ሀራ ሶሎሞነ ሌምሶታ
1 ሀይሳቲ ይሁዳ ካዋ ህዝቅያሳ አሳት ዱቅድ ፃፍዳ ሶሎሞነ ሌምሶታ።
2 ፁራ ገንይ ፆሳስ ቦንቾ፤
ፁራ ፕልግድ ከሶይ ካዎታስ ቦንቾ።
3 ሳሎይ ቁ ግዳይሳዳነ
ሳእ ዝቃ ግድዳይሳዳ
ካዎታ ቆፋ አስ ኤራናዉ ዳንዳኤና።
4 ብራፐ ቅታ ድጋ፤
ሄሳፈ ጉየ፥ ሂላንቾይ ሎይና።
5 ካዎ ስንፈ ኢታ አሳታ ድጋ፤
እያ አራታይ ፅሎተን ምንድ ኤቃና።
6 ካዎ ስንን ኤቅያ ዎደ ጬቀቶፋ፤
ግታ አሳታ ግዶን ነዉ በሰ ኮዮፓ።
7 ኔፐ ግታትያ አሳስ በሰ እማናዉ
ሀላቃይ ነና ደንን፥ ካዉየይሳፈ፥
እ ነና፥ "ሀ ቃ በሳን ኡታ" ገይስ ሎኦ።
8 ነ አይፈን በእዳባ ማርካታናዉ
ዳይና ስን ባናዉ ኤለሶፓ።
ነ ማርካታ ስምን ሀራ አስ
ነ ማርካተይ ባላ ግደይሳ ቆንጭስኮ፥ ነ ዬላታና።
9 ነ ግዶንነ ነ ሾሩዋ ግዶን ፓላም መትኮ፥
እያራ ኦደታዳ ነ ፓላማ ዉርሳ፤
ሀራ አሳ ፁራ ቆንጭሶፓ።
10 ሄስ ሀኖና እፅኮ ነ ኦደይሳ ስእዳ አስ
ነና ካዉሻና፤
ነ ሱንይ ዛሪድ ስሞናዳ ኢታና።
11 በሲያ ዎደ ኦደትዳ ልከ ቃል፥
ብራ ሚሸ ቦላ ትገትዳ ዎርቃ አሌቆ መላ።
12 ኤራ አስ ዞርያ ዞረ ስእያ ሀይስ፥
ሄስ ዎርቃፈ ዎይኮ ጌሻ ዎርቃፈ
ኦሰትዳ አሌቆ መላ።
13 ካ ጫክያ ዎደ እርፃ ሃ ኡይን አለይሳዳ፥
አማንያ ኪታንቾይ ባና ኪቶይሳ ኡፋይሴስ።
14 እሞናባ እማና ግድ ጬቀትያ አስ
እር ባይና ሻራነ ጫርኮ መላ።
15 ዳንዳአ አስ ሀላቃ ኦድድ ማይዜስ፤
ሊቆ ቃል መቀ ካን ገሌስ።
16 ኤስ ደምኮ ካላና ጋካናዉ ማ፤
ሽን ዳርስኮ ነና ጮሻና።
17 ነና ኡፍሸ እፆናዳ፥
ነ ሾሩዋ ሶ ኡባ ዎደ ቦፓ።
18 ባ ሾሩዋ ቦላ ዎርዶን ማርካትያ አስ፥
ፃምእ፥ ማሽነ ቶር ቆሄይሳዳ ቆሄስ።
19 መቶ ዎደ አማነቶና አሳን ዘምፖይ፥
ቃፅያ አቻን ጮምያነ
ስልዳ ቶሆን ሄመተይሳ መላ።
20 አዛንዳ አሳስ የ የፅያ አስ፥
ሜጎ ዎደ ማኦ ቃርያነ
ማዱን ቦላ ጫላባ ትግያ አሳ መላ።
21 ነ ሞርከይ ኮሻትኮ ሙዛ፤
ሳሞትኮ ኡሻ።
22 ነ ሄሳ ኦኮ እያ ሁጰን ታማ ቦንቆ
ካሽድ ቆለይሳ መላ፤
ጎዳይ ነና ዎይታና።
23 ዶሎሀ ባጋ ጫርኮይ እራ ኤሄይሳዳ፥
ዝግርስ ሀንቆ ኤሄስ።
24 ዶናትያ ማችራ እስ ኬን ዳናፐ
ካረ ባራንዳን ዱስ ሎኦ።
25 ዳቡርዳ አስ እርፃ ሃ ኡይድ አለይሳዳ፥
ሃሆ ቢታፈ ያ ሎኦ ኦድ ኡፋይሴስ።
26 ኢታ አሳ ስንን ጉልባትያ ፅሎ አስ፥
ቡሎትዳ ፑልቶነ ኢትዳ ኦላ ሃ መላ።
27 ዳሮ ኤስ ሙስ ሎኦ ግደና፤
ሄሳዳካ፥ ባ ቦንቾ ኮሽ ቦንችሰና።
28 ባና ሃሮና አስ
ድርስ ላለትዳ ካታማ መላ።