ታይቦ ማፃፋ 26

ናምአን እስራኤለ አሳ ታይበተ

1 ቦሻፐ ጉየ፥ ጎዳይ ሙሰኮነ ካህንያ አሮና ናኣ አላዛራኮ፥ 2 "ላይ ላታማነ እያፐ ቦላ ግድዳ እስራኤለታ፥ ኦላናዉ ዳንዳኤይሳታ ኡባ፥ ኤንታ ኬን ኬን ታይብተ" ያግስ።

3 ያትን፥ ሙሰይነ ካህነይ አላዛር ዮርዳኖሰ ሻፋፐ ሄፍንን፥ እያርኮ ማታን፥ ሞአበ ደንባን አሳ ሺሽድ፥ 4 "ጎዳይ ሙሰ ኪትዳይሳዳ፥ ላይ ላታማነ እያፐ ቦላ አሳ ታይብዶሶና።"

ግብፀፈ ከይዳ እስራኤለ አሳይ ሀይሳታ።

5 እስራኤለ ባይራ ናኣ ሮቤላ ኮቻት ባንታ ኮቻን ኮቻን፥ ሀኖካ ኮቻ፥ ፋሉ ኮቻ፥ 6 ሄስሮና ኮቻነ ካርማ ኮቻ፤ 7 ሀይሳቲ ሮቤላ ኮቻታ፤ ኤንታ ኩመ ታይቦይ 43,730. 8 ፋሉ ናአይ ኤልኣባ፤ 9 ኤልኣባ አደ ናይት ነሙኤላ፥ ዳታነነ አቤሮ። ዳታንነ አቤሮይ ማባራይ ዶርዳይሳታ፥ ሽን ኤንቲ ቆረነ እያ ካለይሳታራ ቶቢድ ጎዳ ቦላ ማካልድ ሙሰ ቦላነ አሮና ቦላ ደንድዶሶና። 10 ቢታይ ዶየትድ ኤንታ ቆረራ እስፈ ምትስ፤ ኤንታ ካልያ 250 አሳ ታም ምን ሀይቅዶሶና። ያትን፥ ሀራት ኤንታ በእድ ናገታና መላ ማላ ግድዶሶና። 11 ሽን ቆረ አደ ናይት ኡባይ ሀይቅድ ይቦኮና።

12 ስሞና ዘረይ ባንታ ኮቻን ኮቻን፥ ነሙኤላ ኮቻ፥ ያምና ኮቻ፥ ያክና ኮቻ፥ 13 ዛራ ኮቻነ ሳኡላ ኮቻ። 14 ሀይሳቲ ስሞና ኮቻታ፤ ኤንታ ኩመ ታይቦይ 22,200.

15 ጋደ ዘረይ ባንታ ኮቻ ኮቻን፥ ፅፎና ኮቻ፥ ሀግ ኮቻ፥ ሹና ኮቻ፥ 16 ኤስና ኮቻ፥ ኤራ ኮቻ፥ 17 አሮዳ ኮቻነ አርኤላ ኮቻ። 18 ሀይሳቲ ጋደ ኮቻታ፤ ኤንታ ኩመ ታይቦይ 40,500.

19 ይሁዳ አደ ናይት ኤርነ ኦናን ካናነ ቢታን ሀይቅዶሶና። 20 ይሁዳ ኮቻት ባንታ ኮቻን ኮቻን፥ ሴላ ኮቻ፥ ፋረሳ ኮቻነ ዛራ ኮቻ። 21 ፋረሳ ኮቻይ ሄስሮናነ ሀሙላ። 22 ሀይሳቲ ይሁዳ ኮቻታ፤ ኤንታ ኩመ ታይቦይ 76,500.

23 ይሳኮራ ዘረይ ባንታ ኮቻን ኮቻን፥ ቶላ ኮቻ፥ ፑአ ኮቻ፥ 24 ያሱባ ኮቻነ ሽምሮና ኮቻ። 25 ሀይሳቲ ይሳኮራ ኮቻታ፤ ኤንታ ኩመ ታይቦይ 64,300.

26 ዛብሎና ዘረይ ባንታ ኮቻን ኮቻን፥ ሳረዳ ኮቻ፥ ኤሎና ኮቻነ ያህላላ ኮቻ። 27 ሀይሳቲ ዛብሎና ኮቻታ፤ ኤንታ ኩመ ታይቦይ 60,500.

28 ዮሰፋ ናይታ ምናሰነ ኤፍሬማ ኮቻት ባንታ ኮቻን ኮቻን፥ 29 ምናሰይ ማክራ የልስ፥ ማክር ጋላዳ የልስ። 30 ጋላዳ ኮቻት፥ እዘራ ኮቸ፥ ከለጋ ኮቸ፥ 31 አስርኤላ ኮቸ፥ ሴከማ ኮቻ፥ 32 ሻምዳ ኮቸነ ሄፌራ ኮቸ። 33 ሄፌራ ናአይ ሰሎጳድ ማጫ ናአ ፃላላ የልስ፤ እያዉ አደ ናእ ባዋ። ሰሎጳዳ ማጫ ናይታ ሱንይ ማህሎ፥ ኖኦ፥ ሆግሎ፥ ምልኮነ ትርፆ። 34 ሀይሳቲ ምናሰ ኮቻታ፤ ኤንታ ኩመ ታይቦይ 52,700.

