1 ሊቆ እንፃርስ ሀንቆ ዛርብሴስ፤
ሽን ዶምኤያ ቃል ሀንቆ ደንስ።
2 ጭንጫታ እንፃርሳይ ኤራ ፑላዬስ፤
ሽን ኤያታ ዶናይ ኤያተ ፑልትሴስ።
3 ጎዳ አይፈት ኡባ በሲ ፄሎሶና፤
ኢታታነ ሎኦታ ሻክድ በኦሶና።
4 ሎኦ ኦድ ደኦ ም መላ፤
ሽን ጌላ ኦድ አያና መንስ።
5 ኤይ ባ አዋ ሴራ ካስ፤
ሽን ባ አዋ ሴራ ኤክያ አስ ጭንጫ።
6 ፅሎ ኡራ ኬን ዳሮ ሚሸይ ደኤስ፤
ሽን ኢታታ ሶ ገልያ ሚሸይ መቶ ኤሄስ።
7 ጭንጫታ ዶናይ ኤራ ዘሬስ፤
ሽን ኤያታ ዎዛናይ ሄሳ መላ ግደና።
8 ጎዳይ ኢታታ ያርሹዋ እፄስ፤
ሽን ሱረታ ዎሳን እ ኡፋይቴስ።
9 ጎዳይ ኢታ አሳታ ኦግያ እፄስ፤
ሽን ፅሎተ ካለይሳታ እ ዶሴስ።
10 ልከ ኦግያ አግዳ አስ ፕርድ ናጌስ፤
ሴራ እፅያ አስ ሀይቄስ።
11 ዱፎይነ ዮይ ጎዳ ስንን ቆንጨ፤
ያትን፥ አሳ ዎዛና ቆፋይ ዋን እያፐ ጌማኔ?
12 ቀልቅስያ አስ ሴራ ዶሰና፤
ጭንጫታፐ ዞረ ኦይቸና።
13 ዎዛን ኡፋይትን፥ ሶምኦይ ፖኤስ፤
ሽን ዎዛን አዛንኮ፥ አያን መቄስ።
14 አኬካ ዎዛን ደእያ አስ ኤራተ ኮዬስ፤
ሽን ኤያት ባንታ ኤያተን ኡፋይቶሶና።
15 ማንቆታ ደኦይ ኡባ ዎደ ባፀ፤
ሽን ኡፋይትያ አስ ኡባ ዎደ አለስ።
16 ኦሻራ ደእያ ግታ አቆፐ
ጎዳ ያሻራ ደእያ ጉባይ ኬሀ።
17 ኦሽ ደእያ በሳን ሞ አሾ ማናፐ
ሲቆይ ደእያ በሳን ሳን ኬሀ።
18 ሀንቆይ ኦሽ ከሴስ፤
ሽን ዳንዳእ ኦሽ እርፅሴስ።
19 አዛላ አሳ ኦገይ አጉንን ድረትስ፤
ሽን ሱረ አሳ ኦገይ ጊጋ።
20 ጭንጫ ናእ ባ አዋ ኡፋይሴስ፤
ሽን ኤያ ናእ ባ አይዉ ካስ።
21 ዎዛን ባይና አስ ባ ኤያተን ኡፋይቴስ፤
ሽን ዎዛናማ አስ በሲያ ባ ኦስ።
22 ዞረይ ይኮ፥ ቆፕዳባይ ሀድሬስ፤
ዳሮ ዞረይ ደእያ በሳን ቆፕዳባይ ፖለቴስ።
23 ኦይሻስ በሲያ ዛሮ እሞይ ሄ ኡራ ኡፋይሴስ፤
ባ ዎደን ኦደትያ ኦድ አይ መላ ኡፋይስ!
24 ጋርሳን ደእያ ስኦለፐ አታና መላ
ደኦ ኦገይ አኬካ ኡራ ፑደ ካለስ።
25 ጎዳይ ኦቶራንቾታ ኬ ላላና፤
ሽን አምኤ ዛዋ ናጌስ።
26 ጎዳይ ኢታታ ቆፋ እፄስ፤
ሽን ጌሻ ቃላን እ ኡፋይቴስ።
27 ዎርዶን ዎ ደማናዉ አልያ አስ
ባ ሶ አሳ ቦላ መቶ ኤሄስ፤
ሽን ዎፈ እፅያ አስ ደኦን ዳና።
28 ፅሎ አስ ኦደታናፔ ስንትድ ቆፔስ፤
ሽን ኢታታ እንፃርሳፐ ኢታባይ ፑልቴስ።
29 ጎዳይ ኢታታፐ ሃኬስ፤
ሽን ፅሎታ ዎሳ ስኤስ።
30 ሶምኦይ ፓሽክን ዎዛን ኡፋይቴስ፤
ምሽራቾይ መቀ ምንስ።
31 ደኦ እምያ ዞረ ስእያ አስ
ጭንጫተራ እስፈ ዳና።
32 ሴራ እፅያ አስ ባና ቆሄስ፤
ሽን ሴራ ኤክያ አስ አኬካ ደሜስ።
33 ጎዳስ ያሽ ጭንጫተ ታማርሴስ፤
አሽከተ ቦንቾፈ ስንቴስ።