አሳ ዙዙን
1 ሄ ዎደ ቃማ ማባራ ኡባይ ባንታ ቃላ ቁ ኦድ ዬክዶሶና። 2 እስራኤለ አሳይ ሙሰ ቦላነ አሮና ቦላ ዙዙምዶሶና። ኩመ ማባራይ፥ "ኑኒ ግብፀ ቢታን ደእሸ ዎይኮ ሀ መላ ቢታን ሀይቅዳ ግዶርኮ። 3 ኑኒ ማሻን ዉራና መላ ጎዳይ ሀ ቢታ ኑና አይስ ኤሂ? ኑ ማቸትነ ኑ ናይት ድኤታና፤ ሄሳ ሀናናፐ ጉየ ግብፀ ስሞይ ኑስ ኬሄኔ?" ያግዶሶና። 4 ኤንቲ እሶይ እሱዋኮ፥ "ኑና ካለያ አስ ዶርድ ጉየ ግብፀ ስሞስ" ያግዶሶና።
5 ያትን፥ ሙሰይነ አሮን ሄ በሳን ሺቅዳ እስራኤለ ማባራ ስንን ሶምኦራ ሳአን ጉፋንዶሶና። 6 ቢታ ዎቻናዉ ብዳ አሳ ግዶፈ ናወ ናኣ እያሱይነ ዮፎና ናኣ ካለብ ባንታ ማኡዋ ፔዶሶና። 7 እስራኤለ ማባራኮ፥ "ኑኒ ካን ከይድ ዎችዳ ቢታይ ዳሮ ሎኦ። 8 ጎዳይ ኑናን ኡፋይትያባ ግድኮ ማነ ኤስ ጎግያ ቢታ ኑና ገልሳና፤ ሄ ቢታ ኑስ እማና። 9 ሄሳ ግሾ፥ ጎዳ ቦላ ማካሎፍተ። ሄ ቢታ አሳስ ያዮፍተ፤ ኤንቲ ኑስ ኦይካ ግዶኮና። ኤንታዉ ኤሾይ ባዋ፤ ጎዳይ ኑራ ደኤስ፤ ህንተ ኤንታዉ ያዮፍተ" ያግዶሶና። 10 ያትን እስራኤለ ማባራይ ኤንታ ሹቻን ጫዳናዉ ደንድስ።
ሄ ዎደ ጎዳ ቦንቾይ ፆሳ ዱንካንያን እስራኤለ አሳ ኡባስ ቆንጭስ። 11 ጎዳይ ሙሰኮ፥ "ሀ አሳይ ታና ካይ አዉደ ጋካናሴ? ታኒ ኤንታ ግዶን ኦዳ ማላታታ በእሸ፥ አዉደ ጋካናዉ ታናን አማኖና እፃኔ? 12 ታኒ ኤንታ ጋዶን ሾጫዳ ይሳና፥ ሽን ነና ኤንታፈ ዳርያነ ምንያ ካዎተስ አዋ ኦና" ያግስ።
13 ሙሰይ ዛሪድ ጎዳኮ፥ "ኔኒ ነ ዎልቃን ሀ አሳ ግብፀፈ ከስዳይሳ ኤርያ ግብፀት ሄሳ ስእኮ ዎይጋኔ? 14 ኤንቲ ሄ ቢታን ደእያ አሳስ ሄሳ ኦዳና። አቤት ጎዳዉ፥ ኔኒ ሀ አሳራ ደኤይሳ ኤንቲ ስእዶሶና። አቤት ጎዳዉ፥ ኑኒ ነና በእዳይሳ፥ ነ ሻራይ ኑ ቦላ ኩያትዳይሳነ ጋላስ ሻራ ቱሳን፥ ቃማ ታማ ቱሳን ኔኒ ኑና ካለዳይሳ ኤንቲ በእዶሶና። 15 ያትን፥ ሀእ ኔኒ ሀ አሳ ኡባ እስ ቶሆ ዎ ይስያባ ግድኮ ነ ካሰ ኦዳይሳ ስእዳ ካዎተት፥ 16 ‘ጎዳይ፥ ሀ አሳስ እማና ግድ ጫቅዳ ቢታ ኤንታ ገልሳናዉ ዳንዳእቦና ግሾ መላ ቢታን ዎ ይስስ ያግድ’ ኦዳና።
17 "ሄሳ ግሾ፥ ጎዳዉ፥ ነ ዎልቃ ኑና በሳ፤ ነ ኑስ ገልዳ ቃላ ቆፓ። 18 ‘ጎዳይ ኤለ ሀንቀተና፤ ማሮትነ ሲቆይ ኩምዳይሳ ናጋራነ ጌላተ አቶ ገይሳ፤ ሽን ባልዳ ኡራ ሴሮና አገና። የልዳይሳታ ናጋራ ግሾ ሄንነ ኦይዳን የለተ ጋካናዉ ናይታ ሴራና’ ያጋዳሳ። 19 ሀ አሳይ ግብፀፈ ከዮሶፐ ዶማዳ ሀች ጋካናዉ ኤንታ ማርዳይሳዳ ነ መርና ሲቁዋን ሀ አሳ ናጋራ አቶ ጋርክ" ያግስ።
