ታይቦ ማፃፋ 13

ካናነ ዎቻናዉ ኪተትዳ አሳታ

1 ጎዳይ ሙሰኮ፥ 2 "ታኒ እስራኤለታስ እማና ካናነ ቢታ ዎቻና መላ ታማነ ናምኡ እስራኤለ ኮቻፈ እስ እስ አስ ሀላቃ ኦዳ ኪታ" ያግስ።

3 ያትን ሙሰይ ጎዳይ ኪትዳይሳዳ ፓራና መላ ቢታፈ እስራኤለ ኮቻፈ ታማነ ናምኡ ሀላቃታ ኪትስ። 4 ኤንታ ሱንይ ሀይሳፈ ካልድ ፃፈትዳይሳታ።

ሮቤላ ኮቻፈ ዛኩራ ናኣ ሳሙአ፤

5 ስሞና ኮቻፈ ሆራ ናኣ ሻፋፃ፤

6 ይሁዳ ኮቻፈ ዮፎና ናኣ ካለባ፤

7 ይሳኮራ ኮቻፈ ዮሰፋ ናኣ ይግኣላ፤

8 ኤፍሬማ ኮቻፈ ናወ ናኣ አውሰ፤

9 ብንያመ ኮቻፈ ራፉ ናኣ ፋልፃ፤

10 ዛብሎና ኮቻፈ ሶዳ ናኣ ጋድኤላ፤

11 ዮሰፋ ናኣ ምናሰ ኮቻፈ ሱሳ ናኣ ጋደ፤

12 ዳነ ኮቻፈ ጋማላ ናኣ አምኤላ፤

13 አሴራ ኮቻፈ ምካኤላ ናኣ ሳቱራ፤

14 ንፍታለመ ኮቻፈ ዋፍሳ ናኣ ናህባ፤

15 ጋደ ኮቻፈ ማካ ናኣ ገኡኤላ።

16 ሄ ቢታ ዎቻና መላ ሙሰይ ኪትዳ አሳታ ሱንይ ሀይሳታ። ሙሰይ ናወ ናኣ አውሰ ሱን እያሱ ግድ ሱን ላምስ።

17 ሙሰይ ኤንታ፥ "ነገበ መላ ቢታ ካንድ ፑደ ደረይ ዳርያ ቢታ ከይተ። 18 ቢታይ አይ መላ ቢታኮ፥ አሳይ አይ መላ ምኖኮነ ታይቦን ጉኮ ዳሮኮ በእተ። 19 ኤንቲ ደእያ ቢታይ ሎኦኮ ኢተኮ፥ ኤንታ ካታማት ድረትዳኮነ መላ ደእያኮ፥ 20 ቢታይ አራደኮ ላደኮ፥ ቢታይ ዎራን ካመትዳኮነ ቁኤኮ በእተ። ምንተ፤ ሄ ቢታን ደእያ ካ አይፍያፐ ኤኮና ዮፕተ" ያግስ። ሄ ዎደይ ዎይነይ ቴርድ ማፀትያ ዎደ።

21 ኤንቲ ከይድ ሲና መላ ቢታፈ ዶምድ፥ ለቦ-ሀማታ ማታን ደእያ ረሆባ ጋካናዉ ደእያ ቢታ ዎችዶሶና። 22 ነገበ መላ ቢታ ካንድ፥ ከብሮና ጋክዶሶና። ሄ በሳን አክማና፥ ሰሳያነ ታልማያ ጌተትያ ኤናቃ ኮቻት ደኦሶና። ከብሮን ግብፀን ደእያ ፆኣነ ካታማፐ ላፑን ላይ ኮይሮትድ ኬፀትስ።

23 ያራ ካንድ፥ ኤሽኮላ ዛንጋራ ብድ ጋክያ ዎደ ቴራ ዎይነ ታሽያራ ቃንፅዶሶና። ሄ ታሸይ ዴፆ ግድያ ግሾ ናምኡ አስ ካሶ አድ ቶክዶሶና። እያ ቦላ ጉጅድ ኦሮማነነ ባላሰ ም አይፈ ኤክድ ይዶሶና። 24 እስራኤለ አሳይ ሄ በሳፈ ዎይነ ታሽያ ቃንፅዳ ግሾ ሄ በሳ ኤሽኮላ ዛንጋራ ግድ ፄግዶሶና።

25 ኤንቲ ሄ ቢታ ኦይታሙ ጋላስ ዎችድ ጉየ ስምዶሶና። 26 ፓራና መላ ቢታን ቃደሳን ደእያ ሙሰኮ፥ አሮናኮነ እስራኤለ ማባራ ኡባኮ ይዶሶና። ኤንቲ በእዳባ አሳ ኡባስ ኦድዶሶና፤ ሄ ቢታፈ ኤክድ ይዳ አይፍያካ ኤንታ በስዶሶና።

27 ኤንቲ ሙሰኮ፥ "ኔኒ ኑና የድዳ ቢታ ብዳ፤ ሄ ቢታን ማነ ኤስ ጎጌስ፤ ሄ ቢታ አይፍያካ ሀይሳ በአ። 28 ሽን ሄ ቢታን ደእያ አሳይ ዎልቃማ፤ ኤንታ ካታማትካ ግምበ ድርሳን ድረትዳይሳታነ ግታ። ኑኒ ኡባፈ አድ ኤናቃ ኮቻታ ያን በእዳ። 29 አማለቃት ነገበ መላ ቢታን፤ ህተትነ፥ ያቡሰት ደረይ ዳርያ አሞረታ ቢታን፤ ቃስ ካናነት መደትራነ አባ ዶናንነ ዮርዳኖሰ ሻፋ ጋፃን ደኦሶና" ያግዶሶና።

30 ያትን ካለብ አሳ ሙሰ ስንን ስእ ኦድ፥ "ኑኒ ፆናናዉ ዳንዳእያ ግሾ፥ ሀእ ከይድ ሄ ቢታ የግስድ አነ ኦይኮስ" ያግስ።

31 ሽን ካለባራ ብዳ አሳት፥ "ሄ ቢታ አሳይ ኑፐ አድ ምንያ ግሾ፥ ኑኒ ኤንታ ፆናናዉ ዳንዳኦኮ" ያግዶሶና። 32 ኤንቲ ዩይድ ዎችዳ ቢታባ እስራኤለ አሳስ ሀይሳዳ ያግድ ኢታ ኦዳ ኦድዶሶና። "ኑኒ ዎችዳ ቢታይ ያን ደእያ አሳካ ምያ ቢታ፤ ያን ደእያ አሳይካ ዳሮ አዱሰ። 33 ኑኒ ያን ኤናቃ ኮቸ ግድዳ ንፍልመ አሳታ በእዳ። ኤንታ በእዳ አይፈን ኑና ፄልያ ዎደ ኑኒ ፃቆ መላ፤ ኤንትካ ኑና ሄሳዳ በኦሶና" ያግዶሶና።