1 ዎንታ ጉራ ካህነ ሀላቃትነ ቢታ ጭማት ኡባይ የሱሳ ዎሳናዉ ማቀትዶሶና። 2 ኤንቲ የሱሳ ቃች ኤፍድ ደርያ ሃርያ ጵላፆሳስ አድ እምዶሶና።

3 ሄ ዎደ የሱሳ ኦይዳ ይሁድ፥ ጵላፆስ የሱሳ ቦላ ፕርድዳይሳ በእድ፥ ቂሮትድ፥ ሄ ሀስታሙ ብራ ሳንትመ ካህነ ሀላቃታስነ ደርያ ጭማታስ ጉየ ዛርስ።✝ 4 "ታኒ ፅሎ አስ ሀይቆስ አ እማዳ ናጋራ ኦስ" ያግስ።

ሽን ኤንቲ፥ "ሄስ ኑ መቶ ግደና ነ መቶ" ያግዶሶና።

5 ይሁድ ሚሽያ ፆሳ ኬን የግ አግድ ኤንታ ማታፐ ብድ፥ ሱለትድ ሀይቅስ።

6 ካህነ ሀላቃት ሚሽያ ኤክድ፥ "ሀ ሚሸይ ሱ ሚሸ ግድያ ግሾ፥ ኑኒ ፆሳ ኬ ሚሽያራ ጋይስ ዎጋ ግደና" ያግዶሶና። 7 ሄሳፈ ጉየ፥ እስፈ ዞረትድ፥ በተ አስ ሞጋናዉ ማና ቢታ ሻምዶሶና። 8 ሄሳ ግሾ፥ ሄ ጋደይ ሀች ጋካናዉ ሱ ቢታ ጌተትድ ፄገቴስ።

9 ናብያ ኤርምያስ፥ "እስራኤለ አሳይ እያዉ ቃንፃናዉ ጋማትዳ ሀስታሙ ብራ ሳንትመ ኤክዶሶና።✝ 10 ጎዳይ ታና ኪትዳይሳዳ ማና ቢታ ሻማናዉ እምዶሶና" ግዳይስ ሄ ዎደ ፖለትስ።

11 የሱሲ ደርያ ሃርያ ጵላፆሳ ስን ሺቅን፥ ጵላፆስ እያኮ፥ "ኔኒ አይሁደ ካዎ?" ያግድ ኦይችስ።

የሱሲ ዛሪድ፥ "ነ ጋዳሳ" ያግስ።

12 ካህነ ሀላቃትነ ቢታ ጭማት እያ ሞትያ ዎደ ኤንታዉ አይብ ዛሮካ እምቤና።

13 ሄ ዎደ ጵላፆስ የሱሳኮ፥ "ሀይሳቲ ነና ሞትያ ሞቱዋ ኡባ ስእኪ?" ያግስ።

14 የሱሲ ሀር አቶሽን፥ እስ ቃላካ ዛሮና እፅን፥ ደርያ ሃረይስ ዳሮ ማላለትስ።

15 ደርያ ሃረይስ ላይን ላይን ፓስካ ባኣለ ቦንችያ ጋላሳን፥ አሳይ ኮይያ እስ አስ ቃሾፐ ብርሽያ ዎግ ደኤስ። 16 ሄ ዎደ እስ ባርባና የሱሳ ጌተትያ ዳሮ ኤረትዳ ኢታ አስ ቃሾ ኬን ደኤስ። 17 ሄሳ ግሾ፥ ዳሮ አሳይ ሺቅድ ደእሽን ጵላፆስ፥ "ታኒ ህንተዉ ባርባና ብሎየ ዎይኮ የሱሳ ጌተትያ ክርስቶሳ ብሎ?" ያግድ አሳ ኦይችስ። 18 እ ሄሳ ግዳይ ኤንቲ ቃናትድ የሱሳ ኦይዳይሳ ኤርያ ግሾሳ።

