ጌሾ ሃ
1 ጎዳይ ሙሰኮነ አሮናኮ፥ 2 "ጎዳይ ህግያን ኪተትዳ ዎጋይ ሀይሳ፤ ቦርሶይ ባይና፥ እ ጋናን ቃምባር ዎቦና ዞኦ ኡሱ ኤሀና መላ እስራኤለ አሳስ ኦድተ። 3 ካህንያ አላዛራስ እዮ እምተ፤ ጉታፐ እዮ ጋፃ ከስድ ካህንያ ስንን ሹኮ። 4 ካህነይ አላዛር እ ሱፈ ጉራ ኤክድ ባ ብራያን ጌሻ ዱንካንያኮ ስሚድ ላፑን ቶሆ ዉርፆ። 5 ካህነይ በእሽን ኡስያ ፁገቶ፤ ጋልባይ፥ አሾይ፥ ሱይነ ቶጨይ ፁገቶ። 6 ካህነይ ዝጋ ም፥ ህሶጰ ታሸነ ዞኦ ቃጭና ኤክድ ኡስያ ኤፅያ ታማን የጎ። 7 ሄሳፈ ጉየ ካህነይ ባ ማኡዋነ ባ አሳተ ሜጨትድ ጉታ ገሎ፤ ሽን ኦማርስ ጋካናዉ ዎጋዳ ቱና ግዳና። 8 ሄ ኡስዉ ፁግዳይስ ባ ማኡዋነ ባ አሳተ ሜጨቶ፤ እካ ኦማርስ ጋካናዉ ዎጋዳ ቱና ግዳና።
9 "ሄሳፈ ጉየ፥ ሀራ ጌሻ አስ ኡስያ ፁገትዳ ብዱዋ ሺሽድ ጉታፐ ጋፃን ጌሻ በሳን ዎ። እስራኤለ አሳይ ቱናተፈ ጌሽያ ሃን ጎኤታናዉ ሄስ ናገትድ ኡታና፤ ሄስ ናጋራፐ ጌሻናዉ ጎኤስ። 10 ቃስ ኡሴ ብዱዋ ሺሽዳ ኡራይካ ባ ማኡዋ ሜጮ፤ እ ኦማርስ ጋካናዉ ዎጋዳ ቱና ግዳና። ሀ ዎጋይ እስራኤለ አሳስነ ኤንታ ግዶን ደእያ ሀራ ደረ አሳስ መርና ዎጋ ግዳና።
11 "አሀ ቦችያ ኦንካ ላፑን ጋላስ ዎጋዳ ቱና ግዳና። 12 ቱናተፈ ጌሽያ ሃን ሄን ጋላስነ ላፑን ጋላስ እ ባና ጌሾ፤ ሄሳፈ ጉየ፥ እ ዎጋዳ ጌሽ ግዳና። ሽን ሄን ጋላስነ ላፑን ጋላስ እ ባና ጌሾና እፅኮ እ ጌሽ ግደና። 13 ሀይቅዳ አሳ አሀ ቦችያ ኦንካ ባና ጌሾና እፅኮ እ ጎዳ ዱንካንያ ቱንሴስ፤ ሄ ኡራይ እስራኤለ አሳ ግዶፈ ኩረቶ። ቱናተፈ ጌሽያ ሃይ እያ ቦላ ዉርፀትቦና ግሾ እ ቱና፤ እ ቱና ግድድ ጋምኤስ።
14 "እስ አስ ዱንካንያ ግዶን ሀይቅኮ ኦና ዎጋይ ሀይሳ፤ ዱንካንያ ግዶ ገልያ ኦንካ፥ ቃስ ዱንካንያ ግዶን ደእያ ኦንካ ላፑን ጋላስ ጋካናዉ ቱና ግዳና። 15 ሄሳዳካ፥ ካመቶና ዶያ ደእያ ሚሸ ኡባይ ቱና ግዳና። 16 ቃስ ደንባን ሀይቅዳ አሳ አሀ ዎይኮ ሀርገትድ ሀይቅዳ አሳ አሀ ዎይኮ መቀ ዎይኮ ዱፎ ቦችያ ኦንካ ላፑን ጋላስ ጋካናዉ ቱና ግዳና።
17 "ቱናተፈ ጌሻናዉ ፁገትዳ ኡሴ ብዱዋፐ ጉራ ኤካዳ ኦቶን የጋዳ ፑልቶ ሃ እያ ቦላ ትጋ። 18 ጌሻ አስ ህሶጰ ውርጮ ኤክድ ሃን ናቅ ከስድ፥ ዱንካንያ፥ እያ ግዶን ደእያ ሚሽያነ አሳ ኡባ ቦላ ዉርፆ። ቃስ ሀይቅዳ አሳ አሀ ዎይኮ መቀ ዎይኮ ዱፎ ዎይኮ ሀርገት ሀይቅዳ አስ ቦችዳ አሳ ቦላ ዉርፆ። 19 ጌይዳ አስ ሄን ጋላስነ ላፑን ጋላስ ጌይቦና ኡራ ቦላ ዉርፆ። እ ላፑን ጋላስ ሄ ኡራ ቱናተፈ ጌሾ፤ ሄ ጌይዳ አደይ፥ ባ ማኡዋነ ባ አሳተ ሜጨቶ፤ ሄ ጋላስ ኦማርስ እ ጌሽ ግዳና።
20 "ሽን ቱና ኡራይ ባና ጌሾና እፅኮ፥ ሄ ኡራይ ጌሻ ዱንካንያ ቱንስዳ ግሾ፥ እስራኤለ አሳ ግዶፈ ኩረቶ፤ ቱናተፈ ጌሽያ ሃይ እያ ቦላ ዉርፀትቦና ግሾ እ ቱና። 21 ሀይስ ህንተዉ መርና ዎጋ ግዳና። ቱናተፈ ጌሽያ ሃ ዉርፅያ ኡራይ ባ ማኡዋ ሜጮ፤ ቃስ ቱናተፈ ጌሽያ ሃ ቦችያ ኦንካ ኦማርስ ጋካናዉ ቱና ግዳና። 22 ቱና ኡራይ ቦችያ አይብባይካ ቱኔስ፤ ቃስ ሄ ሚሽያ ቦችያ ኦንካ ኦማርስ ጋካናዉ ቱና ግዴስ" ያግስ።