1 ሄሳፈ ጉየ፥ ሳምባታ ጋላስ፥ የሱሲ ጋደ ግዶራ አስ። የሱሳ ታማረት ኮሻትዳ ግሾ ትያ ባንጋ ሽርክድ ሞሶና።✝ 2 ሽን ፋርሳወት ሄሳ በእድ የሱሳኮ፥ "ሄኮ፥ ነ ታማረት ሳምባታ ጋላስ ኦናዉ በሶናባ ኦሶና" ያግዶሶና።

3 የሱሲ ዛሪድ፥ "ዳዊቲ ኮሻትዳ ዎደ እያራ ደኤይሳታራ አይ ኦዳኮ ናባብበከቲ?✝ 4 ዳዊቲ ፆሳ ኬ ገልድ ካህነታ ፃላላፐ አትሽን፥ እነ እያራ ደኤይሳታስ በሶና ጌሻ ዳቡዋ ምስ።✝ 5 ዎይኮ ካህነት ሳምባታ ዎጋ ሻርድ ፆሳ ኬን ሳምባታ ጋላስ ኦሶ ኦኮ ኤንታዉ ባላ ግዶናይሳ ሙሰ ህግያን ናባብበከቲ?✝ 6 ሽን ስእተ! ፆሳ ኬፈ አይ ሀይሳን ደኤስ። 7 ‘ታኒ ህንተ ያርሹዋ ግዶናሽን ሀራታ ማራና መላ ኮያይስ’ ግያ ቃላይ ወይ ጉሰኮ ህንተ ኤርዳኮ፥ ፅሎ አሳ ቦላ ፕርደከታ።✝ 8 አሳ ናአይ ሳምባታ ጎዳ" ያግስ።

9 የሱሲ ያፐ ብድ አይሁደ ዎሳ ኬ ገልስ። 10 ያን ኩሸይ ጉንድዳ እስ ኡራይ ደኤስ። የሱሳ ሞታናዉ ጋሶ ኮይያ አሳት፥ "ሳምባታ ጋላስ ፓናዉ በሲ በሰኔ?" ያግድ ኦይችዶሶና።

11 እ ኤንታኮ፥ "ህንተ ግዶፈ እሱዋስ ዶርስ ሳምባታ ጋላስ አፎን ዉልኮ፥ ጎችድ ከሶናይ ኦኔ?✝ 12 ያትን አስ ዶርሳፈ ዋንድ ዳሮ አኔ? ሄሳ ግሾ፥ ሳምባታ ጋላስ ሎኦባ ኦሶይ በሴስ" ያግስ።

13 ሄሳፈ ጉየ፥ የሱሲ አድያኮ፥ "ነ ኩሽያ ፕድ ኦ" ያግን፥ ኡራይ ፕድ ኦስ። እያ ኩሸይ ፓፅድ ሀንኮ ኩሽያዳ ሀንስ። 14 ሽን ፋርሳወት ያፐ ካረ ከይድ፥ የሱሳ ዋት ዎነኮ ማቀትዶሶና።

15 የሱሲ ኤንታ ቆፋ ኤርድ ሄ በሳ አግድ ሀራ ሶ ብስ። ዳሮ አሳይ እያ ካልድ ብዶሶና፥ ሀርጋንቾታ ኡባ ፓስ። 16 የሱሲ፥ "ታባ ሀራ ኦደስካ ኦዶፕተ" ያግድ ምን ኦድስ። 17 ሄስካ ናብያ እሳያስ፥

18 "ሄኮ ታ ዶርዳ አይለይ፥

ታ ዶሰይስ፥ ታና ኡፋይሰይስ፥

ታኒ ታ አያና፥ እያ ቦላ ሸምፕሳና፤✝

እ፥ አይሁደ ግዶና ደርያስ ሱረ ፕርዳባ አዋጃና።

19 እ ፓላመና ዎይኮ ካጨና፤

ባ ቃላካ ደንባን ጮ ስሰና።

20 ሱረ ፕርዳን ፆኖ ደማና ጋካናዉ፥

ድንጨትዳ ማይረ መንና፥

ጩይያ ሙቃዳ ቶይሰና።

21 አይሁደ ግዶና ደረይ ኡባይ እያን ኡፋይስ ዎና"

