ታይቦ ማፃፋ 22

ባላቅ ባላማ ፄግስስ

1 እስራኤለ አሳይ ደንድድ፥ እያርኮ ግናን፥ ዮርዳኖሰፐ ሄፍንን ደእያ ሞአበ ደንባን ዱንካንዶሶና።

2 እስራኤለ አሳይ አሞረታ ቦላ ኦዳይሳ ኡባ ስፎራ ናአይ ባላቅ ስእስ። 3 እስራኤለ አሳይ ዳሮ ግድዳ ግሾ፥ ሞአበት ዳሮ ዳጋምድ ያይዶሶና። 4 ሞአበት ምድያመ ጭማታኮ፥ "ቦር ማታ ፕትድ ምድ ይሰይሳዳ ሀ ዉደ አሳይ ኑ ዩሹዋን ደእያ ኡባ ምድ ይሳና" ያግዶሶና።

ሄ ዎደ ሞአበ ካዎይ፥ ስፎራ ናአይ ባላቅ፥ 5 አማዋ ቢታን፥ ኤፍራፂሳ ሻፋ ማታን፥ ፓቶራ ካታማን ደእያ ብኦራ ናኣ ባላማኮ ሀይሳዳ ያግድ ኪትስ። "ግብፀፈ ከይዳ ዳሮ አሳይ ቢታ ኡባ ማእድ፥ ታ ማታን ዱንካንዶሶና። 6 ኤንቲ ታፐ ዳሮ ዎልቃማ ግድያ ግሾ፥ ሀያና ያዳ ኤንታ ባዳርክ። ኦን ኤር፥ ታ ኤንታ ፆናናዉነ ቢታፈ ከሳናዉ ዳንዳአና። ህዛ፥ ኔኒ አንጀይስ አንጀተይሳ ቃስ ኔኒ ባደይስ ባደትዳባ ግደይሳ ታኒ ኤራይስ" ያግስ።

7 ሞአበ ጭማትነ ምድያመ ጭማት ባደ ሚሽያ ኤክድ ባላማኮ ብድ ባላቅ ግዳይሳ እያዉ ኦድዶሶና። 8 ባላም ኤንታኮ፥ "ሀች ቃማ ሀይሳን አቅተ፤ ጎዳይ ታዉ ኦደይሳ ታ ህንተዉ ኦዳና" ያግስ። ያንን፥ ሞአበ ሀላቃት ባላማራ ጋምእዶሶና።

9 ፆሳይ ባላማ፥ "ሀይሳቲ ኔራ ደእያ አሳት ኦኔ?" ያግድ ኦይችስ።

10 ባላም ፆሳኮ፥ "ሞአበ ካዎይ፥ ስፎራ ናአይ ባላቅ፥ 11 ‘ግብፀፈ ከይዳ ዳሮ አሳይ፥ ኤንቲ ቢታ ኡባ ኩምዶሶና። ኔኒ ያዳ፥ ኤንታ ባዳርክ። ኦን ኤር፥ ታ ኤንታ ፆናናዉነ ቢታፈ ከሳናዉ ዳንዳኦና አግከ’ ያግድ ኤንታ ታኮ ኪትስ" ያግስ።

12 ያትን ፆሳይ ባላማኮ፥ "ኔኒ ኤንታራ ቦፓ፤ እስራኤለ አሳይ አንጀትዳ ደረ ግድያ ግሾ፥ ኔኒ ኤንታ ባዶፋ" ያግስ።

13 ዎንተ ጋላስ ዎንታ ባላም ደንድድ፥ ባላቃ ሀላቃታኮ፥ "ታኒ ህንተራ ቦናዳ ጎዳይ ድግዳ ግሾ፥ ህንተ ቢታ ስምተ" ያግስ።

14 ሞአበ ሀላቃት ባላቃኮ ጉየ ስሚድ፥ "ባላም ኑራ ዮና እፅስ" ያግዶሶና።

15 ዛሪድ ባላቅ ካሰይሳታፐ አ ቦንቸትዳነ ታይቦን ዳሮ ሀላቃታ እያኮ ኪትስ። 16 ኤንቲ ባላማኮ ብድ፥ "ስፎራ ናአይ ባላቅ፥ ‘ኔኒ ታኮ ያናይሳ ነና አይብካ ተቆፎ። 17 ታ ነዉ ዳሮ ዎይቶ እማና፤ ነ ኦይችያባ ኡባ ታ ነዉ ኦና። ሀያና ያዳ ሀ አሳ ባዳርክ’ ያግስ" ያግድ ኦድዶሶና።

18 ሽን ባላም ኤንታኮ፥ "ባላቅ ሀር አቶሽን ባ ካዎተን ኩምዳ ብራነ ዎርቃ ታዉ እምያባ ግድኮካ ጎዳ፥ ታ ፆሳ ኪታ መንዳ አይኮካ ፓጭሳናዉ ዎይኮ ጉጃናዉ ዳንዳእከ። 19 ጎዳይ ታዉ በሲያ ሀራባይ ደእኮ ታ ኤራና መላ ህንተካ ሀች ቃማ ሀይሳን አቅተ" ያግስ።

