ታይቦ ማፃፋ 28

ጋላሳ ያርሹዋ

1 ጎዳይ ሙሰኮ፥ 2 "እስራኤለ አሳ ሀይሳዳ ያጋዳ ኪታ፤ ፁገትያ ሳውያ ካ ያርሾ ዎደን ዎደን ታዉ ያርሽተ። 3 ጎዳስ ታማን ፁገትድ ያርሸትያ ያርሾይ ሀይሳ፤ ኩመ ቦላራ ደእያ እስ ላይ ኩምዳ ናምኡ ማራዘታ ዎንታ ዎንታ ፁሳ ያርሾ ኦድ ያርሽተ። 4 ማራዘታፐ እሱዋ ዎንታ እሱዋ ቃስ ኦማርስ ያርሽተ። 5 ቃስ ሄ ማራዝያራ እስ ልትሮ ሻማሆ ዛይተን ሙኑቀትዳ እስ ክሎ ግራመ ሎኦ ግስተ ለ ካ ያርሾ ያርሽተ። 6 ሀይስ ጎዳ ኡፋይስያ ፁሳ ያርሾ። እካ ሲና ዙማ ቦላ ያርሸትዳ ኮይሮ ፁሳ ያርሾ። 7 ኮይሮ ማራዝያራ እስ ልትሮ ጫላ ዎይነ ኡሻ ያርሾ ኦድ ያርሾ በሳን ጎዳስ ጉስተ። 8 ኦማርስ ናምአን ማራዝያ ያርሽያ ዎደ ኮይሮይሳ መላ ካ ያርሹዋነ ኡሻ ያርሹዋ ጉጅድ ያርሽተ። እካ ጎዳ ኡፋይስያ ሳዎ ያርሾ ግዳና።"

ሳምባታ ያርሾ

9 "ሳምባታ ጋላስ ቦረይ ባይና እስ ላይ ኩምዳ ናምኡ ማራዘታ ዛይተን ሙኑቀትዳ ናምኡ ክሎ ግራመ ሎኦ ግስተ ለ ኤክድ ካ ያርሾነ ኡሻ ያርሾ ኦድ ያርሽተ። 10 ጋላስ ጋላስ ያርሸትያ ፁሳ ያርሹዋ ቦላ ሳምባታን ሳምባታን ህንተ ያርሻና ፁሳ ያርሾይነ ኡሻ ያርሾይ ሀይሳ።"

አጌና ፄሮ ያርሾ

11 "አጌን ፄርያ ኮይሮ ጋላስ ናምኡ ዎፋኖታ፥ እስ ማራዘነ እስ ላይ ኩምዳ ቦረይ ባይና ላፑን ዶርሳ ኡርገታ ፁሳ ያርሾ ኦድ ጎዳስ ያርሽተ። 12 እስ እስ ዎፋኑዋራ ሻማሆ ዛይተን ሙኑቀትዳ ሄ ክሎ ግራመ ግድያ ሎኦ ግስተ ለራ ካ ያርሾ ኦድ ያርሽተ። ቃስ ሻማሆ ዛይተን ሙኑቀትዳ ናምኡ ክሎ ግራመ ግድያ ሎኦ ግስተ ልያ ማራዝያራ ዎላ ያርሻ። 13 ላፑን ማራዘታፐ እስ እስ ማራዘ ሻማሆ ዛይተን ሙኑቀትዳ እስ ክሎ ግራመ ሎኦ ግስተ ለራ ፁገትያ ሳውያ ካ ያርሾ ኦዳ ጎዳስ ያርሻ። 14 ቃስ ኡሻ ያርሹዋ እስ እስ ዎፋኑዋስ ናምኡ ልትሮ ዎይነ፥ እስ ማራዝያስ እስ ልትሮነ ባጋ ዎይነ ኡሻነ እስ እስ ዶርሳ ኡርግያስ እስ ልትሮ ግድያ ዎይነ ኡሽ ሺሽተ። ሀይስ ላይ ግዶን አጌን ፄርያ ኮይሮ ጋላሳን ኦሰትያ ፁሳ ያርሾ። 15 ጋላስ ጋላስ ያርሸትያ ፁሳ ያርሹዋ ቦላነ ኡሻ ያርሹዋ ቦላ እስ ኮለ ናጋራ ያርሾ ኦድ ጎዳስ ያርሽተ።"

