ሆሰ ማፃፋ 9

እስራኤለይ ሴረታና

1 እስራኤለ አሳቶ፥ ኡፋይቶፍተ! ሀራ ካዎታዳ ፖጩ ጎፕተ! ህንተ ህንተ ፆሳፈ ሃክድ ላይማትደታ፤ ካ ጌሽያ ዉዱማን ላይማተስ እምያ ጋትያ ዶስደታ። 2 ሄሳ ግሾ፥ ህንተ ዉዱማፈ ካ፥ ጉምእያ በሳፈ ዎይነ ኡሻ ደመከታ፤ ዎይነይ ህንተዉ አይፈና። 3 ኤንቲ ጎዳ ቢታን ጋምኦኮና። ኤፍሬም ግብፀ ቢታ ስማና፤ አሶረ ቢታን ቱና ካ ማና።

4 ኤንቲ ጎዳስ ዎይነ ኡሻ ያርሾ ጉሶኮና፤ ኤንታ ያርሾይ እያ ኡፋይሰና። ሄ ያርሾይ ኤንታዉ ሾቻ መላ ግዳና፤ ሄሳ ምያ ኡባይ ቱናና። ሄ ካይ ኤንታ ኮሻ ፃላላ ዛራናሳፈ አትሽን፥ ጎዳራ ደእያ እስፈተስ ማደና። 5 ጎዳ ህንተ ቦንቻና መላ እ ህንተዉ እምዳ ባኣለ ጋላሳታን ህንተ አይ ኦኔ? 6 ኤንቲ ዮፐ ከስ ኤክኮካ ግብፀይ ኤንታ ሺሻና፤ መምፕሳ ካታማይ ኤንታ ሞጋና። ኤንቲ ሺሽዳ ብራ ሚሸ ኡባ ሻራፍ ምታና፤ ኤንቲ ደእያ በሳን ቡሎይ ዶላና።

7 ሴራ ጋላስ ይስ፤ ፕርዳ ዎደይ ጋክስ። እስራኤለ አሳይ ሄሳ ኤሮ! ህንተ ናጋራ ግሾነ ሞርከተ ግሾ ናበይ ኤያ መላ ፆሳ አስ ጌተትዳይስ ጎሻ መላ ታይበትስ። 8 ናበይ ፆሳራ ግድድ፥ ኤፍሬማ ናጌስ፤ ሽን እያ ኦግያን ፅሄይ የገትስ፤ ፆሳ ኬን እያ ሞርከተ ናጌስ። 9 ግብአ ካታማን ሀንዳይሳዳ ኤንቲ ቱንዶሶና። ፆሳይ ኤንታ ናቁዋ ሀሳያና፤ ናጋራ ግሾ ኤንታ ሴራና።

10 ጎዳይ፥ "ታኒ መላ ቢታን ዎይነ አይፈ ደምዳይሳዳ እስራኤለ አሳ ደማስ። ታኒ ባላሰ ምን ኮይሮ አይፈ በእዳይሳዳ ህንተ አዋታ በአስ። ሽን ኤንቲ ብኤል-ፋጎራ ጌተትያ በሳ ይድ፥ ዬላይያ ኤቃስ ባንታና ዱማይዶሶና፤ ኤንቲ ሄ ዶስዳ ኤቃዳ ቱንዶሶና። 11 ኤፍሬማ ቦንቾይ ካፎዳ ፓል ያና፤ ህዛፐ ጉየ የሎይ ባዋ፤ ቃንቶይ ባዋ፤ አተ ባዋ። 12 ኤንቲ ናአ የልድ ድችያባ ግድኮካ ታ ኤንታ ዎ ዉርሳና። ታኒ ኤንታፈ ሃክዳ ዎደ ኤንታና አየ! 13 ኤፍሬም ሎኦ በሳን ቶከትዳ ዛምባ ም መላ ሀንን በአስ፥ ሽን ባ ናይታ ሹካስ አ እሚስ" ያግስ።

14 አቤት ጎዳዉ፥ ኤንታዉ እማ! ነ ኤንታዉ አይ እማኔ? ነ ኤንታዉ ቦሸትያ ኡሎነ መልዳ ን እማ።

15 ጎዳይ፥ "ኤንታ ኢታተ ግሾ ታኒ ጋልጋላን እፆ ዶማስ። ኤንታ ናጋራ ግሾ ታኒ ኤንታ ታ ኬፈ ጎዳና፤ ህዛፐ ጉየ ታ ኤንታ ዶስከ፤ ኤንታ ሀላቃት ኡባይ ጌላታ። 16 ኤፍሬም ደሸትን፥ እያ ፃጶይ መልስ፤ አይፈይካ ባዋ። ኤንቲ ናአ የልኮካ ታኒ ኤንቲ ዶስያ ናይታ ዎና" ያግስ።

17 ኤንቲ እያዉ ኪተቶና እፅዳ ግሾ ታ ፆሳይ ኤንታ ፕፅር ሆላና፤ ኤንቲ ካዎተታ ግዶን ቶይላትሸ ዳና።