ሆሰ ማፃፋ 5

ጎዳ ፕርዳይ እስራኤለ ቦላ

1 "ህንተኖ ካህነቶ፥ ሀይሳ ስእተ! ህንተኖ እስራኤለ አሳቶ፥ አኬክተ! ካዎ ኬ አሳቶ፥ ሎይ ስእተ! ሀ ፕርዳይ ህንተ ቦላ ፕርደትስ። ህንተ ምፅጳስ ፅሄ ግድደታ፤ ታቦረ ዙማ ቦላ ምጨትዳ ግተዳ ግድደታ። 2 ጌላት ዎ አግቦኮና፤ ሄሳ ግሾ፥ ታ ኤንታ ኡባ ሴራና። 3 ታኒ ኤፍሬማ ኤራይስ፤ እስራኤለይ ታፐ ጌምቤና። ኤፍሬማ፥ ኔኒ ሀእ ላይማ ግዳዳሳ፤ እስራኤለይ ቱንስ።"

4 "እስራኤለ አሳይ ባንታ ፆሳኮ ስሞና መላ ኤንታ ኢታ ኦሶይ ኤንታ ተቅስ። ላይማተ አያን ኤንታ ዎዛናን ደእያ ግሾ ኤንቲ ጎዳ ኤሮኮና። 5 እስራኤለ አሳ ኦቶሮይ ኤንታ ቦላ ማርካቴስ። እስራኤለ አሳይነ ኤፍሬማ አሳይ ባንታ ናጋራ ጋሶን በቶሶና፤ ይሁዳ አሳይካ ኤንታራ በቴስ። 6 ኤንቲ ጎዳስ ያርሻናዉ ባንታ ዶርሳ ዉድያነ መሄ ዉድያ ላግ ኤክድ እያ ኮያናዉ ባና፤ ሽን እ ኤንታፈ ሻከትዳ ግሾ እያ ደሞኮና። 7 ኤንቲ ላይማተን ናይታ የልዳ ግሾ ጎዳስ አማነትቦኮና። ሄሳ ግሾ፥ እስ አጌናን ኤንትነ ኤንታ ቢታይ ያና። 8 ግብአ ካታማን ሞይዘ፥ ራማ ካታማን ዛየ ፑንተ። ብንያመ አሳዉ፥ ‘ጉየ ስሚድ በእተ’ ያግድ ቤት-አዌናን ዋስተ። 9 ሴረትያ ዎደ ኤፍሬም ባይሳ ግዳና። እስራኤለ ኮቻ ግዶን ቱማ ሀናናባ ታኒ አዋጃና።

10 "ጎዳይ፥ ‘ይሁዳ ሀላቃት ዛዋ ሱግያ አሳ መላ ግድዶሶና፤ ታኒ ታ ሀንቁዋ ኤንታ ቦላ ድኦ ሃዳ ጉሳና። 11 ኤፍሬማ አሳይ ኤርድ ኤቃ ጎይንዳ ግሾ፥ ሱረ ፕርዳን ኡንኤትዶሶና፤ ትንቸትዶሶና። 12 ሄሳ ግሾ፥ ታኒ ኤፍሬማ አሳስ ብሌ፥ ይሁዳ አሳስ ፆ ግዳና።

13 " ‘ኤፍሬም ባ ሀርግያ፥ ይሁድ ባ ማዱን በእዳ ዎደ ኤፍሬም አሶረ ቢታ ብስ፤ ሄ ግታ ካዋ ማዶ ኦይችስ። ሽን እ ኤንታ ሀርግያ ላናዉ ዎይኮ ኤንታ ማዱን ፓናዉ ዳንዳእቤና። 14 ሄሳ ግሾ፥ ታኒ ኤፍሬማስ ጋሞዳ ሀናና፤ ይሁዳስ ዎዳላ ጋሞዳ ሀናና። ታኒ ኤንታ መንረዳ ኤካ ባና፤ ኦንካ ኤንታ ታ ኩሸፐ አሸና። 15 ኤንቲ ባንታ ባላ አኬካና ጋካናዉነ ታና ኮያና ጋካናዉ ታኒ ጉየ ታ በሳ ስማና። ኤንቲ ባንታ ዋያን ታና ምንድ ኮያና’ " ያጌስ።