አሮና ፃምአ አጨ
1 ጎዳይ ሙሰኮ፥ 2 "እስራኤለ አሳይ እስ እስ ኮቻ ሀላቃታፐ እስ እስ ፃምአ ኤክድ ታማነ ናምኡ ፃምአ ነዉ ኤሀና መላ ኤንታዉ ኦዳ። ሄ ፃምኣ ቦላ እስ እስ አሳ ሱን ፃፋ። 3 እስ እስ ኮቻ ሀላቃስ እስ ፃምአ ኮሽያ ግሾ፥ ሌወ ፃምኣ ቦላ አሮና ሱን ፃፋ። 4 ሄ ፃምአታ ጌሻ ዱንካንያ ግዶን ታ ኔራ ጋሄትያ ታቦትያ ስንን ዎ። 5 ታ ዶርያ ኡራ ፃምአይ አጫና፤ ሄሳዳ ኦዳ ህንተ ቦላ እስራኤለ አሳ ዙዙን ታ ተቃና" ያግስ።
6 ሄሳ ሙሰይ እስራኤለ አሳስ ኦድን፥ ታማነ ናምኡ ሀላቃት ሁጰን ሁጰን እስ እስ ፃምአ ኤህዶሶና። አሮና ፃምአይካ ሄ ፃምአታ ግዶን ደኤስ። 7 ሙሰይ ሄ ፃምአታ ኡባ ጌሻ ዱንካንያ ግዶን ጎዳ ስንን ዎስ።
8 ዎንተ ጋላስ ሙሰይ ጌሻ ዱንካንያ ግዶ ገልያ ዎደ ሌወ ኮቸ ግድዳ አሮና ፃምአይ አጭዳይሳ፥ ጋምቡፅዳይሳ፥ ጪይዳይሳነ ላዉዘ ም አይፈ አይፍዳይሳ በእስ። 9 ሙሰይ ፃምአ ኡባ ጎዳ ስንፈ ኤህድ እስራኤለ አሳ በስስ። ኤንቲ ሀንዳባ በእዳፐ ጉየ እስ እስ ሀላቃይ ባንታ ፃምኣ ፃምኣ ኤክዶሶና። 10 ጎዳይ ሙሰኮ፥ "አሮና ፃምኣ ታቦትያ ስንን ዛራዳ ዎ። ማካልዳ እስራኤለ አሳይ ታ ቦላ ዙዙን አጎና እፅኮ ሀይቃናይሳ ኤንታዉ ማላታ ኦዳ ዎ" ያግስ። 11 ሙሰይ፥ ጎዳይ ኪትዳይሳዳ ኦስ።
12 እስራኤለ አሳይ ሙሰኮ፥ "ሄሳ ግድኮ፥ ኑ ኡባይ ሀይቃና፤ ያና። 13 ጌሻ ዱንካንያኮ ሺቅያ ኡባይ ሀይቃና ግድኮ፥ ኑ ኡባይካ ሀይቆስ ጉሰዬ?" ያግዶሶና።