ሌምሶ ጎአ
1 ሀይሳቲ እስራኤለ ካዋ ዳዊታ ናኣ ሶሎሞነ ሌምሶታ። 2 ሌምሶት አሳይ ጭንጫተ፥ ሴራነ ኤራ ሃሳያ አኬካናዉ ማዶሶና። 3 ኤንቲ ጭንጫተ፥ ፅሎተ፥ ሱረ ፕርድነ ሱረ ዎዛን ዳና መላ ታማርሶሶና። 4 ኤያታስ አኬካ እሜስ፤ ናአተታስ ኤራተነ ካሃማተ እሜስ። 5 ጭንጫት ሀ ሌምሶታ ስእድ፥ ኤራ ጉጆሶና፤ አኬካንቾት ሎኦ ዞረ ኤኮሶና። 6 ሄሳን ሌምሶታነ ኤንታ ብርሸ፥ ጭንጫተ ኦዳነ ኤንታ ቃንእሸታ አኬካናዉ ዳንዳኤቴስ።
7 ጎዳስ ያሽ ጭንጫተስ ዶመ፤ ሽን ኤያት ጭንጫተነ ሴራ ካኦሶና።
ጭንጫተ ነዉ ሚሸ ኦ
8 ታ ናአዉ፥ ነ አዋ ዞርያ ስአ፤
ነ አየ ትምርትያ ካፓ።
9 ሄስ ነ ሁጵያስ ቦንቾ ካላቻ፤
ነ ቆያስ ጎዝዳ ግዳና።
10 ታ ናአዉ፥ ነና ናጋራንቾት
ጭምኮ ኤሮ ጎፓ።
11 ኤንቲ፥ "ኑራ የ፤
አሰ ዎናዉ ሆክድ ናጎስ፤
ፅሎታ ዎናዉ ቆሰቶስ።
12 ስኦለይ ምተይሳዳ ኑካ ኤንታ ፓፃ ምቶስ፤
ኑ ኤንታ ኦላን የገትያ አሳዳ ኦና።
13 ኑኒ አልኦ ሚሸ ኡባ ደማና፤
ኑ ኬ ቦንቀ ሚሸን ኩንና።
14 ኑራ ላገታ፤
ኑ ደምዳባ እስፈ ሻከታና" ያጋና።
15 ታ ናአዉ፥ ኤንታራ ሄመቶፋ፤
ኤንታ ኦግያራ ባናዉ ነ ቶሁዋ ደንፋ።
16 ኤንቲ ኢታባ ኦናዉ ዎፆሶና፤
አሳ ሱ ጉሳናዉ ያ ሃ ጎሶና።
17 ካፎይ ፄልሽን፥
እያ ኦይካናዉ ግተ የገ ማደና።
18 ሽን ኤንቲ ባንታ ሱ ጉሳናዉ ሆኮሶና፤
ባንታ ሸምፑዋ ዎናዉ ቆሰቶሶና።
19 ገነን ጎአ ደምያ አሳ ዉርሰ ሄሳ መላ፤
ኤንቲ ሺሽዳ ሻሎይ ኤንታ ሸምፑዋ ኤኬስ።
ጭንጫተ ፄጌስ
20 ጭንጫተ ዳጋላ ቦላ ኤቃዳ ፄጋዉሱ፤
ዳባባን ባ ቃላ ቁ ኦዳ ስሳዉሱ። 21 ጭንጫተ አስ ሺቅያ በሳን ኤቃዳ ፄጋዉሱ፤
ካታማ ገልያ ፐንገን ኤቃዳ ሀይሳዳ ያጋዉሱ።
22 "ህንተኖ፥ አኬክ ፓጭዳይሳቶ፥
ህንተ አዉደ ጋካናዉ ኤያ ግድድ ዳኔ?
ቀልቅሰይሳቶ፥ አዉደ ጋካናዉ ኡፋይታኔ?
ኤያቶ፥ አዉደ ጋካናዉ ኤራተ እፃኔ?
23 ታ ሴራ ህንተ ስእዳባ ግድያኮ፥
ታኒ ታ ኤራ ህንተ ቦላ ጉሳና፤
ታ ቃላካ ህንተና ታማርሳና።
24 ሽን ታ ፄግዳ ዎደ ህንተ ኮዮና እፅዳ ግሾ፤
ታኒ ኩሸ ምጭን ኦንካ አኬክቦና ግሾ፤
25 ታ ዞርያ ህንተ ካዳ ግሾ፤
ታ ሴራካ ኤክቦና ግሾ፤
26 ህንተና መቶይ ጋክያ ዎደ ታ ሚጫና፤
ህንተ ዳጋማን ኮኮርያ ዎደ ታ ቀልቅሳና። 27 ጋዶይ ኡሾዳ ህንተ ቦላ ያ ዎደ፥
መቶይ ጎተዳ ህንተ ቦላ ኤቅያ ዎደ፥
ኡንእነ ዋየይ ህንተ ቦላ ጋክያ ዎደ፥
ታኒ ህንተና ቀልቅሳና።
28 "ሄ ዎደ ኤንቲ ታና ፄጋና፤ ሽን ታ ኮይከ፤
ኤንቲ ታና ምንድ ኮያና፤ ሽን ደሞኮና። 29 ኤንቲ ኤራተ እፅዳ ግሾ፤
ጎዳ ያሽ ዶርቦና ግሾ፥ 30 ታ ዞርያ ኤክቦና ግሾ፤
ታ ሴራ ካዳ ግሾ፤ 31 ኤንቲ ባንታ ኦሱዋ አይፍያ ማና፤
ባንታ ቆፋ አይፍያ ካላና። 32 አኬክ ፓጭዳይሳታ ጭንጫተፈ ሃከይስ ዎስ፤
ኤያታ ቀል ጉስ ይሴስ። 33 ሽን ታ ኦድያባ ስእያ ኡባይ ሳሮ ዳና፤
መቶ ህርጋፈካ ሸምፓና።"