ታይቦ ማፃፋ 18

ካህነታነ ሌወታ ኦሱዋ

1 ጎዳይ አሮናኮ፥ "ጌሻ ዱንካንያን ኦሰትያ ናጋራስ ኔኒ፥ ነ አደ ናይትነ ነ አዋ ሶ አሳይ ኦይሸታና፤ ህንተ ካህነተ ኦሱዋን ፖለትያ ናጋራ ነነ ነ አደ ናይታ ፃላል ኦይሸታና። 2 ኔንነ ነ አደ ናይት ጌሻ ዱንካንያ ስንን ኦያ ዎደ ህንተና ኦድ ማዳና መላ ሌወ ኮቸ ግድዳ ነ ዳቦታ ኤሀ። 3 ኤንቲ ህንተፈ ጋርሳን ጌሻ ዱንካንያ ኦሶ ኡባ ኦና፤ ሽን ኤንትካ ህንተካ ሀይቆና መላ ኤንቲ ጌሻ ዱንካንያ ሚሽያኮነ ያርሾ በሳኮ ሺቆፖ። 4 ኤንቲ ህንተራ እስፈ ግድድ ጌሻ ዱንካንያን ደእያ ኦሶ ኡባ ኦ። ሽን ሌወታፐ አትሽን፥ ሀራ አስ ኦንካ ህንተ ደእያ በሳ ሺቆፖ። 5 ዛሪድ እስራኤለ አሳ ቦላ ሀንቆይ ዎና መላ ጌሻ ዱንካንያንነ ያርሾ በሳን ኦሰትያ ኦሱዋ ህንተ ፃላላ ኦተ። 6 ሌወታ፥ ህንተ ዳቦታ፥ እስራኤለ አሳ ግዶፈ ታ ዶራስ። ኤንቲ ጌሻ ዱንካንያ ኦሱዋ ኦና መላ ታኒ ኤንታ ታዉ ዱማያስ። 7 ሽን ያርሾ በሳንነ ማጋራጁዋፈ ጋ ባጋን ደእያ ኦሱዋ ነነ ነ አደ ናይታ ፃላል ኦተ። ካህነተ ኦሱዋ ታኒ ህንተዉ እሞታ ኦዳ እማስ፤ ሀራ አስ ኦንካ ሄ በሳ ሺቅኮ ሀይቆ" ያግስ።

8 ጎዳይ አሮናኮ፥ "እስራኤለ አሳይ ታዉ እምያ ጌሻ እሞታ ኡባ ታ ነዉ እማስ። ታኒ ነዉነ ነ አደ ናይታስ መርና ግሾ ኦዳ እማስ። 9 ታዉ እመትያ ዳሮ ጌሻ እሙዋፐ ታማን ፁገቶና ባጋይ ህንተባ ግዳና። ኤንቲ ታዉ እምያ ጌሻ እሞ ኡባይ ካ ያርሾ ግድን ናጋራ ያርሾ ግድን ናቆ ያርሾ ግድን ነዉነ ነ አደ ናይታስ ግዳና። 10 ህንተ ሄሳ ጌሻ በሳን ሚተ፤ አደ ኡባይ ሄሳ ሞ፤ ሄስ ህንተዉ ጌሽ ግዳና።

11 "ቃስ እስራኤለ አሳይ ታዉ ያርሽያ ዩሾ ያርሾ ኡባ ነዉ፥ ነ አደ ናይታስነ ነ ማጫ ናይታስ መርናዉ ግሾ ኦዳ እማስ፤ ህንተ ሶ አሳ ግዶን ዎጋዳ ቱና ግዶና ኡባይ ሄሳ ሞ።

12 "እስራኤለ አሳይ ታዉ ባይራ ኦድ እምያ ኮይሮ አይፍያፐ፥ ሻማሆ ዛይተ ኡባ፥ ያላጋ ዎይነ ኡባነ ካ ኡባ ነዉ እማስ። 13 ኤንቲ ጎዳስ ኤህያ ጋደን ኮይሮ ጋክዳ አይፈይ ህንተሳ፤ ህንተ ሶ አሳ ግዶን ዎጋዳ ቱና ግዶና ኡባይ ሄሳ ሞ።

