Mateus 23

ህገ አስታማረታነ ፋርሳወታ አየ!

1 ሄሳፈ ጉየ፥ የሱሲ ሺቅዳ አሳስነ ባ ታማረታስ ሀይሳዳ ያግስ። 2 "ህገ አስታማረትነ ፋርሳወት ሙሰ ህግያ ብላናዉ ማታራ ደኦሶና። 3 ሄሳ ግሾ፥ ኤንቲ ህንተና ኪትያ ኡባ ኦተነ ናግተ። ሽን ኤንቲ ኦይሳዳ ኦፍተ። አይስ ጊኮ፥ ኤንቲ ኦደይሳዳ ኦኮና። 4 ኤንቲ ቶካናዉ ዳንዳኤቶና ቶሆ ቃችድ አሳ ቶሶሶና። ሽን ባንታዉ ሀር አቶሽን፥ ሄ ቶሁዋ አሳይ ቶክያ ዎደ ብራ ፄራን ቦቻናዉ ኮዮኮና።

5 "ሽን ኤንቲ ባንታ ኦሶ ኡባ አስ በኦና መላ ኦሶና። ባንታ ሶምኦንነ ቀሰን ቃችያ ማፃፋ ፅቅሰይ ደእያ ክታፈ ዳልግሶሶና፥ ባንታ ማኡዋ ማጫራ አዱሶሶና።*23:5 ሶምኦንነ ቀሰን ቃችያ ማፃፋ፥ ማኡዋ ማጫራ አዱሶሶና፦ ሄሳ ኤንቲ ኦይ ታኒ ፆሳስ እመታስ ግያ ማላ በሳናሳ (ዛረ 15:37-41)።✝23:5 ማቶ 6:1፤ ዛረ 6:8፤ ታይቦ 15:38. 6 ሞከትያ በሳን ቦንቾ በስነ አይሁደ ዎሳ ኬታን ዳሮ ሎእያ ኦይደ ዶሶሶና። 7 አሳይ ግያን ኤንታና ቦንቾን ሳሮናይሳነ ‘አስታማርያዉ’ ግድ ፄጋናይሳ ኮዮሶና።

8 "ሽን ህንተ አስታማረይ እሱዋ ፃላላ ግድዳ ግሾነ ህንተ ኡባይ እሻታ ግድዳ ግሾ፥ ‘አስታማርያዉ’ ጌተትድ ፄገቶፍተ። 9 ህንተዉ ሳሎን እስ አዋ ፃላል ደእያ ግሾ፥ ሀ ሳአን ኦናካ ‘አዋዉ’ ግድ ፄጎፕተ። 10 ህንተዉ እስ ጎዳይ ክርስቶሳ ፃላል ደእያ ግሾ ‘ጎዳዉ’ ጌተትድ ፄገቶፍተ። 11 ህንተ ግዶን ባይራተይ ህንተ አይለ ግዶ።✝23:11 ማቶ 20:26. 12 ባና ግታያ ኦንካ ካዉያና፤ ባና ካዉሽያ ኦንካ ግታታና።✝23:12 ሉቃ 14:11፤ 18:14.

ህገ አስታማረትነ ፋርሳወት ቦረትዶሶና

13 "ህንተኖ፥ ጩቦቶ፥ ህገ አስታማረቶነ ፋርሳወቶ፥ አሳ ስንን ሳሎ ካዎተ ጎርደይሳቶ ህንተና አየ! ህንተ፥ ህንተ ሁጰን ገለከታ ቃስ ሀራታካ ገልሰከታ።

14 ["ህንተኖ ጩቦቶ፥ ህገ አስታማረቶነ፥ ፋርሳወቶ፥ አምኤታ ኬ ህንተ ቦንቅሸ፥ አስ በኦ ግድ ዎሳ አዱሰታ። ሄሳ ግሾ፥ ህንተና አየ! ኡባፈ አያ ፕርዳይ ህንተና ናጌስ።]*23:14 እስ እስ በን ማፃፋት ፓይዶ 14 ጉጆሶና።

15 "ህንተኖ፥ ጩቦቶ፥ ህገ አስታማረቶነ ፋርሳወቶ፥ ህንተ እስ ኡራ አማንናዉ አባራነ ሳአራ ዩየታ። ሽን ህንተ እያ አማንዳ ዎደ ሄ ኡራ ህንተፈ አድ ጋናመስ ጊገትዳይሳ ኦያ ግሾ፥ ህንተና አየ!

16 "ኦንካ ፆሳ ኬን ጫቅኮ አይኮይካ ባዋ። ሽን ፆሳ ኬን ደእያ ዎርቃን ጫቅኮ፥ ሄ ጫቆይ እያ ጎማና ግያ ቆቀቶ፥ ህንተዉ ቆቅድ ሀራታ ካለይሳቶ፥ ህንተና አየ! 17 ህንተኖ፥ ኤያቶ፥ ቆቀቶ፥ ዎርቃይ አዬ? ዎርቅያ ፆሳስ ዱማያ ፆሳ ኬይ አ? 18 ቃስ ‘ኦንካ ያርሾ በሳን ጫቅኮ፥ አይኮይካ ባዋ። ሽን ኦንካ እያ ቦላ ደእያ ያርሹዋን ጫቅኮ፥ ሄ ጫቆይ እያ ጎማና’ ያግድ ታማርሴታ። 19 ህንተኖ፥ ቆቀቶ፥ ያርሾይ አዬ? ያርሹዋ ፆሳስ ዱማያ በሳይ አ? 20 ሄሳ ግሾ፥ ያርሾ በሳን ጫቅያ ኡራይ፥ ሄ ያርሾ በሳንነ እያ ቦላ ደእያ ኡባባን ጫቄስ። 21 ፆሳ ኬን ጫቅያ ኡራይ፥ ሄ ፆሳ ኬንነ እያን ደእያ ፆሳን ጫቄስ። 22 ሳሎን ጫቅያ ኡራይ ፆሳ አራታንነ ሄ አራታ ቦላ ኡትያ ፆሳን ጫቄስ።✝23:22 እሳ 66:1፤ ማቶ 5:34.

