1 ዎንቶይ ኤሀናባ ነ ኤሮና ግሾ
ዎንቶባን ጬቀቶፋ።
2 ሀራ አስ ነና ጋላቶፐ አትሽን ኔኒ ነና ጋላቶፓ፤
አስ ነ ግሾ ማርካቶፈ አትሽን፥ ኔኒ ነ ኬሀተባ ኦዶፓ።
3 ሹች ግታ ቶሆ፤ ሻፈይ ዴፆ፤
ሽን ኤያ አስ መያ ኦሽ
ናምኣፈካ ዴፄስ።
4 ሀንቆስ ቃይ ባዋ፤
ይሎይ ይስያ ድኦ መላ፤
ሽን ቃናተይ ኡባፈ ኢታ።
5 ጌምዳ ሲቆፐ
ባልያ ዎደ ቆንጨን ሀንቀተ ሎኦ።
6 ሞርከይ ነና ታሙ ቶሆ ዬራናፐ
ሲቆይ ነና ማዱንፅሰይስ ሎኦ።
7 ካልዳ አስ እልሎ ኤስ ሻቴስ፤
ሽን ኮሻትዳ ኡራ ጫምያባይ ማልኤስ።
8 ባ ሶ አግድ ዩይያ አስ፥
ባ ኬ አጋዳ ፓልያ ካፎ መላ።
9 ሽቶይነ ሳውያ እፃነይ አሰ ኡፋይሰይሳዳ
ሲቆ ላገ ዞረይ ሄሳዳ ኡፋይሴስ።
10 ነ ላገታነ ነ አዋ ላገታ አጎፋ፤
ነ መቶትዳ ዎደ ነ እሻ ሶ ቦፓ፤
ሃሆን ደእያ እሻፐ ማታን ደእያ ሾሮይ ሎኦ።
11 ታ ናአዉ፥ ጭንጫ ግዳ፤ ታና ኡፋይሳ፤
ታና ካያ አሳስ ታ ዛሮ እማና።
12 ጭንጫ አስ መቶይ ያ ዎደ በእድ ቆሰቴስ፤
ሽን አኬክ ባይና አስ ብድ መቶን ገሌስ፤
ያትድ ጉየፐ ቂሮቴስ።
13 ኤሮና አሳስ ዋሰ ገልያ ኡራ ማኡዋ ቃር ኤክተ፤
እማ አሳስ ዋሰ ገልዳ ኡራ ማኡዋ ኦይክተ።
14 ዎንታ ጉራ ባ ቃላ ቁ ኦድ፥
ባ ሾሩዋ ሳሮተይ እያ ባድያ አሳ መላ።
15 ዶናትያ ማቻነ
አያ ኬ እስኖ።
16 ጫርኮ ተቃናዉ፥ ዛይተ ኩጭድ ኦይካናዉ ዳንዳኤቶናይሳዳ፥
እዮ ስእ ኦናዉ ዳንዳኤተና።
17 ብራት ብራታ ፖሸይሳዳ፥
አስ እሶይ እሱዋፈ ታማሬስ።
18 ባላሰ ም ሎይድ ናግያ አስ እያ አይፈ ማና፤
ባ ሀላቃ ካቦያ ኦሳንቾይ ቦንቸታና።
19 ሃ ማስቶተዳ ሶምኦ በሰይሳዳ፥
አሳ ዎዛን እያ ኦናተ በሴስ።
20 ሀይቆይነ ዱፎይ ካል ኤሮናይሳዳ፥
አሳ አይፈይ ካልድ ኤረና።
21 ብርነ ዎርቀይ ታማን ፓጨትድ ጌየይሳዳ፥
አስ ባ ኤክያ ጋላታን ፓጨቴስ።
22 ካ ኡዱላን ጫደይሳዳ፥
ኤያ አስ ኡዱላን ጫድያኮካ
እያፐ ኤያተይ ክቸና።
23 ነ ዶርሳታ ሀኖታ ሎይዳ ኤራ፤
ነ ዉድያካ አኬካዳ ሄማ።
24 አይስ ጊኮ፥ ዱረተ መርናዉ ዴና፤
ካላችካ የለተፈ የለተስ አና።
25 መላ ማታይ ቡጨትን፥ አጫ ማት ከያ ዎደ፥
ደርያ ቦላ ደእያ ማታይ ሺቅዳፐ ጉየ፥
26 ዶርሳታ እክሰፐ ነ ነዉ ማኦ ከሳና፤
ዴሻታ ባይዛዳ ጋደ ሻማና።
27 አትዳ ዴሻታ ማይ ነዉ፥
ነ ሶ አሳስነ ነ ማጫ አይለታስ ካ ግዳና።