20 ጎዳይ ዛሪድ፥ "ነ ኦይችዳይሳዳ ታ ኤንታ ማራና። 21 ሽን ታ ደኦ ግደይሳዳነ ታ ቦንቾይ ሳአ ኡባ ኩምዳይሳዳ፥ 22 ሀ አሳፐ እስ አስካ ሄ ቢታ በኤና። ግብፀ ቢታንነ መላ ቢታን ኦዳ ማላታታ ሀ አሳት በእዶሶና፤ ሽን ኤንቲ ታሙ ቶሆ ታና ፓጭድ ታዉ ኪተቶና እፅዶሶና። 23 ሄሳ ግሾ፥ ታ ኤንታ ማይዛታስ እማና ጋዳ ጫቅዳ ቢታ ታና ካዳይሳታፐ እሶይካ ገለና። 24 ሽን ታ አይለይ ካለብ ኤንታፈ ዱማትያ ግሾነ ታና ፖሎ ዎዛናፐ ካልዳ ግሾ፥ እ ካሰ ዎችዳ ቢታ እያዉ እማና፤ እያ ዘረይካ ሄ ቢታ ላታና። 25 ሽን ሀእ አማለቃትነ ካናነት ዛንጋራን ደእያ ግሾ፥ ዎንቶ ዞኦ አባኮ ኤፍያ ኦግያ ኦይክድ መላ ቢታ ጉየ ስምተ" ያግስ።
ዙዙምዳ አሳ ሴረተ
26 ጎዳይ ሙሰኮነ አሮናኮ፥ 27 "ሀ ኢታ አሳይ ታ ቦላ አዉደ ጋካናዉ ዙዙማኔ? ታኒ እስራኤለ አሳ ዙዙን ስአስ። 28 ሄሳ ግሾ፥ ኔኒ ኤንታዉ ሀይሳዳ ጋዳ ኦዳ፤ ‘ታኒ ታ ደኡዋን ጫቃይስ፤ ህንተ ግዳይሳዳ ታ ህንተዉ ኦና።’ ታኒ፥ ጎዳይ ሀይሳ ኦዳይስ። 29 አሳይ ታይበትያ ዎደ ላይ ላታማነ እያፐ ቦላ ግድዳ አስ ኡባይ ታ ቦላ ዙዙምዳ ግሾ፥ ህንተ አሀይ ሀ መላ ቢታን ኩንዳና። 30 ዮፎና ናአ ካለባፐነ ናወ ናአ እያሱፐ አትሽን፥ ህንተፈ ኦንካ ታ ህንተና ላትሳናዉ ጫቅዳ ሄ ቢታ ገለና። 31 ህንተ፥ ‘ኑ ናይት ድኤት አታና’ ግዳ ህንተ ናይታ፥ ሄ ህንተ ካዳ ቢታ ገልሳና፤ ሄ ቢታይ ኤንታዉ ላታ ግዳና። 32 ሽን ህንተ አሀይ ሀ መላ ቢታን ኩንድድ አታና። 33 ህንተ አማነትቦና ግሾ፥ ህንተፈ ዉርሰ አሀይ ሀ መላ ቢታን ኩንዳና ጋካናዉ፥ ህንተ ናይት ሀ መላ ቢታን ዋየትሸ ኦይታሙ ላይ ዶርሰ ሄማና። 34 ህንተ ቢታ ዎችዳ ኦይታሙ ጋላሳ ታይቦን፥ እስ ጋላሳስ እስ ላይ፥ ኦይታሙ ላይ ህንተ ናጋራ ግሾ ዋየታና፤ ሄ ዎደ ታ ህንተ ቦላ አይ መላ ሀንቀትዳኮ ህንተ ኤራና። 35 እስፈ ታ ቦላ ደንድዳ ሀ ኢታ ማባራ ቦላ ታ ሀይሳዳ ኦና፤ ኤንቲ ሀ መላ ቢታን ኩንድ አታና ሀይሳን ኤንቲ ሀይቃና፤ ታ ጎዳይ ሀይሳ ኦዳይስ" ያግስ።
36 ሄ ቢታ ዎቻና መላ ሙሰይ ኪትዳ አሳት ስሚድ፥ ሄ ቢታባ ኢታ ኦዳ ኦድድ፥ ሙሰ ቦላ አሳይ ዙዙማና መላ ኦዳይሳት፥ 37 ጎዳ ስንን ቦሻን ሀይቅዶሶና። 38 ሄ ቢታ ዎቻናዉ ብዳ አሳፐ ዮፎና ናአይ ካለብነ ናወ ናአይ እያሱ ፃላል አትዶሶና።
39 ሙሰይ ሄሳ እስራኤለ አሳስ ኦድዳ ዎደ አሳይ ዳሮ ዬክስ። 40 ዎንተ ጋላስ ዎንታ ጉራ ደንድድ፥ ገዘ ቢታ ከይድ፥ "ኑኒ ናጋራ ኦዳ፥ ሽን ሀእ ጎዳይ ኑስ እማና ግዳ በሳ ፑደ ከያና" ያግዶሶና።
41 ሽን ሙሰይ ኤንታኮ፥ "ጎዳ ኪታ ህንተ አይስ መንቲ? ህንተዉ ሀነና። 42 ጎዳይ ህንተራ ዶና ግሾ፥ ቦፕተ፤ ህንተ ሞርከት ህንተና ፆናና። 43 አማለቃ አሳራነ ካናነ አሳራ ህንተ ኦለትድ ማሻን ሀይቃና። ጎዳስ ህንተ ኪተቶና እፅዳ ግሾ፥ ጎዳይ ህንተራ ዴና" ያግስ።
44 ሽን ኤንቲ ጎዳ ጫቆ ታቦተይነ ሙሰይ ጉታፐ ደንዶና ደእሽን፥ ደረይ ዳርያ ቢታ ባናዉ ምንድ ደንድዶሶና። 45 ያንን ደረይ ዳርያ ቢታን ደእያ አማለቃ አሳይነ ካናነ አሳይ ኤንታ ኦላን ፆንድ፥ ሆርማ ጋካናዉ ኤንታ የደዶሶና።