ዮርዳኖሰፐ ሄፍንን ኡትዳ ኮቻታ
1 ሮቤላነ ጋደ ኮቻስ ዳሮ መሄይ ደኤስ። ኤንቲ ያእዜራ ቢታይነ ጋላዳ ቢታይ መሄስ እንጀ ግደይሳ፥ 2 በእድ ሙሰኮ፥ ካህንያ አላዛራኮነ እስራኤለ ማባራ ሀላቃታኮ ይድ ሀይሳዳ ያግዶሶና። 3,4 "እስራኤለ አሳይ ላታና መላ ጎዳይ ማድዳ ቢታይ፥ አፃሮተይ፥ ድቦን፥ ያእዜር፥ ንምር፥ ሀሰቦን፥ ኤልያል፥ ሰባም፥ ናቦይነ ባኦን መሄስ እንጀ ቢታ፤ ኑስ ህንተ አይለታስ ዳሮ መሄይ ደኤስ። 5 ኑኒ ህንተ ስንን ሳባ ደምዳባ ግድኮ፥ ሄ ቢታ ኑስ ህንተ አይለታ ላታ ኦድ እምተ፤ ኑና ዮርዳኖሰ ሻፋፐ ሄፍን ፕንፍተ" ያግዶሶና።
6 ሙሰይ ጋደ ኮቻታኮነ ሮቤላ ኮቻታኮ፥ "ህንተ ባጋ ግድዳ እስራኤለ አሳይ ኦላስ ብያ ዎደ ህንተ ሀይሳን ኡታናዉ ኮዬቲ? 7 ጎዳይ ኤንታዉ እምዳ ቢታ ኤንቲ ፕኖና መላ ህንተ አይስ ኤንታ ዎዛና ሹግሴቲ? 8 ቃደሳ ባርነፈ ሀ ቢታ ዎቻና መላ ህንተ አዋታ ታ የድዳ ዎደ ኤንትካ ሀይሳዳ ኦዶሶና። 9 ኤንቲ ኤሽኮላ ዛንጋራ ጋካናዉ ብድ ሄ ቢታ በእ ስሚድ እስራኤለት ጎዳይ ኤንታዉ እምዳ ቢታ ገሎና መላ እስራኤለታ ዎዛና ሹግስዶሶና። 10 ጎዳይ ሄ ጋላስ ዳሮ ሀንቀትድ ሀይሳዳ ያግድ ጫቅስ፤ 11 ‘ባንታ ኩመ ዎዛናፐ ታና ካልቦና ግሾ፥ ግብፀ ቢታፈ ከይዳይሳታፐ ላይ ላታማነ እያፐ ቦላ ግድዳ አደ አሳፐ እሶይካ አብራሃመስ፥ ይሳቃስነ ያይቆባስ እማና ጋዳ ጫቅዳ ቢታ ገለኮና። 12 ባንታ ኩመ ዎዛናፐ ካልዳ ግሾ፥ ቀነዛ ዮፎና ናኣ ካለባፐነ ናወ ናኣ እያሱፐ አትሽን፥ ሀር ኦንካ ገለና’ ያግስ። 13 ጎዳ ሀንቆይ እስራኤለ አሳ ቦላ ኤፅዳ ግሾ ጎዳ ስንን ኢታ ኦዳ ሄ የለተ ኡባይ ያና ጋካናዉ መላ ቢታን ኦይታሙ ላይ ቶይላትዶሶና። 14 ህንተኖ፥ ናጋራንቾታ ናይቶ ህንተ አዋታ በሳን ኤቅድ ጎዳይ እስራኤለ አሳ ቦላ ጉጅድ ሀንቀታና መላ ኦታ። 15 ህንተ ጎዳ ካሎና እፅኮ፥ እ ቃስካ ባ ደርያ መላ ቢታን አጋና። ኤንታና ጋክያ ዩዋስ ህንተ ኦይሸታና" ያግስ።
16 ኤንቲ ሙሰኮ ሺቅድ፥ "ኑኒ ሀይሳን ኑ መህያስ ዳራ፥ ኑ ናይታስነ ኑ ማቸታስ ካታማ ኬፃናዉ ኮዮስ። 17 ሽን እስራኤለ አሳይ ባንታ በሳ ኤካና ጋካናዉ ኑኒ ኦላ ሚሸ ዳንጭድ ኤንታ ስንን ከይድ ኦለታናዉ ጊገትዳ። ሄ ዎደ ሄ ቢታን ደእያ አሳይ ኑ ናይታነ ኑ ማቸታ ቆሆና መላ ግምበትድ ኡትዳ ካታማታን ደኦና። 18 እስራኤለ አሳ ኡባይ ባንታ ላታ ላታ ኤካና ጋካናዉ፥ ኑኒ ኑ ሶ ስሞኮ። 19 ኑኒ ኑ ላታ ዮርዳኖሰ ሻፋፐ ሀፍንን ዶሎሀ ባጋን ላትዳ ግሾ፥ ዮርዳኖሰፐ ሄፍንን ዉሎሀ ባጋን ኤንታራ ላታ ኤኮኮ" ያግዶሶና።
