ኤያተፈ ሃካ
1 ታ ናአዉ፥ ሚሸ ታልእዳ ነ ሾሩዋስ ዋሰ ገልዳባ ግድኮ፥
ሀራ አሳስ ኩሸ ባቃዳ ጫቅዳባ ግድኮ፥
2 ነ ጫቅዳ ነ ጫቁዋን ፅሄን ገልዳባ ግድኮ፥
ነ ዶናፐ ከይዳ ቃላን ኦይከትዳባ ግድኮ፥
3 ህዛ ነ ሾሩዋ ኩሸን ገላዳሳ።
ሄሳ ግሾ፥ ታ ናአዉ፥ እያፐ ከያናዉ ኮይኮ፥
ነ ሾሩዋ ሶ ባዳ ዋሰተ
ነ ቦላፈ ዎና መላ አዳሻዳ እያ ዎሳ።
4 ሄሳ ኦና ደአሸ ዝንኦፋ፤
ስኮይካ ነና ኤኮፎ።
5 ሻንካፈ ገንኤይ ከስ ኤክያዳ፥
ግተፐ ካፎይ አትያዳ ነና አሻ።
6 ነኖ አዛላዉ፥ ዝማዶኮ ባ፤
እያፐ ጭንጫተ ታማራ።
7 ዝማዶታ ኪተይ ባዋ፥
ሀላቅ ዎይኮ ኤንታ ሃረይ ባዋ።
8 ሽን ባንታዉ ማናባ ቦነ ምንጆሶና፤
ካ ጫክያ ዎደ ባንታዉ ኮሽያ ካ ሺሾሶና።
9 ነኖ አዛላዉ፥ ነ አዉደ ጋካናዉ ስካይ?
ነ ስኮፈ አዉደ ባርካኔ?
10 ኔኒ "ጉ ዝንአና፤ ጉ ስካና፤
ኩሸ ሺሻ ኤካዳ ጉ ሸምፓና" ያጋሳ።
11 ሄ ዎደ ማንቆተ ፓንጋዳ፥
ፓጭ ኦላ ሚሸ ኦይክዳ አሳዳ ነ ቦላ ያና።
12 ላፋነ ኢታ አስ ዩይድ ኦዳ ምርቄስ፤
13 እ ባ አይፈን ቃምኦቴስ፤
ባ ቶሆን በሴስ፤ ባ ብራን ማሌስ።
14 እያ ኡሎን ጌላተ ደኤስ፤ ኢታባ ቆፔስ፤
ኡባ ዎደ ኦሹ መስ።
15 ሄሳ ግሾ ዮይ አኬኮና እያ ቦላ ያና፤
እ ሀሳዮና መቃና፤ ዛሪድ ፓፀና።
16 ጎዳይ እፅያ ኡሱፑን ቆሞት ደኦሶና፤
እ ሻተትያ ቆሞት ላፑና፤
17 ካድ ፄልያ አይፈ፥
ዎርዶትያ እንፃርስ፥
ፅሎ አሳታ ዎያ ኩሸ፥
18 ኢታባ ማቅያ ዎዛና፥
ኢታባኮ ዎፃናዉ ኤሶትያ ቶሆ፥
19 ዎርዶ ቦላ ዎርዶ ጉጅያ ዎርዶ ማርካ፥
እሻታ ግዶን ኦሽ መያ አስ።
ላይማተፈ ናገታ
20 ታ ናአዉ፥ ነ አዋ ኪታ ፖላ፤
ነ አየ ትምርትያ አጎፋ።
21 ኤንታ ኡባ ዎደ ነ ዎዛናን ኦይካ፤
ነ ቆያን ቃቻ።
22 ነ ሄመትያ ዎደ ኤንቲ ነና ካለና፤
ነ ዝንእያ ዎደ፥ ኤንቲ ነና ናጋና፤
ነ ባርክያ ዎደ ኤንቲ ነና ዞራና።
23 ጎዳ ኪታይ ፆምፐ፤ እያ ትምርተይ ፖኦ፤
እያ ሴራይ ደኦኮ ኤፍያ ኦገ።
24 ሀ ትምርተት ኢታ ማጫፈነ
ሀራ ጭምያ ማጫሳ እንፃርሳፈ ነና ናጋና።
25 እ ማላ ሎኦተይ ነና ቃፎ፤
እ ቃምኦቶይ ነና ድኦፎ።
26 እስ አደይ ጉ ሚሸን ላይማ ማጫስ ደማናዉ ዳንዳኤስ፤
ሽን ሀራ አሳ ማቾ ላገይ ሸምፖ ኤኬስ።
27 ታማ እድምን
እያ ማኦይ ሜተቶና አተይ ደኢ?
28 ታማ ቦንቆ የን፥
እያ ቶሆይ ፁገቶና አተይ ደኢ?
29 አሳ ማቾ ላገያ ኡራይ ሄሳ መላ፤
እዮ ቦችያ ኡባይ ሴረቶና አተና።
30 ካይሶይ ኮሻትድ ማናዉ ካይስኮ፥
አስ እያ ቦረና።
31 ሽን እ ኦይከትያባ ግድኮ፥
ላፑን ኩሸ ቃንፃና፤
ባ ሶን ደእያ ሚሸ ኡባ እማና።
32 ሽን ማጫሳራ ላይማትያ አስ ዎዛን ባይና አስ፤
ሄ ኡራይ ባ ሸምፑዋ ይሴስ።
33 ደሸነ ካዉሽ እያ ቃዳ፤
ዬል እያፐ ቁሸተና።
34 ቃናተይ አዝናስ ይሎ ደንስ፤
ሀሎ ከስያ ዎደ እዉ ቃተና።
35 እ አይ አጫካ ኤከና፤
አይ መላ እሞትካ እያ ሀንቁዋ ዶሽሰና።