ታይቦ ማፃፋ 31

ምድያመ ቦላ ደንድዳ ኦላ

1 ጎዳይ ሙሰኮ፥ 2 "እስራኤለ አሳ ቆህዳ ግሾ ምድያመ አሳ ኦላዳ ሀሎ ከያ፤ ሄሳፈ ጉየ፥ ኔኒ ሀይቃዳ ነ ማይዛታ ጋካና" ያግስ።

3 ሄሳ ግሾ፥ ሙሰይ አሳኮ፥ "ምድያመ አሳ ኦልድ ጎዳ ሀሎ ከያና መላ ህንተ ግዶፈ ጉ አሳ ኦላስ ዳንጭስተ። 4 እስ እስ እስራኤለ ኮቻፈ እስ ሙኩሉ አደ አሳ ኦላስ የድተ" ያግስ።

5 ሄሳ ግሾ፥ እስ እስ እስራኤለ ኮቻፈ እስ እስ ሙኩሉ አሳይ ከይድ፥ ታማነ ናምኡ ሙኩሉ ኦላንቾት ኦላስ ጊግዶሶና። 6 ሙሰይ ካህንያ አላዛራ ናኣ ፕንሃሳ አዋተን፥ እስ እስ ኮቻፈ እስ እስ ሙኩሉ አስ ዶርድ ኦላስ የድስ፤ ፕንሃስ ብሸ ጌሻ ሚሸታነ ማላስ ፑንያ ዛየ ኤክድ ብስ። 7 ጎዳይ ሙሰ ኪትዳይሳዳ፥ ኤንቲ ምድያመ አሳ ኦልድ አደ ኡባ ዎዶሶና። 8 እቻሹ ምድያመ ካዎታ፥ ኤዋ፥ ረቄማ፥ ዙራ፥ ሁራነ ሬባ ጌተትያ አሳታ ዎዶሶና፤ ቃስ ብኦራ ናኣ ባላማካ ማሻን ዎዶሶና። 9 እስራኤለ አሳይ ምድያመ ማጫሳነ ናይታ ድእዶሶና፤ ኤንታ መህያ፥ ዶርሳነ ዴሻ ዉድያነ ኤንታ ሚሸ ኡባ ድእዶሶና። 10 ኤንቲ ደእያ ካታማታነ ኤንታ ጉታታ ኡባ ፁግዶሶና። 11 አሳ መህያነ ደእዳባ ኡባ ኤክድ ብዶሶና። 12 ኤንቲ ድእዳ አሳ፥ መህያነ ሻሎ ኡባ እያርኮፈ ሄፍንን፥ ዮርዳኖሰ ሻፋ ማታን ደእያ ሞአበ ደንባን ዱንካንዳ ሙሰኮ፥ ካህንያ አላዛራኮነ እስራኤለ ማባራኮ ኤህዶሶና።

13 ሙሰይ፥ ካህነያ አላዛርነ ማባራ ሀላቃት ኡባይ ዱንካንዳ ጉታፐ ጋፃ ከይድ ኤንታና ሞክዶሶና። 14 ሙሰይ ኦላፐ ስምዳ ቾራ ሞጮናታ፥ ሻላቃታነ ማቶ ሀላቃታ ቦላ ሀንቀትስ። 15 ሙሰይ ኤንታኮ፥ "ማጫሳ ኡባ አይስ ዎቤከቲ? 16 ኤንቲ ባላማ ዞርያ ስእድ፥ ፐኦራ ጌተትያ በሳን እስራኤለ አሳይ ጎዳ አግድ፥ ቦሻን ሀይቃናዳ ኦዳይ ማጫሳ ግደይሳ ዶግደቲ? 17 ሄሳ ግሾ፥ ሀእ አደ ናይታነ አደራ አቅዳ ማጫስ ኡባ ዎተ። 18 ሽን አደራ አቅቦና ማጫ ናይታ ኡባ ህንተዉ አሽተ። 19 ህንተ ግዶፈ አሰ ዎዳ አስ ዎይኮ አሀ ቦችዳ ኦንካ ጉታፐ ጋፃን ላፑን ጋላስ ኡቶ፤ ሄን ጋላሳንነ ላፑን ጋላሳን ህንተናነ ህንተ ድእዳ አሳ ጌሽተ። 20 ሄሳዳካ ማኦ ኡባ፥ ጋልባፈ፥ ዴሻ እክሰፐነ ምፈ ኦሰትዳባታ ኡባ ጌሽተ" ያግስ።