35 ኤፍሬማ ዘረይ ባንታ ኮቻን ኮቻን፥ ሹቱላ ኮቻ፥ በከራ ኮቻ፥ ታሀና ኮቻታነ 36 ሹቱላ ናኣ ኤራና ኮቻታ። 37 ሀይሳቲ ኤፍሬማ ኮቻታ፤ ኤንታ ኩመ ታይቦይ 32,500. ዮሰፋ ኮቻት ባንታ ኮቻን ኮቻን ሀይሳታ።

38 ብንያመ ዘረይ ባንታ ኮቻን ኮቻን፥ ቤላ ኮቻ፥ አስቤላ ኮቻ፥ አክራ ኮቻ፥ 39 ሹፋማ ኮቻ፥ ሁፋማ ኮቻ፥ 40 ቤላ ናኣ አራዳ ኮቻነ ቤላ ናኣ ናማነ ኮቻ። 41 ሀይሳቲ ብንያመ ኮቻታ፤ ኤንታ ኩመ ታይቦይ 45,600.

42 ዳነ ዘረይ ሳማ ኮቻ። 43 ሹሃማ ኮቻ ኩመ ታይቦይ 64,400.

44 አሴራ ዘረይ ባንታ ኮቻን ኮቻን፥ ይምና ኮቻ፥ ይስዋ ኮቻ፥ በርአ ኮቻ፥ 45 በርአ ናአ ሄቤራ ኮቻነ በርአ ናኣ ማልክኤላ ኮቻ። 46 አሴራስ ሳራሆ ጌተትያ ማጫ ናእ ደአዉሱ። 47 ሀይሳቲ አሴራ ኮቻታ፤ ኤንታ ኩመ ታይቦይ 53,400.

48 ንፍታለመ ዘረይ ባንታ ኮቻን ኮቻን፥ ያህፄላ ኮቻ፥ ጉና ኮቻ፥ 49 የፀራ ኮቻነ ሽለመ ኮቻ። 50 ሀይሳቲ ንፍታለመ ኮቻታ፤ ኤንታ ኩመ ታይቦይ 45,400.

51 ታይበትዳ እስራኤለ አደ አሳ ታይቦይ ኩመ 601,730.

52 ጎዳይ ሙሰኮ፥ 53 "ሀ ኮቻታስ ኤንታ ሱን ሱን ታይቡዋን ቢታ ሻካዳ ላታ ኦዳ ኤንታዉ እማ። 54 ታይቦን ዳረይሳታስ ዳርሳዳ ቃስ ታይቦን ጉፀይሳታስ ጉዳ እማ። ኡባይካ ፃፈትዳ ባንታ ታይቡዋ ኬና ኤኮ። 55 ሽን ቢታይ ሳማን ሻከቶ፤ እስ እስ ኮቻይ ላታ ኤከይ ባ ኮቻ ሱንን ግዶ። 56 እስ እስ ላታይ ታይቦን ዳሮታ ግዶንነ ታይቦን ጉታ ግዶን ሳማን ሻከቴስ" ያግስ።

57 ባንታ ዘረን ዘረን ታይበትዳ ሌወ ኮቻት ሀይሳታ፤ ገድሶና ኮቻ፥ ቃሃታ ኮቻነ መራራ ኮቻ። 58 ሀይሳቲካ ቃስ ሌወ ኮቻታ፤ ልብና ኮቻ፥ ከብሮና ኮቻ፥ ሞሆላ ኮቻ፥ ሙሰ ኮቻነ ቆረ ኮቻ። ቃሃት አምራማ የልስ። 59 አምራማ ማቸ ሱንይ ዮከቤዶ፤ እያ ግብፀን ሌወፐ የለትዳ ሌወ ናአ። እያ አሮና፥ ሙሰነ ኤንታ ምችዉ ማይራሞ የላሱ። 60 አሮናስ ናዳበ፥ አብዮዳ፥ አላዛራነ እታማራ ጌተትያ ኦይዱ ናይት ደኦሶና። 61 ሽን ናዳበይነ አብዮድ ጎዳ ስንን ጌሽ ግዶና ታማን ያርሾ ያርሽዳ ግሾ ቦሻን ሀይቅዶሶና። 62 ላይ እስ አጌናነ እያፐ ቦላ ግድዳ ሌወ አደ ናይታ ታይቦይ ላታማነ ሄ ሙኩላ። እስራኤለ አሳ ግዶን ኤንታዉ ላታ ቢት እመትቦና ግሾ ኤንቲ እስራኤለታራ ታይበትቦኮና።

63 ዮርዳኖሰ ሻፋፐ ሄፍንን፥ እያርኮ ማታን፥ ሞአበ ደንባን ሙሰይነ ካህነይ አላዛር እስራኤለ አሳ ታይብዳ ዎደ ታይበትዳ አሳይ ሀይሳ። 64 ሙሰይነ ካህነይ አሮን ኮይሮ ሲና መላ ቢታን እስራኤለ ታይብዳ ዎደ ታይበትዳ አሳፐ መፅ እስ አስካ አትቤና። 65 ጎዳይ ሀ እስራኤለታባ፥ "ኤንቲ ኡባይ መላ ቢታን ሀይቃና" ያግድ ኦድዳ ግሾ፥ ዮፎና ናኣ ካለባፐነ ናወ ናኣ እያሱፐ አትሽን፥ ሀር እስ አስካ አትቤና።