አሮንነ ማይራማ ሙሰራ ኤቀትዶሶና
1 ሙሰይ ቶጰ ቢታ ማጫስ ኤክዳ ግሾ፥ ማይራማነ አሮን ሙሰ ያግድ ቦርዶሶና። 2 "ጎዳይ ሙሰ ባጋራ ፃላላ ኦደትዴ? እ ኑ ባጋራ ኦድቤኔ?" ያግዶሶና። ጎዳይ ኤንቲ ግዳይሳ ስእስ። 3 ሙሰይ ቢታን ደእያ አሳ ኡባፈ አያ አዳ አስ።
4 ቆፖና ጎዳይ ሙሰ፥ አሮናነ ማይራሞ፥ "ህንተ ሄት ጌሻ ዱንካንያኮ ከይተ" ያግስ። ኤንትካ ከይዶሶና። 5 ጎዳይ ሻራ ቱሳራ ዎድ ጌሻ ዱንካንያ ፐንገን ኤቅድ፥ አሮና! ማይራመ! ያግድ ፄግስ። ኤንቲ ናምአይ እያ ስን ሺቅን፥ 6 ጎዳይ፥ "ታ ኦደይሳ ስእተ፤ ህንተ ግዶን ናበይ ደእኮ፥ ታ እያዉ ቆንጫይስ፤ ቃስ እያዉ አሙሆን ኦዳይስ። 7 ሽን ታ አይለይ ሙሰ ሄሳዳ ግደና፤ እ ታ ኬ ኡባን አማነትዳይሳ። 8 ታኒ ሙሰራ ሶምኦን ኦደታስፐ አትሽን፥ ሌምሶን ኦድከ። እ ታ ማላ በኤስ። ያትን፥ ህንተ ታ አይልያ ሙሰ ቦራናዉ አይስ ያይበከቲ?" ያግስ።
9 ጎዳ ሀንቆይ ኤንታ ቦላ ኤፅን፥ እ ኤንታ አግድ ብስ። 10 ሻራይ ጌሻ ዱንካንያ ቦላፈ ደንድዳ ዎደ ማይራማ ባሮ ሀርገን ምልፅ ጋዳ ቦፃሱ። አሮን ኢኮ ስሚድ ፄልያ ዎደ ባሮ ሀርገን ኦይከትዳሮ በእስ። 11 አሮን ሙሰኮ፥ "ሀይ ታ ጎዳዉ፥ ኑኒ ኤያተን ኦዳ ናጋራስ ኑና ሀይሳዳ ሴሮፓ። 12 እዮ ባ አየ ኡሎፐ ከይያ ዎደ እ አሳተፈ ባጋይ ሜተትን፥ ሀይቅድ የለትዳ ናአ መላ ኦፋ" ያግስ።
13 ያትን፥ ሙሰይ፥ "አቤት ጎዳዉ፥ እዮ ፓርክ" ያግድ ጎዳ ዎስስ።
14 ጎዳይ ሙሰኮ፥ "እ አዋይ እ ሶምኦን ጩትያባ ግድያኮ፥ እያ ላፑን ጋላስ ዬላራ ጋምአዉሱ ግድኬ? ሄሳ ግሾ፥ ላፑን ጋላስ ዱንካንያ ጉታፐ እዮ ጋፃ ከሳዳ ዱማ በሳን ዎ፤ ሄሳፈ ጉየ ስማዳ ዮ" ያግስ። 15 ያትን፥ ማይራማ ዱንካንያ ጉታፐ ጋፃ ከያዳ ላፑን ጋላስ ኡታሱ። እያ ስማና ጋካናዉ አሳይ ጉታ አግድ ባናዉ ደንድቤና። 16 ሄሳፈ ጉየ፥ አሳይ ሀፀሮታ ጌተትያ በሳፈ ደንድድ፥ ፓራና መላ ቢታን ዱንካንዶሶና።