19 ጵላፆስ ፕርዳ ኬን ኡትዳሽን፥ እያ ማችያ፥ "ታኒ ሀች ቃማ አሙሆን እያባ ዳሮ ዋየታሸ አቅዳ ግሾ፥ ሄ ፅሎ ኡራ ቦላ አይብባካ ኦፋ" ያጋዳ ኪታሱ።

20 ሄ ዎደ ካህነ ሀላቃት፥ "ባርባን ብለቶ፥ የሱሲ ሀይቆ" ግድ ጵላፆሳ ዎሳና መላ አሳ ጭምዶሶና።

21 ጵላፆስ ዛሪድ፥ "ታኒ ኤንታ ናምኣፈ ህንተዉ ኦና ብላና መላ ኮዬቲ?" ያግድ ኦይችስ።

ኤንቲ፥ "ባርባና ብላና መላ ኮዮስ" ያግዶሶና።

22 ጵላፆስ፥ "ያትን፥ የሱሳ ጌተትያ ክርስቶሳ ዋቶ?" ያግድ ኤንታ ኦይችስ።

ኡባይ ዛሪድ፥ "ማስቃልያ ቦላ እያ ካቃ" ያግዶሶና።

23 ጵላፆስ አሳኮ፥ "አይስ? እ አይ ኢታባ ኦዴ?" ያግድ ኦይችስ።

ሽን አሳይ ካሰይሳፈ አድ፥ "ማስቃልያ ቦላ እያ ካቃ" ግድ ዋስዶሶና።

24 ኦሽ ደንፈ ሀራ አይብባካ ኦናዉ ዳንዳኤቶናይሳ ጵላፆስ በእድ፥ ሃ ኤክድ፥ "ሀ ኡራ ሀይቁዋን ታኒ ደእከ። ሄሳ ኦይ ህንተና" ያግድ አሳ ስንን ባ ኩሽያ ሜጨትስ።✝

25 አሳ ኡባይ ዛሪድ፥ "እያ ሱ ጎመይ ኑናነ ኑ ናይታ ጋኮ" ያግዶሶና።

26 ያትን፥ ጵላፆስ ባርባና ኤንታዉ ብልድ፥ የሱሳ ልሶን ጋራፍድ፥ ማስቃልያ ቦላ ካቀትድ ሀይቃና መላ ኤንታዉ አድ እሚስ።

27 ሄሳፈ ጉየ፥ ጵላፆሳ ዎታዳረት የሱሳ ደርያ ሃረይሳ ሶ ኤክ ኤፍን፥ ዎታዳረት ኡባይ እያ ዩሹዋን ኤቅዶሶና። 28 እያ አፍላ ቃር ኤክድ ዞኦ አፍላ* ማይዝዶሶና። 29 ቃስ አጉን ካላቻ ጊግስድ፥ እያ ሁጰን ዎዶሶና። እያ ኡሻቻ ኩሽያን ማይረ ፃምአ ኦይድ፥ እያ ስንን ጉልባትድ፥ "አይሁደ ካዋዉ፥ ሙኩሉ ላይ ካዎታ!" ያግድ፥ እያ ቦላ ቀልቅስዶሶና። 30 እያ ቦላ ጩትዶሶና። ሄ ማይረ ፃምኣ ኤክድ፥ እያ ሁጰን ሾጭዶሶና። 31 ኤንቲ እያ ቦላ ቀልቅስዳፐ ጉየ፥ ዞኦ አፍላ እያፐ ቃር ኤክድ፥ እያ አፍላ እያ ማይዝዶሶና። ማስቃልያ ቦላ እያ ካቃናዉ ኤክ ኤፍዶሶና።

32 ኤንቲ ካረ ከይድ፥ እስ ስሞና ጌተትያ ቀሬና ቢታ አስ ደምድ፥ የሱሳ ማስቃልያ ዎልቃን ቶስዶሶና። 33 ጎልጎታ ጌተትያ በሲ ጋክዶሶና። "ጎልጎታ" ጉሳይ "ጉገ በሲ" ጉሱ። 34 ሄሳን ኤንቲ ጪየ ዋላከትዳ ዎይነ ኡሻ ኡዮ ግድ እያዉ እምዶሶና። ሽን እ ሄሳ ጋንፅ ኤክድ፥ ኡዮና እፅስ።✝