14 "እስራኤለ አሳ ግዶፈ ጎዳስ ዱማትዳ ኡባይ ህንተሳ። 15 ባይራ የለትዳ አስ ዎይኮ መሄይ እስራኤለ አሳይ ጎዳስ እምዳ ኡባይ ህንተሳ። ሽን ባይራ የለትዳ አደ ናአነ ባይራ የለትዳ ጌሽ ግዶና መሄ ህንተ ዎዛናዉ በሴስ። 16 እስ አጌና ናይታ ዎዛናዉ ጌሻ ዱንካነን ኤረትዳ ምዛነን እቻሹ ብራ ሳንትመ ዎዞ ጋተ ቃንፅተ። 17 ሽን ኤንቲ ጌሽ ግድያ ግሾ መሄ፥ ዶርሰነ ዴሻ ባይራ ህንተ ዎዛናዉ ኮሸና። ኤንታ ሱ ያርሾ በሳ ቦላ ጉሳ፤ ጎዳስ ሳውያ ፁሳ ያርሾ ኦዳ ኤንታ ሞ አሹዋ ታማን ፁጋ። 18 አንጋሶይነ ኡሻቻ ገዳይ ዩሾ ያርሾን ነባ ግድዳይሳዳ ኤንታ አሾይካ ነባ። 19 እስራኤለ አሳይ ጎዳስ እምያ ጌሻ ያርሾ ኡባ ነዉ፥ ነ አደ ናይታስነ ነ ማጫ ናይታስ መርናዉ ግሾ ኦዳ እማስ። ሄስ ታኒ ኔራነ ነ ኮቻራ ጫቅያ መርና ጫቁዋ።"

20 ቃስካ ጎዳይ አሮናኮ፥ "ኤንታ ቢታፈ ነና ጋክያ ግሾይ ዎይኮ ላት ባዋ፤ እስራኤለ አሳ ግዶን ነ ላታይነ ነና ጋክያ ግሾይ ታና።"

21 ጎዳይ፥ "ሌወት ጌሻ ዱንካንያን ኦያ ኦሱዋስ ዳሞዘ ግዳና መላ እስራኤለ አሳይ ታዉ ኤህያ አስራታ ኡባ ኤንታዉ እማስ። 22 ሀችፈ ዶምድ እስራኤለ አሳይ ባንታ ናጋራ ጋሶን ሀይቆና መላ ጌሻ ዱንካንያኮ ሺቆፖ። 23 ጌሻ ዱንካንያ ግዶን ኦይሳትነ እያ ግዶን ፖለትያ ናጋራ ቶከይ ሌወታ። ሄስ የለተ ኡባስ መርና ዎጋ። ሌወታስ እስራኤለ አሳ ግዶን ላት ባዋ። 24 ሄሳ ግሾ፥ እስራኤለ አሳይ ጎዳስ እምያ አስራታ፥ ታ ሌወታስ እማስ። ታኒ፥ ኤንታዉ እስራኤለ አሳ ግዶን ላት ባዋ ግዳይ ሄሳሳ" ያግስ።

25 ቃስ ጎዳይ ሙሰኮ፥ 26 "ኔኒ ሌወታኮ ሀይሳዳ ያጋ፤ ታኒ ህንተዉ ላታ ኦዳ እምዳ አስራታ ህንተ እስራኤለ አሳፐ ኤክያ ዎደ ህንተ ሄ አስራታፐ አስራታ ጎዳስ እምተ። 27 ህንተ እሞይ ዉዱማፈ ሺቅዳ ካዳ ዎይኮ ጉምእያ በሳፈ ሀእ ከይዳ ዎይነዳ ህንተዉ ታይበታና። 28 ሄሳዳካ እስራኤለ አሳፐ ህንተ ኤክያ አስራታ ኡባፈ ዱማ እሞ ጎዳስ እምተ፤ ህንተ አስራታፐ ጎዳ ግሾ ግድዳ እሞታ ካህንያ አሮናስ እምተ። 29 ህንተ ኤክያ እሞታ ኡባፈ ሎኡዋነ ጌሻ ጎዳስ ግሾ ኦድ እማናዉ በሴስ። 30 ኡባፈ ሎኦ እሙዋ ህንተ እምያ ዎደ አትዳይስ ህንተዉ ቡከትያ ዉዱማ ካዳነ ጉምኤትያ ዎይንያዳ ታይበታና። 31 አትዳይስ ጌሻ ዱንካንያን ህንተ ኦያ ኦሱዋስ ዳሞዘ ግድያ ግሾ ህንተነ ህንተ ሶ አሳይ አዉንካ ማናዉ ዳንዳኤታ። 32 ሎኦ ባጋ ጎዳስ እምዳፐ ጉየ ህንተ ሚኮ ሄስ ህንተዉ ናጋራ ግደና። ሎኦ ባጋ ከሶና ደእሸ ሄ እሞታፐ ምድ ህንተ እስራኤለ አሳ እሞታ ቱንሶና መላ ናገትተ፤ ሄሳ ህንተ ኦና እፅኮ ህንተ ሀይቃና" ያጋዳ ሌወታስ ኦዳ።