ፓስካ ያርሾ

16 "ኮይሮ አጌናን ታማነ ኦይዳን ጋላሳይ ጎዳ ፓስካ ቦንችያ ጋላስ ግዶ። 17 ቃስ ሄ አጌናን ታማነ እቻሻን ጋላሳን ኡይ ባለይ ቦንቸቴስ፤ ሄ ጋላሳፐ ዶምድ ላፑን ጋላስ ጋካናዉ እርሾይ ገልቦና ኡይ ሚተ። 18 ሄ ጋላሳታፐ ኮይሮ ጋላሳን ጎይናናዉ ሺቅተ፤ ሄ ጋላሳን አይ ኦሶካ ኦፍተ። 19 ቦረይ ባይና ናምኡ ዎፋኖታ፥ እስ ማራዘነ እስ ላይ ኩምዳ ላፑን ዶርሳ ኡርገታ ፁሳ ያርሾ ኦድ ጎዳስ ያርሽተ። 20 እስ ዎፋኑዋራ ሻማሆ ዛይተን ሙኑቀትዳ ሄ ክሎ ግራመ ሎኦ ግስተ ለ፥ እስ ማራዝያራ ናምኡ ክሎ ግራመ ለነ 21 ላፑን ዶርሳ ኡርገታፐ እስ እስ ዶርሳራ እስ ክሎ ግራመ ለ ያርሽተ። 22 ቃስ እስ ዴሽ ደርያ ናጋራስ አቶተ ግዳና መላ ናጋራ ያርሾ ኦድ ያርሽተ። 23 ሄሳ ኡባ ዎደ ጋላስ ጋላስ ያርሸትያ ያርሹዋ ቦላ ጉጅድ ያርሽተ። 24 ኡባ ዎደ ኦሰትያ ፁሳ ያርሹዋ ቦላነ ኡሻ ያርሹዋ ቦላ ጉጅድ ላፑን ጋላስ ጎዳስ ሳውያ ካ ያርሾ ኦድ ያርሽተ። 25 ላፑን ጋላሳን ጎይኖስ ሺቅተ፤ ሄ ጋላስ አይ ኦሶካ ኦፍተ።"

ካ ሺሾ ባኣለ

26 "ካ ሺሾ ባኣለ ሳምንታን ኮይሮ ጋላስ ጎይኖስ ሺቅያ ዎደ ህንተ ኦራ ካፈ ያርሾ ያርሽተ፤ ሄ ዎደ አይ ኦሶካ ኦፍተ። 27 ናምኡ ዎፋኖታ፥ እስ ማራዝያነ እስ ላይ ኩምዳ ላፑን ዶርሳ ኡርገታ ጎዳስ ሳውያ ፁሳ ያርሾ ኦድ ያርሽተ። 28 እስ እስ ዎፋኑዋራ ሻማሆ ዛይተን ሙኑቀትዳ ሄ ክሎ ግራመ ሎኦ ግስተ ለ፥ እስ ዶርሳ ኡርግያራ ናምኡ ክሎ ግራመ ለነ 29 ላፑን ዶርሳ ኡርገታፐ እስ እስ ኡርግያራ እስ ክሎ ግራመ ግስተ ለ ኤክድ ያርሽተ። 30 እያ ቦላ ጉጅድ እስ ኮለ ናጋራ አቶ ያርሾ ኦድ ያርሽተ። 31 ጋላስ ጋላስ ያርሸትያ ያርሹዋ ቦላነ ኡሻ ያርሹዋ ቦላ ካ ያርሾ ያርሽተ። ህንተ ያርሽያ መሄት ቦረይ ባይናባ ግዶ።"