Mateus 2

ዶሎሀፐ ይዳ አሳታ

1 ካዋ ሄሮዲሳ ዎደን የሱሲ ይሁዳ ቢታን ቤተለመ ካታማን የለትዳፐ ጉየ ፆልንቶ ታይብያ አሳት ዶሎሀፐ የሩሳላመ ይድ፥ 2 "የለትዳ አይሁደ ካዎይ አዉን ደኢ? ኑኒ ዶሎሀ ባጋራ ከይዳ እያ ፆልንቱዋ በእድ እያዉ ጎይናናዉ ይዳ" ያግድ ኦይችዶሶና። 3 ካዎይ ሄሮዲስ ሄሳ ስእዳ ዎደ ዳጋምስ። የሩሳላመን ደእያ አሳ ኡባይካ ዳጋምዶሶና። 4 ሄሮዲስ ካህነ ሀላቃታነ ህገ አስታማረታ ባኮ ፄግድ፥ "ክርስቶስ አዉን የለታንደሻ?" ያግድ ኤንታ ኦይችስ።

5 ኤንትካ፥ "ይሁዳ ቤተለመና፤ ናበይ፥

6 ‘ይሁዳን ደእያ ቤተለመ፥✝2:6 ምክ 5:2.

ይሁዳን ደእያ ጎባ ካታማታፐ፥

ኔኒ አይብንካ ጉፃካ።

ታ ደርያ እስራኤለ አይሳናይስ፥

ኔፐ ከያና’ ግድ ፃፍስ"

ያግዶሶና።

7 ሄሳፈ ጉየ፥ ሄሮዲስ ዶሎሀፐ ይዳ አሳታ ጌማን ፄግድ፥ ፆልንቱዋ ኤንቲ በእዳ ዎድያ ኤንታፈ ጌሽድ ኤርስ። 8 እ ኤንታና ቤተለመ የድሸ፥ "ብድ የለትዳ ናኣ ምንድ ኮይተ፤ እያ ህንተ ደምዳ ዎደ ታካ ባዳ እያዉ ጎይናና መላ ስሚድ ይሸ ታዉ ኦድተ" ያግስ። 9 ኤንትካ ካዎይ ሄሮዲስ ግዳይሳ ስእድ ብዶሶና። ኤንቲ ዶሎሀ ባጋራ በእዳ ፆልንቶይ ኤንታና ካለሸ ናአይ ደእያሱዋ ጋካናዉ ኤፍስ። 10 ኤንቲ ሄ ፆልንቱዋ በእዳ ዎደ ግታ ኡፋይስ ኡፋይትዶሶና። 11 ሶ ገልድ ናኣ ባ አየ ማይራምራ ደኤይሳ በእዶሶና። እያዉ ጉልባትድ ጎይንዶሶና። ባንታ ሳፅንያ ዶይድ ዎርቃ፥ እፃነነ ካርበ እያዉ እምዶሶና። 12 ኤንቲ ሄሮዲሳኮ ጉየ ስሞና መላ ፆሳይ አሙሆን ኤንታዉ ኦድን፥ ሀራ ኦገራ ባንታ ቢታ ስምዶሶና።

ግብፀ ባቃቶ

13 ዶሎሀ ባጋፈ ይዳ አሳት ብዳፐ ጉየ፥ ጎዳ ኪታንቾይ ዮሰፋስ አሙሆን ቆንጭድ፥ "ሄሮዲስ ናኣ ዎናዉ ኮይያ ግሾ ደንዳ፤ ኤለሳዳ ናኣነ ናኣ አይዉ ኤካዳ ግብፀ ቢታ ባ። ነ ስማና ዎድያ ታ ነዉ ኦዳና ጋካናዉ ያን ጋምአ" ያግስ።

14 ሄሳ ግሾ፥ ዮሰፍ ሄ ቃማን ደንድድ፥ ናኣነ ናኣ አይዉ ኤክድ ግብፀ ብስ። 15 ናብያ ዶናን ፆሳይ፥ "ታኒ፥ ታ ናኣ፥ ግብፀ ቢታፈ ፄጋስ"✝2:15 ሆሰ 11:1. ጌተትዳ ቃላይ ፖለታና መላ ሄሮዲስ ሀይቃና ጋካናዉ እ ያን ደእስ።

16 ሄሳፈ ጉየ፥ ዶሎሀ ባጋፈ ይዳ አሳት እያ ጭምዳይሳ ኤርዳ ዎደ ዳሮ ይሎትስ። እ ካሰ ኤንታፈ ስእዳይሳዳ ቤተለመንነ ሄ ሄራን ደእያ ናምኡ ላይ ኩምዳይሳታነ ናምኡ ላይፈ ጋርሳን ደእያ አደ ናይታ ኡባ ባ ዎታዳረታ የድድ ዎስስ።

17,18 ናብያ ኤርምያሳ ዶናን፥

"ዬሆይነ ዘለልስ፥

ራማ ካታማን ስኤትስ።

ራሄላ ባ ናይታስ ዬካዉሱ፤

ኤንቲ ሀይቅዳ ግሾ

ምነታናዉ ዳንዳአቡኩ"

ግድ ኦድዳይስ ፖለትስ።✝2:17-18 ኤርም 31:15.

ናዝረተ ስሙዋ

19 ሄሮዲስ ሀይቅዳፐ ጉየ ግብፀን ጎዳ ኪታንቾይ ዮሰፋስ አሙሆን ቆንጭድ፥ 20 "ናኣ ዎናዉ ኮይያ አሳት ሀይቅዳ ግሾ፥ ደንዳዳ ናኣነ ናኣ አይዉ ኤካዳ እስራኤለ ቢታ ስማ" ያግስ።

21 ዮሰፍ ደንድድ ናኣነ ናኣ አይዉ ኤክድ እስራኤለ ቢታ ስምስ። 22 ሽን አርከልዮስ ይሁዳን ባ አዋ ሄሮዲሳ በሳን ካዎትዳይሳ ስእዳ ዎደ ያ ባናዉ ያይስ። ፆሳይ አሙሆን እያዉ ቆንጭስን ጋልላ ቢታ ብስ። 23 ናበታ ዶናን፥ "ናዝረተ አስ ጌተታና" ግድ ኦደትዳይስ ፖለታና መላ ናዝረተ ካታማ ብድ ያን ደእስ።✝2:23 ማር 1:24፤ ሉቃ 2:39፤ ዮሀ 1:45.