ጭንጫተ፥ ኤራተነ ኤያተ
1 ጭንጫተ ባ ኬ ኬፃሱ፤
ላፑን ቱሳታ ባ ኬስ ኤሳሱ።
2 እያ ባ ጊግስያ ግብራስ ሞ መሄ ሹካሱ፤
ዎይነ አጋሱ፤ ጋይታ አሳ ስን አሱ።
3 አሳ ፄጋናዉ ባ አይለታ ኪታሱ፤
ኦሳንቾት ካታማ ቃ በሳን ኤቅድ፥ 4 ህንተኖ፥ ኤር ፓጭዳይሳቶ ሃ ገልተ! ኤያታኮ ሀይሳዳ ያጋሱ። 5 "ሃ ዪተ፤ ታ ካ ሚተ፤
ታ አግዳ ዎይንያ ኡይተ። 6 ህንተ ኤያተ አግድ ደኦን ደእተ፤
አኬክድ ሄመትተ" ያጋሱ።
7 ቀልቅስያ ኡራ ሴርያ አስ ጫሸ ኤኬስ፤
ኢታ ኡራ ዞርያ አስ ባዉ ቆሄቴስ።
8 ቀልቅስያ ኡራ ዞሮፓ፤ እ ነና እፃና፤
ጭንጫ ኡራ ዞራ፤ እ ነና ዶሳና። 9 ጭንጫተ ኡራ ታማርሳ፤ እ ጭንጫ ግዳና፤
ፅሎ ኡራ ታማርሳ፤ እ ኤራ ጉጃና።
10 ጎዳስ ያሽ ጭንጫተስ ዶመ፥ ጌሻ ጎዳ ኤሮይ አኬካ።
11 ታ ጋሶን ነ ላይይ ዳራና፤
ነ ደኦ ላይይ አዱቃና።
12 ነ ጭንጫ ግድኮ፥ ጎኤተይ ነና፤
ነ ቀልቅስያ አስ ግድኮ ነና ቆሃሳ።
13 ኤያ ማጫስ ዋሶ ዳራዉሱ፤
እዉ ዬል ባዋ፤ እያ አይኮካ ኤሩኩ።
14 እያ ባ ካረን ዎይኮ ካታማ ቃ በሳን ኡታዉሱ። 15 ባንታ ኦግያ ብያ አሳ ፄጋዳ፥ 16 "ህንተኖ፥ ኤር ፓጭዳይሳቶ
ታኮ ሃ ዪተ" ያጋሱ። ኤር ባይናይሳታኮ፥ 17 "ካይስድ ኡያ ሃ ማልኤስ፤
ጌማን ምያ ካ ሎኤስ" ያጋሱ።
18 ሽን ሀይቅዳ አሳይ ያን ደኤይሳ፥
እ እማትካ ዱፎን ደኤይሳ እ ኤረና።