23 "ህንተኖ፥ ጩቦቶ፥ ህገ አስታማረቶነ ፋርሳወቶ፥ ህንተና አየ! ህንተ ካሬ ሳዎፐ፥ ናትሮፐነ ኦካሸፐ አስራታ ከሴታ። ሽን ህገን ደእያ አድ ኮሸይሳታ አግደታ። ሄስካ፥ ሱረ ፕርዳ፥ ቃተነ ኡባባን አማነተ። ሀራታካ አጎናሽን ሀይሳታ ህንተ ኦናዉ በሴስ።✝23:23 ሌወ 27:30. 24 ህንተዉ ቆቅድ ሀራ አስ ካለይሳቶ፥ ህንተ ኡሻፈ ኡዱንፀ ከስድ ግማለ ምቴታ።

25 "ህንተኖ፥ ጩቦቶ፥ ህገ አስታማረቶነ ፋርሳወቶ፥ ህንተና አየ! ህንተ ሻትያስነ ከርያስ ቦላ ባጋ ጌሼታ። ሽን ኤንታዉ ጋርሳን ቦንቀይነ ኡዘተ ኩም ኡትስ። 26 ነኖ ቆቀ ፋርሳውያዉ፥ ሻትያስነ ከርያስ ጋርሳ ካሰታዳ ጌሻ። ሄሳፈ ጉየ፥ ቦላ ባጋይካ ጌሽ ግዳና።

27 "ህንተኖ፥ ጩቦቶ፥ ህገ አስታማረቶነ ፋርሳወቶ፥ ህንተና አየ! ካረ ባጋራ ቃላመ ትየትድ ሎእድ፥ ግዶን መቀነ ዎቅዳባይ ኩምዳ ዱፎታ ዳነታ።✝23:27 ሀዋ 23:3. 28 ሄሳዳካ፥ ቦላ ባጋራ አሳስ ሎኦ ዳነታ። ሽን ህንተ ጋርሳን ጩቦተነ ኢታተ ኩምስ።

29 "ህንተኖ፥ ጩቦቶ፥ ህገ አስታማረቶነ ፋርሳወቶ፥ ህንተና አየ! ህንተ ናበታስ ዱፎ ኬፀታ፥ ቃስ ፅሎታ ዱፉዋካ ሎይታ። 30 ቃስ ህንተ፥ ‘ኑኒ በን ኑ አዋታ ዎደ ደእዳባ ግድያኮ፥ ኤንታራ እስፈ ናበታ ሱ ጉሶኮሽን’ ያጌታ። 31 ሄሳ ግሾ፥ ህንተ ናበታ ዎዳ አሳ ናይታ ግደይሳ ህንተ ህንተ ሁጰን ማርካቴታ። 32 ህዛ፥ ህንተ አዋት ዶምዳይሳ ህንተ ፖልተ።

33 "ሀ ሾሻቶ፥ ሾሻ ናይቶ፥ ህንተ ጋናመ ፕርዳፈ ዋንድ አታኔ?✝23:33 ማቶ 3:7፤ 12:34፤ ሉቃ 3:7. 34 ሄሳ ግሾ፥ ሄኮ፥ ታኒ ናበታ፥ ጭንጫ አሳታነ አስታማረታ ህንተኮ ኪታና። ኤንታፈ እሶታ እሶታ ህንተ ዎናነ ማስቃላ ቦላ ካቃና። ባጋታ አይሁደ ዎሳ ኬታን ልሶን ጋራፋናነ ካታማፐ ካታማ ጎዳና። 35 ሄሳ ግሾ፥ ፅሉዋ አበላ ዎዳ ዎደፐ ዶምድ፥ ፆሳ ኬስነ ያርሾ በሳፈ ግዶን ህንተ ዎዳ ባራካ ናአ ዛካርያሳ ዎደ ጋካናዉ ሀይቅዳ ፅሎ አሳ ኡባ ግሾ፥ ህንተ ሴረታና።✝23:35 መ 4:8፤ 2 ታር 24:20. 36 ታኒ ህንተዉ ቱማ ኦዳይስ፤ ህንተነ ህንተ አዋት ኦዳ ናጋራስ ሀ ፕርዳ ኡባይ ሀ የለተ ቦላ ጋካና።

የሱሲ የሩሳላመስ ዬክስ

37 "የሩሳላመ፥ የሩሳላመ፥ ናበታ ዎያረ! ፆሳይ ኔኮ ኪትዳይሳታ ሹቻን ጫድያረ! ኩቶይ ባ ናይታ ባ ቀፈን ሀጰይሳዳ ታኒ ነ አሳ ታ ቀስያን ገቻናዉ አፑን ቶሆ ኮያድና! ሽን ታና ድጋዳሳ። 38 ህዛ፥ ሄኮ፥ ህንተ ኬይ ካይስ ግዳና።✝23:38 ኤርም 22:5. 39 ታኒ ህንተዉ ኦዳይስ፤ ‘ጎዳ ሱንን የይስ አንጀትዳይሳ’ ህንተ ጋና ጋካናዉ ናምአን ታና በኤከታ" ያግስ።✝23:39 ማዝ 118:26.