20 ሄ ቃማ ፆሳይ ባላማኮ፥ "ሀ አሳይ ነና ፄጋናዉ ይዳ ግሾ፥ ኔኒ ኤንታራ ባ፤ ሽን ታ ነዉ ኦደይሳ ፃላላ ኦ" ያግስ።

ባላማነ እያ ሃሪዉ

21 ያትን ዎንተ ጋላስ ባላም ባ ሃሪው ኮርድ ሞአበ ሀላቃታራ ብስ። 22 ሽን እ ብያ ግሾ ፆሳይ ሀንቀትስ። ሄ ዎደ ባላም ባ ሃሪው ቶግድ፥ ባ ናምኡ አይለታራ ብሽን ጎዳ ኪታንቾይ እያ ተቃናዉ ኦገን ኤቅስ። 23 ጎዳ ኪታንቾይ ማሻ ሾድድ ኦገን ኤቅዳይሳ ሀሪያ በአዳ፥ ኦግያ አጋዳ ጎሻ ግዶ ገላሱ። ባላም ሀሪው ኦገን ዛራናዉ ሾጭስ።

24 ያትን፥ ጎዳ ኪታንቾይ ናምኡ ዎይነ ጋደታፐ ግዶን ያ ባጋራነ ሀ ባጋራ ግምበን ድረትዳ ፁን ኦገን ኤቅስ። 25 ሀርያ ጎዳ ኪታንቹዋ በእዳ ዎደ ግምበ ድርሳኮ ሺቅዳ፥ ባላማ ቶሁዋ ግምበ ድርሳራ ኦይሱ፤ ያትን እ ሃሪው ናምአን ሾጭስ።

26 ሄሳፈ ጉየ፥ ጎዳ ኪታንቾይ ስን አድ፥ ሀድርስ ዎይኮ ኡሻች ስማናዉ ኦገይ ባይና ፁን በሳን ኤቅስ። 27 ሀርያ ጎዳ ኪታንቹዋ በአዳ፥ ባላም ቶግድ ደእሽን ዝንአሱ፤ ባላም ዳሮ ይሎትድ፥ ባ ፃምአን ሃሪው ሾጭስ። 28 ሄሳፈ ጉየ፥ ጎዳይ ሀረይ ዶና ዶይን፥ ሀርያ ባላማ፥ "ታ ነዉ አይ ኢስን ታና ሄ ቶሆ ሾጫዲ?" ያጋሱ።

29 ባላም ዛሪድ፥ "ኔኒ ታና ይሎይዳ ግሾሳ፤ ታ ኩሸን ማሽ ደእያባ ግድያኮ ታ ነና ሀእ ዎናሽን" ያግስ።

30 ሃሪያ ባላማኮ፥ "ኔኒ ሀች ጋካናዉ ቶግያ ነ ሃሪው ግድክና? ታኒ ነዉ ሀይሳዳ ሀና ኤርያና?" ያጋሱ።

ባላም ዛሪድ፥ "ሀና ኤራካ" ያግስ።

31 ሄ ዎደ ጎዳይ ባላማ አይፍያ ዶይን፥ ጎዳ ኪታንቾይ ሾደትዳ ማሻ ኦይክድ ኦገን ኤቅዳይሳ በእስ። እ ልች ግድ ሶምኦራ ሳአን ጉፋንስ። 32 ጎዳ ኪታንቾይ፥ "ነ ሃሪው ሄ ቶሆ አይስ ሾጫዲ? ነ ኦገይ ታ ስንን ጌላ ግድያ ግሾ ታ ነና ተቃናዉ ያስ። 33 ሀርያ ታና በአዳ ታ ስንፈ ሄ ቶሆ ሀራ ሶ ስማሱ። ሀርያ ሀራ ሶ ስማቦናባ ግድያኮ፥ ሀኖደ ታ ነና ዎዳ ሀርው አሻናሽን" ያግስ።

34 ባላም ዛሪድ፥ "ታኒ ናጋራ ኦስ፤ ኔኒ ታና ተቃናዉ ኦገ ቦላ ኤቅዳይሳ ታ ኤራብከ። ነ ዶሶናባ ግድኮ ታ ሀእ ጉየ ስማና" ያግስ።

35 ሽን ኪታንቾይ ባላማኮ፥ "ኔኒ ሀ አሳታራ ባ፤ ሽን ታ ነዉ ኦደይሳ ፃላላ ኦዳ" ያግስ። ያትን፥ ባላም ባላቃ ቢታ ሀላቃታራ ብስ።

36 ባላም የይሳ ባላቅ ስእዳ ዎደ አርኖና ሻፋ ጋፃን ባ ቢታ ዛዋን ደእያ ሞአበታ ካታማን እያ ሞካናዉ ብስ። 37 ባላቅ ባላማኮ፥ "ኔኒ ኤለሳዳ ያና መላ ታ ኪታብክና? ኔኒ አይስ ታኮ ኤለሳዳ ያብኪ? ታኒ ነዉ ኩሸ ዛራናዉ ዳንዳእክና?" ያግስ።

38 ባላም ባላቃኮ፥ "ሄኮ፥ ሀእ ታ ኔኮ ያስ፤ ሽን ታ አይኮካ ታፐ ጋናዉ ዳንዳእከ። ፆሳይ ታና ኦዳ ግዳባ ፃላላ ኦዳና" ያግስ። 39 ያትን፥ ባላም ባላቃራ ቅርያት-ሀፆታ ካታማ ብስ። 40 ያን ባላቅ መሄነ ዶርሰ ያርሽድ፥ አሹዋፐ ጉራ ባላማስነ እያራ ደእያ ሀላቃታስ እሚስ።

41 ዎንተ ጋላስ ባላቅ ባላማ ባሞት-ባኣል ጌተትያ በሳ ከስስ፤ ባላም ያን ኤቅድ እስራኤለ አሳፐ ባጋ በእስ።