35 ኤንቲ ማስቃልያ ቦላ እያ ካቅዳይሳፈ ጉየ፥ እያ አፍላ ሻክድ፥ ሳማ የግድ ኤክዶሶና።✝ 36 ሄሳፈ ጉየ፥ ያን ኡትድ እያ ናግዶሶና። 37 ቃስ፥ "ሀይስ አይሁደ ካዋ የሱሳ" ግያ ሞቶ ፁፍያ እያ ሁጰ ሶን ዎዶሶና። 38 የሱሳራ ሄ ዎደ ናምኡ ፓንጋታ እሱዋ እያፐ ኡሻቻ ባጋን፥ ሀንኩዋ እያፐ ሀድርሳ ባጋራ፥ ማስቃልያ ቦላ ካቅዶሶና።

39 ኦግያራ አያ አሳይ የሱሳ ቦርድ፥ እያ ቦላ ጩትሸ፥✝ 40 "ፆሳ ኬ ላላዳ ሄ ጋላሳ ግዶን ኬፀይሶ፥ ነና አሻ። ኔኒ ፆሳ ናአ ግድኮ፥ አነ ማስቃልያ ቦላፈ ዎ" ያግዶሶና።✝

41 ሄሳዳካ፥ ካህነ ሀላቃት፥ ህገ አስታማረትነ ቢታ ጭማት እስፈ የሱሳ ቦላ ቀልቅስዶሶና። ሀይሳዳ ያግዶሶና፦ 42 "ሀራታ አሽስ፥ ሽን ባና አሻናዉ ዳንዳእቤና። እ እስራኤለ ካዎ ግድኮ፥ አነ ማስቃልያ ቦላፈ ሀእ ዎ፥ ኑካ እያ አማናና። 43 ፆሳን እ አማነቴስ፥ ፆሳይ እያ አሻናዉ ኮይኮ አነ አሾ። አይስ ጊኮ፥ እ ባና፥ ‘ታኒ ፆሳ ናአ’ ጌስ" ያግዶሶና።✝

44 ቃስ ሀር አቶሽን፥ እያራ ማስቃልያ ቦላ ካቀትዳ ፓንጋትካ ሄሳዳ ግድ እያ ቦላ ቀልቅስዶሶና።

45 ኡሱፑን ሳተፐ ብድ፥ ኡዱፉን ሳተ ጋካናዉ ቢታ ኡባይ ምስ። 46 ኡዱፉን ሳተ ግድያ ዎደ የሱሲ፥ "ኤሎሄ፥ ኤሎሄ፥ ላማ ሳባቅታኒ?" ግድ ግታ ዋሶ ዋስስ። "ኤሎሄ፥ ኤሎሄ፥ ላማ ሳባቅታኒ?" ገይሳ ብርሸይ "ታ ፆሳዉ፥ ታ ፆሳዉ፥ ታና አይስ አጋዲ?" ጉሱ።✝

47 ሄሳን ኤቅዳ አሳፐ እሶት እሶት ሄሳ ስእድ፥ "ሀ ኡራይ ኤልያሳ ፄጌስ" ያግዶሶና። 48 ኢራ ኤንታፈ እሶይ ዎፅ ብድ፥ እስፖንጀ ኤክድ፥ ጫላ ዎይነ ኡሻ ኩንስ። ሄሳ ማይረ ፃምአ ፄራን ዎድ ኡሻናዉ እያ ዶናኮ ሺሽስ።✝ 49 ሽን ሀንኮት፥ "ናጋ፥ ኤልያስ እያ አሻናዉ ያነኮ አነ በኦስ" ያግዶሶና። 50 የሱሲ ናምአን ግታ ዋሶ ዋስድ፥ ሀይቅ አግስ።

