1 ሻሄተ ኮይያ አስ ባ አሙዋ ካሌስ፤

ሱረ ቆፋ ኡባ እፄስ።

2 ኤያ አስ ባ ቆፋ ፃላላ ቆንጭሳናዉ ዶሴስ፤

ሀራ አሳፐ ኤራ ኤካናዉ ዶሰና።

3 ኢታተ ያ ዎደ ካይ ዬስ፤

ካዉሻተ ያ ዎደ ዬል ዬስ።

4 አሳ ዶናፐ ከያ ኦድ፥

ጪሞ ሃ መላ፤

ጭንጫተ ጎግያ ፑልቶ መላ።

5 ናቅዳ ኡራ ማድድ፥ ፅሉዋ ፕርዳ

ጌላየይስ ሎኦ ግደና።

6 ኤያ አሳ ኦድ ኦሹ ደንስ፤

እያ ዶናይ ዋ ፄጌስ።

7 ኤያ አሳ ኦድ ባና ቆሄስ፤

እያ ኦዳይ ፅሄ ግድድ እያ ኦይኬስ።

8 ዝግርስ ማልኦ ካ መላ፤

ኡፋይስሸ ዱገ ጋንጀ ጋኬስ።

9 አዛላ አስ

ይስያ አሳፐ አይባካ ዱማተና።

10 ጎዳ ሱንይ ምኖ ግምበ መላ፤

ፅሎ አስ ያ ዎፅድ ሳሮ አቴስ።

11 ዱረ አሳታ ዱረተይ ግምበትዳ ካታማ መላ፤

ኤንታ ቆፋን ኤንታ ዱረተይ

ምኖ ድርሳዳ ኤንታ ናግያባ ዳኔስ።

12 ኦቶሮይ ኩንደፈ ስንቴስ፤

አሽከተ ቦንቾ ኤሄስ።

13 ስኦና ደእሸ ዛሮ እሞይ፥

ሄ ኡራስ ኤያተነ ዬላ።

14 ዳና ግድ ቆፕኮ፥ እያ አያናይ ሀርገ ዳንዳእሴስ፤

ሽን ኡፋይስ ቃንፅኮ እያ ማደይ ባዋ።

15 አኬካ አስ ኤራተ ኮዬስ፤

ጭንጫ አሳ ሀይ ጭንጫተ ስኤስ።

16 እሞት እመይሳስ ኦገ ዶዬስ፤

ግታ አሳታራ ኤርሴስ።

17 ዳይና ስንን ኮይሮ ሺቅድ ሞትያ ኡራይ፥

እያ ሞርከይ ይን፥ እያ ኦይቻና ጋካናዉ፥

ኡባ ዎደ ባና ፅሎ ግድ ቆፔስ።

18 ሳማ የገ ፓላማ ተቄስ፤

ናምኡ ፓላምያ አሳታ ሻኬስ።

19 ቆሄትዳ እሻይ ግምበትዳ

ካታማፐ አድ ምኔስ፤

እያ ፓላማይ ብራታ ጎርደ መላ።

20 አስ ባ ዶና ኦዳን ባ ኡሎ ኩንስ፤

ባ እንፃርሳ አይፈን ካሌስ።

21 ሀይቆይነ ደኦይ እንፃርሳና፤

ኔኒ ነ እንፃርሳ አይፍያ ማና።

22 ማቾ ደምዳይ ሎኦባ ደምስ፤

እ፥ ጎዳፐ ቴማ ደሜስ።

23 ማንቆ አስ አዳሽድ ኦደቴስ፤

ሽን ዱረ አስ ኦቶሮን ዛሬስ።

24 ዳሮ ላገይ ደእያ አስ ባ ቦላ መቶ ኤሄስ፤

ሽን እሻፐ አድ ማታትያ ላገይ ደኤስ።