ያግድ ፃፍዳይስ ፖለታና መላሳ።

22 ሄሳፈ ጉየ፥ ቱና አያናን ኦይከትዳ ቆቀነ ሙመ አሰ ደኤይሳ እያኮ ኤህዶሶና። የሱሲ ኡራ ፓን፥ ኡራይ ፄልስ፤ ኦደትስ። 23 አሳ ኡባይ ማላለትድ፥ "ሀይስ ዳዊታ ናኣ ግዳንደሻ?" ያግዶሶና።

24 ሽን ፋርሳወት ሄሳ ስእድ፥ "ሀ ኡራይ ቱና አያናታ ከሰይ ቱና አያናታ ሀላቃ ብኤል-ዘቡላ ዎልቃና" ያግዶሶና።✝

25 የሱሲ ኤንታ ቆፋ ኤርድ፥ "ዎል ግዶን ሻከትያ ካዎተ ኡባይ ኩንዳና፤ ቃስ ዎል ግዶን ሻከትያ ካታማይ ዎይኮ ኬይ ምንድ ኤቀና። 26 ፃላሄይ ፃላሄ ከስያባ ግድኮ ባ ግዶን ሻከትስ ጉሱ። ሄሳ ሀንያባ ግድኮ እያ ካዎተይ ዋንድ ምንድ ኤቃናዉ ዳንዳኢ? 27 ታኒ ቱና አያና ከሰይ ብኤል-ዘቡላ ዎልቃን ግድኮ ህንተና ካልያ አሳት ኦደ ዎልቃን ከሳኔ? ሄሳ ግሾ፥ ህንተና ካልያ አሳት ህንተና ፕርዳና። 28 ሽን ታኒ ቱና አያናታ ከሰይ ፆሳ አያናን ግድኮ፥ ፆሳ ካዎተይ ህንተኮ ይስ።

29 "ዎይኮ እስ አስ ዎልቃማ አሳ ሶ ገልድ እያ ሻሉዋ ቦንቃናዉ ኮይኮ ኮይሮትድ ሄ ኡራ ቃቾና እፅኮ ዋትድ ዳንዳኢ? ያትኮ እያ ሻሉዋ ቦንቃናዉ ዳንዳኤስ።

30 "ታራ ግዶናይ ኦንካ ታራ ኤቀቴስ፤ ቃስ ታራ እስፈ ሺሾና ኡባይ ላሌስ።✝ 31 ሄሳ ግሾ፥ ስእተ፤ አሳይ ኦያ አይ ናጋርነ ጫሻ ቃል ኡባይ አቶ ጌተታና፥ ሽን ጌሻ አያና ጫይያ ኦደስካ እያ ናጋራይ አቶ ጌተተና።✝ 32 ኦንካ አሳ ናአ ቦላ ኢታባ ኦደትኮ እያዉ አቶ ጌተታና፥ ሽን ጌሻ አያና ቦላ ኢታባ ኦደትያ ኦደስካ ሀ ሳአን ግድን ያና አላምያን እያ ናጋራይ አቶ ጌተተና።✝

33 "ሎኦ ምይ ሎኦ አይፈ አይፌስ፤ ቃስ ኢታ ምይ ኢታ አይፌስ። ህዛ፥ ምይ ኤረተይ ባ አይፍያና። 34 ህንተኖ፥ ሾሻ ናይቶ፥ ህንተ ኢታ ግድሸ ዋንድ ሎኦባ ኦደታናዉ ዳንዳኤቲ? አስ ባ ዎዛናን ኩምዳባፐ ዶናን ኦደቴስ።✝ 35 ሎኦ አስ ባ ዎዛናን ዎዳ ሎኦባፐ፥ ሎኦባ ከሴስ፤ ኢታ አስ ባ ዎዛናን ዎዳ ኢታባፐ፥ ኢታባ ከሴስ። 36 ሽን ስእተ፥ አሳይ ኦደትያ ጮ ኦዳ ኡባስ ፕርዳ ጋላስ ዛሮ እማና። 37 አይስ ጊኮ፥ ነ ኦደትያ ነ ቃላን ፅላና፤ ነ ኦደትያ ነ ቃላይ ነ ቦላ ፕርዳና" ያግስ።

