከቴስ።
10 ገነ አይፈን ቃምኦትያ አስ መቶ ኤሄስ፤
ሽን ያዮና ሴርያ አስ ሳሮተ መስ።
11 ፅሎ አሳ ኦድ ደኦ ፑልቶ፤
ሽን ናጋራንቾ አሳ ኦድ ማካላ ገንስ።
12 እፆይ ፓላማ ደንስ፤
ሽን ሲቆይ ባላ ኡባ ካሜስ።
13 ዎዛናማ አስ ጭንጫተን ኦዴስ፤
ሽን ኤያ አሳ ዞኮይ ፃምአስ አቴስ።
14 ጭንጫት ኤራተ ዳጋዮሶና፤
ሽን ኤያታ ዶናይ ዮ ዳፌስ።
15 ዱረ አሳ ሚሸይ ድረትዳ ካታማዳ ናጌስ፤
ሽን ማንቆተ ማንቆታ ይሴስ።
16 ፅሎ አሳ ኦሶይ እያ ደኦ፤
ሽን ኢታ አሳ ዉርሰይ ዮ።
17 ሴርን ስምያ አስ ደኦ ኦገን ሄመቴስ፤
ሽን ሴርን እፅያ አስ ባሌስ።
18 እፆ ካምያ አስ ዎርዳንቾ፤
ዝግርስ ላልያ አስ ኤያ።
19 ዳሮ ሃሳያ ግዶን ናጋር የና፤
ሽን ባ ዶና ሺሽያ አስ ጭንጫ።
20 ፅሎ አሳ እንፃርስ ጌሻ ብራ መላ፤
ሽን ኢታ አሳ ዎዛን ኢታባን ኩምስ።
21 ፅሎ አሳ ኦድ ዳሮ አሳ ጎኤስ፤
ሽን ኤያት ባንታ ፓጫ ዎዛናን ሀይቆሶና።
22 ጎዳ አንጆይ ዱረ ከሴስ፤
ሄ ዱረተ ቦላ መቶ ጉጀና።
23 ኤያ ኡራስ ኢታባ ኦሶይ ካሳ መላ፤
ሽን ዎዛናማ አስ ጭንጫተን ኡፋይቴስ።
24 ኢታ አስ ህርግዳባይ እያ ቦላ ጋካና፤
ሽን ፅሎይ አሞትዳባይ እመታና።
25 ጎተይ አያ ዎደ ናጋራንቾይ በንተና፤
ሽን ፅሎት መርናዉ ምንድ ዳና።
26 ጫላባይ አቸ፥ ጩይ አይፈ ቆሄይሳዳ፥
አዛላ አስ ኪትዳይሳ ይሎዬስ። 27 ጎዳስ ያሽ ላይ አዱሴስ፤
ሽን ናጋራንቾታ ላይይ ቃሜስ።
28 ፅሎ አስ ኡፋይስ ያና ግድ ናጌስ፤
ሽን ናጋራንቾታ ኡፋይሳይ ያና።
29 ጎዳ ኦገይ ፅሎታስ ባቃትድ አትያ በሰ፤
ሽን ኢታ ኦያ አሳስ ዮ።
30 ፅሎት ኡባ ዎደ ቃፆኮና፤
ሽን ኢታት ቢታ ቦላ ዶኮና።
31 ፅሎ አስ ጭንጫተን ኦዴስ፤
ሽን ጌላባ ኦደትያ እንፃርስ ቃንፀታና
32 ፅሎ አሳ እንፃርስ በሲያ ሃሳያ ኤሬስ፤
ሽን ኢታ አሳ ኦዳይ ዎበ።