51 ሄ ሳተን ፆሳ ኬን ካቀትዳ ማጋራጆይ ቆሞፈ ዱገ ጋካናዉ ናምኡ ከይድ፥ ፔት ዎስ። ቢታይ ቃፅስ፥ ዛላይካ ጳልቀትስ።✝ 52 ዱፎት ዶየትን ፆሳ አሳታፐ ዳሮት ሀይቆፐ ደንድዶሶና። 53 ኤንቲ ዱፎፐ ከይድ፥ የሱሲ ሀይቆፐ ደንድዳፐ ጉየ፥ ጌሻ ካታማ ብዶሶና፤ ያን ኤንቲ ዳሮ አሳስ በንትዶሶና።

54 ማቶ ሀላቃይነ እያራ የሱሳ ናግያ ዎታዳረት ቢታይ ቃፅዳይሳነ ሄሳን ሀንዳባ በእዳ ዎደ ዳሮ ያይድ "ቱማ ሀይስ ፆሳ ናኣ" ያግዶሶና።

55 ሄሳን ዳሮ ማጫሳት፥ ጋልላፐ ዶምድ የሱሳ ሀጋዝሸ ካልዳይሳት ሃሆን ኤቅድ ፄሎሶና።✝ 56 ኤንታ ግዶን ማግደላ ማይራማ፥* ያይቆባነ ዮሰፋ አይያ ማይራማነ ዛብድዮሳ ማችያ ደኦሶና።

57 ሳአይ ኦማርስያ ዎደ ዮሰፋ ጌተትያ እስ ዱረ አደይ፥ አርማተ ካታማፐ ይስ። እ ባ ሁጰንካ የሱሳ ካልያ አስ። 58 ዮሰፍ ጵላፆሳኮ ብድ፥ የሱሳ አሀ ኤካናዉ ዎስስ። ጵላፆስ አሀይ ዮሰፋስ እመታና መላ ኪትስ። 59 የሱሳ አሀ ኤክድ፥ ጌሻ ሞጎ አፍላን ፃፅስ። 60 ባዉ ሞገታናዉ ሹቻፈ ዎጭዳ ኦራ ጎንጎሎን እያ አሀ ዎስ። ቃስ ሄ ጎንጎሉዋ ዶናን ግታ ሹቻ ጎንዶርስ ዎድ፥ አግድ ብስ። 61 ማግደላ ማይራማነ ሀንኮ ማይራማ ሄ ጎንጎሉዋኮ ስሚድ ኡትዶሶና።

62 ዎንተ ሳምባታ ጋላስ፥ ካህነ ሀላቃትነ ፋርሳወት ጵላፆሳኮ ይድ፥ ሀይሳዳ ያግዶሶና፦ 63 "ጎዳዉ፥ ሀ ዎርዳንቾይ ፓፃ ደእሸ፥ ‘ታኒ ሄ ጋላሳፐ ጉየ፥ ሀይቆፐ ደንዳና’ ያግዳይስ ኑስ ሀሳየትስ።✝ 64 ሄሳ ግሾ፥ እ ሞገትዳ ጎንጎሉዋ ሄ ጋላስ ጋካናዉ፥ ምን ናጋና መላ ኪታርክ። ሄስ ሀኖና እፅኮ፥ እያ ታማረት ብድ እያ አሀ ካይስ ይስድ፥ ‘ሀይቆፐ ደንድስ’ ያግድ አሳስ ኦድኮ ናምአን ባለሶይ ኮይሮይሳፈ ኡባ ሃ ኢታና" ያግዶሶና።

65 ጵላፆስ ኤንታኮ፥ "ህንተዉ ናገይሳት ደኦሶና፤ ብድ ህንተዉ ዳንዳኤትዳ መላ ናግስተ" ያግስ።

66 ሄሳ ግሾ፥ ኤንቲ ብድ ዱፎይ ቦሸቶና መላ ሹቻ ቦላ ማታመ ዎድ ዎታዳረታን ናግስዶሶና።