ጌሻ ጉታ
1 ጎዳይ ሙሰኮ፥ 2 "እስራኤለ አሳይ ባሮ ሀርገን ኦይከትዳ አስ ዎይኮ አሳተፈ ጎግያባይ ደእያ አስ ዎይኮ አሀ ቦችድ ቱንዳ አስ ኦናካ ባንታ ጉታፐ ከሳና መላ ኪታ። 3 ታ ኤንታ ግዶን ደእያ ጉታ ቱንሶና መላ ሀ ጌሽ ግዶና አሳት ማጫ ግድን አደ ኤንታ ግዶፈ ከሳዳ ጎዳ" ያግስ። 4 ጎዳይ ሙሰ ኪትዳይሳዳ እስራኤለ አሳይ ኤንታ ኡባ ጉታፐ ከስድ ጎድዶሶና።
ናቆ አጫ
5 ጎዳይ ሙሰኮ፥ 6 "ኔኒ እስራኤለ አሳስ ሀይሳ ኦዳ፤ አደ ግድን ዎይኮ ማጭ ግድን ኦንካ ጎዳስ አማነቶና እፅድ ሀራ አስ ናቅኮ ሄ ኡራይ ባላ ኦስ። 7 እ ባ ናጋራ ፓፆ፤ ባ ናጋራ አጭያ ኩመ አጫ ቦላ ፄታፐ ላታሙ ኩሸ ጉጅድ እ ናቅዳ ኡራስ ጭጎ። 8 ሽን ሄ ናቀትዳ ኡራይ ሀይቅዳባ ግድኮ፥ አጫ ኤካናዉ ማታ ዳቦይ እያዉ ይኮ፥ ሄ አጫይ ጎዳስ ግድድ ካህንያስ እመቶ። ሄ አጫ ቦላ ጉጅድ እያ ናጋራ አቶተስ ቆሆ ያርሾስ ግድያ ማራዘ ዶርስ እሞ። 9 ቃስ እስራኤለ አሳይ ጎዳስ እምያ ጌሻ እሞ ኡባይ ሄ ካህንያስ ግዶ። 10 እስ እስ አስ እምያ ጌሻ እሞታይ ሄ ኡራባ፥ ሽን ካህንያስ እምኮ ሄ እሞታይ ካህንያሳ" ያግስ።
አዝን ስያ ማችዉ
11 ጎዳይ ሙሰኮ፥ 12 "እስራኤለ አሳስ ያጋዳ ኦዳ፤ እስ አድያ ማችያ ካረ ሄመታዳ እያዉ አማነቶና እፅኮ፥ 13 ሀራ አደራ አቅኮ፥ ቃስ ሄሳ እያ ባ አዝናፐ ቆስኮ፥ እያ ላይማትሽን በእዳ ማርክ ባይናባ ግድኮ፥ 14 እ አዝናይ እዮ ቱናሱ ግድ ስኮ፥ ዎይኮ እያ ቱኖና ደእሽን እ ባ ማችዉ ስኮ፥ 15 ሄ አደይ ባ ማችዉ ካህንያኮ ኤፎ። እ ግሾ ያርሻናዉ እስ ክሎ ግራመ ባንጋ ለ ኤፎ። ሄ አደይ ባ ማችዉ ስዳ ግሾ፥ እ ቆሁዋ ቆንጭስያ ካ ያርሾ ግድያ ግሾ፥ ልያ ቦላ ዛይተ ትጎፖ፤ እፃነ እያ ቦላ ዎፎ።"
16 ካህነይ ሄ ማጫስዉ ጎዳ ስንን ኤሶ። 17 ጌሻ ሃ ከረን ኤኮ። ጌሻ ዱንካንያ ዉይግያፐ ቢታ ኤክድ ሄ ሃን ጉጆ። 18 ሄ ማጫስዉ ጎዳ ስንን ኤሶ፤ ሄ ማጫሰ ሁጵያ ብልድ ስዳ ግሾ ያርሸትያ ቆሁዋ ቆንጭስያ ካ ያርሾ እ ኩሸን ዎ፤ ቃስ ካህነይ ባ ኩሸን ባደ ኤህያ ጫሞ ሃ ከረን ኦይኮ። 19 ሄሳፈ ጉየ ማጫስዉ ያግድ ጫቅሶ፤ "ኔኒ ሀራ አደራ አቃቦናባ ግድኮ፥ ነናተ ቱንሳቦናባ ግድኮ፥ ባደ ኤህያ ሃይ ነዉ ጎመ ግዶፖ። 20 ሽን ኔኒ ነ አዝና አጋዳ ሀራ አደራ አቃዳ ቱንዳባ ግድኮ፥ 21 ጎዳይ ነ የሎ ኬ ጉንድስድ፥ ነ ኡሉዋ ጋቢስድ ነ አሳ ስንን ነና ባደትዳባ ኦ። 22 ሀ ባደ ኤህያ ሃይ ነ ኡሉዋን ገልድ ነ ኡሉዋ ጋቢሶ፤ ነ የሎ ኬ ጉንድሶ" ያግድ ጫቅሶ።
ማጫስያ፥ "አምንእ፥ ሄስ ታና ጋኮ" ያጎ።
23 "ሀይሳፈ ጉየ፥ ካህነይ ሄ ባደ ፃፎ፤ ሄ ፃፍዳይሳ ከርያን ደእያ ሃን ሜጮ። 24 ቃንገ ኤህያ ሃ ማጫስዉ ኡሻናፐ ስን፥ 25 ካህነይ ማጫሰ ኩሸፐ ያርሾ ልያ ኤክድ፥ ደን ያርሾ ኦድ ጎዳስ ያርሾ። 26 ካህነይ ያርሾ ካፈ ዞለ ኤክድ ባላ ቆንጭስያ ያርሾ ኦድ ያርሾ በሳን ፁጎ። ሄሳፈ ጉየ፥ ማጫስዉ ሄ ሃ ኡሾ። 27 እያ ባ አዝናስ አማነቶና እፃዳ ቱንዳባ ግድኮ ባደ ሃይ እ ኡሉዋን ጫሞ ሳሆ መ። እ ኡሎይ ጋባና፤ እ የሎ ኬይካ ጉንዳና፤ እያ ባ አሳ ግዶን ባደትዳሮ ግዳና። 28 እያ ቱናቦናባነ ፅሎ ማጫስ ግድኮ፥ እያ ጌሽ ግዳና፤ ናአ የላናዉ ዳንዳአዉሱ።
29,30 "እስ አስ ባ ማችዉ ላይማታሱ ግድ ስኮ ዎይኮ ቃናትኮ ያርሾ በሲ ኤህድ እዮ ኤሶ። ካህነይ ሄ ዎጋ ኡባ እ ቦላ ፖሎ። 31 አዝናይ፥ ቆሆይ ባይናባ ግዳና፥ ሽን ማችያ ባ ናጋራ ጋሶን ጋክያ ዋየ ኡባ ቶካና" ያግስ።