1 ሳምባት አን፥ ዎጋ ዎደ ዎንታ ጉራ፥ ማግደላ ማይራማነ ሀንኮ ማይራማ የሱሲ ሞገትዳ ጎንጎሉዋ በአናዉ ብዶሶና። 2 ቆፖና ዎልቃማ ቢታ ቃፆይ ሀንስ። ጎዳ ኪታንቾይ ሳሎፐ ዎድ ዱፉዋ ዶናን ደእያ ሹቻ ጎንዶርስድ እያ ቦላ ኡትስ። 3 እያ ማላይ ዎልአን ዳኔስ። እያ ማኦይካ ሻቻዳ ቦ። 4 ናገይሳት ኪታንቹዋ በእድ፥ ያሻን ኮኮርድ፥ ሀይቅዳ አሳዳ ሀንዶሶና።

5 ኪታንቾይ ማጫሳታኮ፥ "ህንተ ማስቃልያ ቦላ ካቀትዳ የሱሳ ኮየይሳ ታኒ ኤርያ ግሾ፥ ያዮፍተ። 6 እ ካሰ ኦድዳይሳ መላ ሀይቆፐ ደንድስ፤ ሀይሳን ዴና። ሃ ይድ እያ ዝንእስዳ በሳ በእተ። 7 ህንተ ሀእ ኤለስ ብድ፥ እያ ታማረታስ፥ ‘የሱሲ ሀይቆፐ ደንድስ። ቃስ እ ህንተፈ ስንትድ ጋልላ ባና፤ ህንተ እያ ያን በአና’ ያግድ ኦድተ። ታኒ ህንተዉ ሀይሳ ኦዳናዉ ያስ" ያግስ።

8 ኤንቲ ያይሸነ ዳሮ ኡፋይትሸ፥ ዱፉዋ ማታፐ ኤለስድ ብድ፥ እያ ታማረታስ ኦዳናዉ ዎፅዶሶና።

9 ቆፖና የሱሲ ኤንታራ ጋሄትድ ኤንታኮ፥ "ሳሮይ ህንተዉ ግዶ" ያግስ። ኤንቲ እያኮ ሺቅድ፥ እያ ቶሁዋ ኦይክድ እያዉ ጎይንዶሶና። 10 ሄ ዎደ የሱሲ ኤንታኮ፥ "ያዮፍተ፤ ብድ ታ ታማረት ጋልላ ባና መላ ኤንታዉ ኦድተ። ኤንቲ ያን ታና በአና" ያግስ።

11 ሄ ማጫሳት ብሽን፥ ዱፉዋ ናግያ ዎታዳረታፐ ባጋት ካታማ ብድ፥ ሀንዳባ ኡባ ካህነ ሀላቃታስ ኦድዶሶና። 12 ካህነ ሀላቃትነ ጭማት ሺቅድ ዞረትድ፥ ዎታዳረታስ ዳሮ ሚሸ እምድ፥ 13 " ‘ኑኒ ስክዳሽን እያ ታማረት ቃማ ይድ፥ እያ አሀ ካይስዶሶና’ ያግተ። 14 ሀ ኦዳ ደርያ ሃረይስ ስእኮ፥ ሄስ ህንተ ባላ ግዶናይሳ ኑኒ እያ ኦድ አማንና። ህንተና አይብካ ህርግሶፖ" ያግዶሶና።

15 ዎታዳረት ሚሽያ ኤክድ፥ ኪተትዳይሳዳ ኦዶሶና። ሀ ኦዳይ አይሁደ ማታን ሀች ጋካናዉ ኦደትሸ ደኤስ።

16 ታማነ እስ እያ ታማረት የሱሲ ባንታና ቢተ ግዳ ጋልላ ዙማ ቦላ ከይዶሶና።✝ 17 ያን ኤንቲ እያ በእዳ ዎደ እያዉ ጎይንዶሶና፥ ሽን ኤንታፈ እሶት እሶት ስዶሶና።

18 የሱሲ ኤንታኮ ሺቅድ፥ "ሳሎንነ ሳአን ማት ኡባይ ታዉ እመትስ። 19 ህዛ፥ ህንተ ኡባ በሲ ብድ፥ አዋ፥ ናኣ፥ ጌሻ አያና ሱንን አሰ ኡባ ፃማቅድ ታና ካለይሳታ ኦተ።✝ 20 ታኒ ህንተና ኪትዳባ ኡባ ኤንቲ ናጋና መላ ኤንታ ታማርስተ። ታኒ ዎድያ ዉርሰ ጋካናዉ ኡባ ዎደ ህንተራ ደአይስ" ያግስ።