20 ሙሰይ ኤንታኮ፥ "ህንተ ገይስ ቱማ ግድኮ ሀይሳን ጎዳ ስንን ኦላ ባናዉ ዳንጨትተ። 21 ጎዳይ ባ ሞርከታ ባ ስንፈ ጎዳና ጋካናዉ ህንተ ኦላ ሚሽያ ዳንጭድ፥ ዮርዳኖሰ ሻፋ ጎዳ ስንን ፕንኮ፥ 22 ሄ ቢታ ጎዳይ ፆንዳፐ ጉየ ህንተ ስማናዉ ዳንዳኤታ። ሄ ዎደ ህንተ ጎዳስነ እስራኤለ አሳስ ኦለትድ ፖልደታ ጉሱ። ቃስ ሄ ቢታይ ጎዳ ስንን ህንተዉ ላታ ግዳና።
23 "ህንተ ሄሳ ኦና እፅኮ ጎዳ ቦላ ናጋራ ኦታ፤ ህዛ፥ ህንተ ናጋራ ግሾ ህንተና ሴር ጋካናይሳ ሎይ ኤርተ። 24 ህንተ ህንተዉ ካታማታ፥ ህንተ መህያስ ዳራ ኬፅተ፥ ሽን ህንተ ገልዳ ቃላ ፖልተ" ያግስ።
25 ጋደ ኮቻይነ ሮቤላ፥ ኮቻይ ሙሰኮ፥ "ኑኒ ነ አይለት ነ ኪትዳይሳዳ ኦና። 26 ኑ ናይት፥ ኑ ማቸት፥ ኑ ዶርሳትነ ኑ መሄይ ሀይሳን ጋላዳ ካታማታን ደእሾና። 27 ሽን ኑኒ ነ አይለት፥ ኦላንቾት ኡባይ፥ ኔኒ ኑ ጎዳይ ግዳይሳዳ ኦለታናዉ ጎዳ ስንን ዮርዳኖሰ ሻፋ ፕናና" ያግዶሶና።
28 ሄሳ ግሾ፥ ሙሰይ ካህንያ አላዛራ፥ ናወ ናአ እያሱነ እስራኤለ ኮቻታ ሀላቃታ ኤንታባ ያግድ ኪትስ። 29 "ጋደ ኮቻይነ ሮቤላ ኮቻይ ኡባይ ኦላ ሚሽያ ዳንጭድ፥ ጎዳ ስንን ህንተራ ዮርዳኖሰ ሻፋ ፕንኮነ ህንተ ሄ ቢታ ፆንኮ፥ ሄሳፈ ጉየ፥ ጋላዳ ቢታ ህንተ ኤንታ ላትስተ። 30 ሽን ኤንቲ ኦላ ሚሽያ ዳንጭድ፥ ህንተራ ፕንድ ኦላስ ቦና እፅኮ፥ ህንተዳ ኤንታዉ ካናነ ቢታን ላት እመቶ" ያግስ።
31 ያትን። ጋደ ኮቻይነ ሮቤላ ኮቻይ ዛሪድ፥ "ኑኒ ነ አይለት ጎዳይ ግዳይሳ ኦና። 32 ኑኒ ኦላ ሚሽያ ዳንጭድ፥ ጎዳ ስንን ካናነ ቢታ ገላናዉ ፕናና፤ ሽን ኑኒ ላትያ ላታይ ዮርዳኖሰፐ ሀፍን ባጋ ግዶ" ያግዶሶና።
33 ሄሳ ግሾ፥ ሙሰይ ጋደ ኮቻስ፥ ሮቤላ ኮቻስነ ዮሰፋ ናኣ ምናሰ ኮቻፈ ባጋስ አሞረ ካዋ ስሆና ካዎተነ ባሳነ ካዋ ኦገ ካዎተ ኤንታ ዩሹዋን ደእያ ካታማታራ እሚስ። 34 ጋደ ኮቻይ ድቦና፥ አፃሮታ፥ አሮኤራ 35 አፅሮት-ሻፋና፥ ያእዜራ፥ ዮግባ፥ 36 ቤት-ንምራነ ቤት-ሀራና ጌተትያ ግምበን ድረትዳ ካታማታ ዛሪድ ኬፅዶሶና፤ ባንታ መህያስ ዳራ ኬፅዶሶና።
37 ሮቤላ፥ ኮቻይ ሀሰቦና፥ ኤልኣላ፥ ቅራታይማ፥ 38 ናባ፥ ባኣል-ማኦናነ ሰባማ ጌተትያ ካታማታ ዛረ ኬፅዶሶና፤ ሄ ካታማታ ሱን ላምዶሶና።
39 ምናሰ ናኣ ማክራ ኮቻት ጋላዳ ቢታ ኦል ኦይክድ ያን ደእያ አሞረታ ጎድዶሶና። 40 ሄሳ ግሾ፥ ምናሰ ናኣ ማክራ ኮቻስ ሙሰይ ጋላዳ ቢታ እምን ኤንቲ ያን ደእዶሶና። 41 ምናሰ ኮች ግድዳ ያእር ሄ ካታማታ ኦል ኦይክድ፥ "ያእራ ካታማታ" ያግድ ሱንስ። 42 ኖባ ቃናታ ካታማነ እያ ዩሹዋን ደእያ ጉታታ ኦላን ኦይክደ፥ ባ ሱንን "ኖባ" ግድ ሱንስ።