21 ካህነይ አላዛር ኦላፐ ስምዳ ኦላንቾታኮ፥ "ጎዳይ ሙሰስ እምዳ ህግያ ማራይ ሀይሳ፤ 22 ዎርቃ፥ ብራ፥ ናሰ፥ ብራታ፥ ቆርቆሮ፥ እርሳሰ፥ 23 ታማን ሜተቶናባት ኡባይ ታማን ጌያናዉ በሴስ። ሽን ታማን ሜተትያባት ጌሾ ሃን ጌያናዉ በሴስ። 24 ላፑን ጋላሳን ህንተ ማኡዋ ሜጭተ፤ ህንተና ጌሽተ። ሄሳፈ ጉየ፥ ጉታ ገልተ" ያግስ።

ድእዳባ ሻከትዶሶና

25 ጎዳይ ሙሰኮ፥ 26 "ኔራ፥ ካህንያ አላዛራራነ እስራኤለ ማባራ ሀላቃት ድኤትዳ አሳነ መህያ ታይብተ። 27 ኦላ ብዳይሳታስነ ቦናይሳታስ ናምኡ ከስድ ሻክተ። 28 ኦላ ብዳይሳታ ግሹዋፐ አሰ ግድን ሚዝ ግድን ሀረ ግድን ዶርሰ ዎይኮ ዴሸ ግድን እቻሹ ፄታፐ እስኖ ጎዳስ እምተ። 29 ኤንታ ግሹዋፐ ኤክዳ ጎዳ እሞታ ካህንያ አላዛራስ እምተ። 30 ሀንኮ እስራኤለታ ጋክዳ ግሹዋፐ፥ አሰ ግድን ሚዝ ግድን ሀረ ግድን ዶርሰ ዎይኮ ዴሸ ግድን እሻታማፈ እስኖ ኤክድ ጎዳ ዱንካንያ አዋተን አይስያ ሌወታስ እምተ" ያግስ። 31 ሙሰይነ ካህነይ አላዛር ጎዳይ ኪትዳይሳዳ ኦዶሶና።

32-35 ኦላንቾት ባንታዉ ኤክን አትዳ ድኦይ 675,000 ዶርሳታ፥ 72,000 ሚዛታ፥ 61,000 ሀረታነ 32,000 ጌላኦ ማጫ ናይታ። 36 ኦላ ብዳይሳታ ጋክዳ ግሾይ 337,500 ዶርሳታ፤ 37 ኤንታፈ ጎዳስ እመትዳይ 675. 38 ሚዛት 36,000፤ ኤንታፈ ጎዳስ እመትዳይ 72. 39 ሀረት 30,500፤ ኤንታፈ ጎዳስ እመትዳይ 61. 40 ማጫሳት 16,000፤ ኤንታፈ ጎዳስ እመትዳይ 32. 41 ጎዳይ ሙሰ ኪትዳይሳዳ ጎዳ እሞታ ካህንያ አላዛራስ እሚስ።

42-46 ኦላ ቦና እስራኤለ ማባራ ጋክዳ ግሾይ ኦላ ብዳ አሳ ግሹዋራ እስ ግና፤ እካ 337,500 ዶርሳታ፥ 36,000 ሚዛታ፥ 30,500 ሀረታነ 16,000 ጌላኦ ማጫ ናይታ። 47 እስራኤለ ማባራ ጋክዳ ግሹዋፐ እሻታሙ አሳፐነ መህያፐ እሶ እሶ ከስድ ጎዳይ እያ ኪትዳይሳዳ ጌሻ ዱንካንያ አዋተን አይስያ ሌወታስ እሚስ።

48 ሄሳፈ ጉየ፥ ቶራ ሞጮናት፥ ሻላቃትነ ማቶ ሀላቃት ሙሰኮ ሺቅድ፥ 49 "ኑኒ ነ አይለት ኑ አዋተ ጋርሳን ደእያ ኦላንቾታ ታይብን እሶይካ ፓጭቤና። 50 ጎዳይ ኑ ሸምፑዋ አሽዳ ግሾ፥ ኑ እሶይ እሶይ ኤክዳ ዎርቃ አሌቆታ፥ ሳጋዮታ፥ ቶሆ አልቦታ፥ ምግዶታ፥ ሀይ ዎርቃታነ ቆ ዎርቃታ ጎዳስ እማናዉ ኤክድ ይዳ" ያግዶሶና። 51 ሙሰይነ ካህነይ አላዛር ዎርቃ አሌቆታ ኡባ ኤንታፈ ኤክዶሶና። 52 ሻላቃትነ ማቶ ሀላቃት ጎዳስ እምዳ ዎርቃይ ናምኡ ፄቱ ክሎ ግራመ ግድስ። 53 ሀንኮ ኦላንቾት ኤህዳ ድኡዋ ባንታዉ ኤክዶሶና። 54 ሙሰይነ ካህነይ አላዛር ሻላቃታፐነ ማቶ ሀላቃታፐ ኤክዳ ዎርቃ ጎዳ ስንን እስራኤለ አሳ ሀሳይስያባ ኦድ ጌሻ ዱንካንያ ግዶ ኤህዶሶና።