ሆሰ ማፃፋ 8

እስራኤለይ ጫርኮ ቡጨስ

1 "ሞይዘ ፑና! ኤንቲ ታ ጫቁዋነ ታ ህግያ መንዳ ግሾ፥ ጎዳ አሳ ቦላ ሞርከይ አንኮዳ አለስ። 2 እስራኤለ አሳይ፥ ‘አቤት ኑ ፆሳዉ፥ ኑኒ ነና ኤሮስ’ ያግድ ታኮ ዋሶሶና። 3 ሽን እስራኤለ አሳይ ሎኦባ እፅዳ ግሾ፥ ሞርከይ ኤንታ የደና። 4 ኤንቲ ታና ኦይቾና ባንታዉ ካዎታ ካዎዶሶና፤ ታ ኤሮና ደእሽን ባንታዉ ሀላቃታ ዶርዶሶና። ያናዉ ማችድ ኤቃ ምስለታ ባንታ ብራፐነ ዎርቃፈ መዶሶና። 5 ሳማረ አሳዉ፥ ህንተ ማር ዳንስድ መዳ ኤቃ ታ እፃስ፤ ታ ሀንቆይ ህንተ ቦላ ኤፅስ። ኤንቲ ቱንዳ መላ አዉደ ጋካናዉ ዳኔ? 6 ሀ ማራ ኤቃ ምስለይ ኩሸ ሂላን መትስፐ አትሽን፥ እ ፆሰ ግደና። ሳማረ ኤቃ ምስለይ መቀረታና።

7 "ኤንቲ ጫርኮ ዘርድ ጎተ ቡጮሶና። ኤቆን ደእያ ኤንታ ካስ አይፈይ በንተና፤ ለይካ ባዋ፤ አይፈይ ደእኮካ አላጋት ማና። 8 እስራኤለ አሳይ ሀእ አላጋ አሳ ግዶን ምተትዶሶና፤ ኤንቲ ፓና አስ ግድዶሶና። 9 ኤንቲ ባዞ ሀረይ ባርካ ቶይላተይሳ መላ ቶይላትሸ አሶረ ብዶሶና። ኤፍሬማ አሳይ ባንታ ሚሽያን ላገ ሻምዶሶና። 10 ባንታና ማዳና መላ ሚሸን ሻምኮካ ታ ኤንታ ሺሻና። ካረ ቢታ ካዎትነ ሀላቃት ኤንታና ኡንኤን ኤንቲ ጮ ያና።

11 "ኤፍሬማ አሳይ ናጋራ ያርሾ ያርሽያ ዳሮ በሳታ ኬፅስ፥ ሽን ሄ ያርሾ በሳት ናጋራ ኦያ በሲ ግድዶሶና። 12 ታኒ ኤንታዉ ታ ህግያን ዳሮባ ፃፋስ፥ ሽን ኤንቲ ሄ ህግያ አላጋባዳ ፄልዶሶና። 13 ኤንቲ ያርሻናዉ ዶሶሶና፤ ያርሾ አሹዋ ሞሶና፥ ሽን ጎዳይ ኤንታ ያርሹዋ ኤክቤና። እ ሀእ ኤንታ ናጋራ ሀሳያና፤ ኤንታ ናጋራ ግሾ ኤንታ ሴራና፤ ኤንቲ ግብፀ ቢታ ስማና። 14 እስራኤለ አሳይ ባና መዳይሳ ዶግድ፥ ካዎ ጋታ ኬፅስ። ይሁዳ አሳይ ግምበትዳ ዳሮ ካታማታ ኬፅስ። ሽን ታኒ ሄ ካታማታን ታማ የድን፥ ኤንታ ሚፃ ማና" ያጌስ።