38 ሄሳፈ ጉየ፥ እስ እስ ፋርሳወትነ ህገ አስታማረት የሱሳኮ፥ "አስታማርያዉ፥ ኔኒ ማላታ ኦዳ ኑና በሳ" ያግዶሶና።✝

39 ሽን የሱሲ ዛሪድ፥ "አማነቶናነ ኢታ የለተይ ማላታ ኮዬስ። ሽን ናብያ ዮናሳ ማላታፐ ሀራ ማላት እያዉ እመተና።✝ 40 ዮናስ ግታ ሞሎ ኡሎን ሄ ጋላስነ ሄ ቃማ ጋምእዳይሳ መላ አሳ ናአይ ሄ ጋላስነ ሄ ቃማ ቢታ ጋርሳን ጋምአና።✝ 41 ናናወ አሳይ ፕርዳ ጋላስ ደንድድ ሀ የለተ ቦላ ፕርዳና፤ አይስ ጊኮ፥ ኤንቲ ዮናስ ሳባክን፥ ስእድ ባንታ ናጋራፐ ስምዶሶና። ሄኮ፥ ዮናሳፐ አይስ ሀይሳን ደኤስ።✝ 42 ፕርዳ ጋላስ ዱገሀ ካውያ ደንዳዳ ሀ የለተ ቦላ ፕርዳና፤ አይስ ጊኮ፥ እያ ሶሎሞነ ጭንጫተ ስአናዉ ቢታ ጋፃፐ ያሱ። ሄኮ፥ ሶሎሞነፐ አይ ሀይሳን ደኤስ።✝

43 "ቱና አያናይ አሳፐ ከይዳፐ ጉየ ባዉ ሸምፕያ በሲ ኮይድ ሃ ባይና መላ በሳን ዳቡሬስ፥ ሽን ባ ኮይያ ሸምፑዋ ደመና። 44 ያንን፥ ‘ታ አጋ ከይዳ ኬ ስማዳ ባና’ ያጌስ። እ ስምያ ዎደ ኬይ ካይስ ግደይሳነ ፕተትድ ጊግድ ኡትዳይሳ ደሜስ። 45 ህዛ፥ ስም ብድ፥ ባፐ ኢትያ ሀራ ላፑን ኢታ አያናታ ኤክድ ዬስ፤ ኤንትካ ኡራ ግዶ ገልድ ደኦሶና። ሄ ኡራስ ካሰይሳፈ ጉየይስ ዳሮ ኢቴስ። ሀ ኢታ የለተ ቦላ ሄሳ መላ ሀናና" ያግስ።

46 የሱሲ ደርያስ ኦዳ ቦላ ደእሽን እያ አያነ እያ እሻት እያ ኦድሳናዉ ኮይድ ካረን ኤቅዶሶና። 47 እስ አስ እያኮ፥ "ነ አያነ ነ እሻት ነና ኦድሳናዉ ኮይድ ካረን ኤቅዶሶና" ያግስ።

48 የሱሲ ዛሪድ፥ "ታ አይያ ኦኔ? ታ እሻትካ ኦናንቴ?" ያግስ። 49 ባ ኩሽያራ ታማረታ ማልሸ፥ "በእተ፥ ታ አያነ ታ እሻት ሀይሳታ። 50 ሳሎን ደእያ ታ አዋ ሸንያ ኦያ ኡባይ ታ እሻ፥ ታ ምቾነ ታ አዮ" ያግስ።