ታይቦ ማፃፋ 15

ያርሾ ዎጋ

1 ጎዳይ ሙሰኮ፥ 2 "እስራኤለ አሳ ሀይሳዳ ያጋ፤ ህንተ ዳና መላ ታ ህንተዉ እምያ ቢታ ገልያ ዎደ፥ 3 ፁሳ ያርሾ ግድን ዎይኮ ጋሶ ያርሾ ግድን ዎይኮ ዶሳን ያርሽያ ያርሾ ግድን ዎይኮ ባኣለ ጋላሳ ያርሾ ግድን፥ መሄፐ ዎይኮ ዶርሳፈ ጎዳስ ታማን ፁገትያ ሳውያ ያርሾ ያርሽተ። 4 ያርሹዋ ያርሽያ ኡራይ ካ ያርሹዋስ እስ ክሎ ግራመ ሎኦ ለ ሳይሶ ልትሮ ሻማሆ ዛይተን ሙኑቀትዳይሳ ኤሆ። 5 ቃስ ፁሳ ያርሾስ ዎይኮ ሀራ ያርሾስ ኤህያ እስ እስ ዶርሳራ ሳይሶ ልትሮ ዎይነ ኡሻ ያርሾ ኦድ ጊግስተ። 6 ማራዘ ያርሽያ ዎደ ናምኡ ክሎ ግራመ ሎኦ ለ እስ ልትሮነ ባጋ ሻማሆ ዛይተን ሙኑቀትዳይሳ ኤህተ። 7 ኡሻ ያርሹዋስ ስኮ ልትሮ ዎይነ ኡሻ ያርሹዋስ ኤህተ። ሄስ ጎዳስ ሳውያ ያርሾ ግዳና። 8 ጋሶ ዎይኮ እስፈተ ያርሾስ ዎፋኖ ፁሳ ያርሾ ኦዳ ጎዳስ ያርሽያ ዎደ፥ 9 ዎፋኑዋራ እስፈ ሄ ክሎ ግራመ ሎኦ ለ፥ ናምኡ ልትሮ ሻማሆ ዛይተን ሙኑቀትዳይሳ ካ ያርሾ ኦዳ ኤሀ። 10 ኡሻ ያርሹዋስ ባጋ ልትሮ ዎይነ ኡሻ ኤህተ። ሄስ ጎዳስ ሳውያ ፁሳ ያርሾ ግዳና።

11 "እስ እስ ዎፋኖይ ዎይኮ እስ እስ ማራዘይ ዎይኮ እስ እስ ኮለይ ያርሸትያ ዎደ ሀይሳዳ ሀንድ ኦሰቶ። 12 ዳሮ መሄይ ያርሸትያ ዎደ ያርሸትያ ካ ያርሾይካ ሄሳዳ ዳሮ። 13 እስራኤለ አስ ግድዳ ኦንካ ሳውያ ፁሳ ያርሾ ጎዳስ ያርሽያ ዎደ ኡባን ሀይሳዳ ኦናዉ ኮሼስ። 14 ያና የለተን ህንተ ግዶን ደእያ በተ ዎይኮ ሀራ አስ ኦንካ ሳውያ ፁሳ ያርሾ ጎዳስ ያርሻናዉ ኮይኮ ሄሳዳ ኦናዉ ኮሼስ። 15 ህንተዉነ ህንተ ግዶን ደእያ በተ አሳስ ሄ ዎጋይ እስኖ፤ ሄስ ያና የለተስካ ኤቅድ ዳና ዎጋ፤ ህንተካ በተ አሳትካ ጎዳ ስንን እስኖ። 16 ህንተዉነ ህንተ ግዶን ደእያ በተ አሳስ ህገይነ ዎጋይ እስኖ" ያግስ።

17 ጎዳይ ሙሰኮ፥ 18 "እስራኤለ አሳስ ሀይሳዳ ጋዳ ኦዳ፤ ታኒ ህንተና ኤፍያ ቢታ ህንተ ገልድ፥ 19 ሄ ቢታን ካፅያ ካ ህንተ ምያ ዎደ ሄ ካፈ ፄራ ከስድ ህንተ ጎዳስ ያርሽተ። 20 ሄስካ፥ ባይራ ካፅዳ ካፈ ኡክዳ ኮይሮ ኡይ፥ ግድሽን፥ ካ ቡክያ ዉዱማፈ እምያ ያርሾ ኦድ ያርሽተ። 21 የለተ ኡባን ህንተ ቢታን ካፅዳ ካፈ ኮይሩዋ ኡክድ ጎዳስ ያርሾ ያርሽተ።

22 "ጎዳይ፥ ሙሰስ ኦድዳ ኪታ ህንተ ኤሮና እፅድ ናጎና አትኮ፥ 23 ዎይኮ ጎዳይ እያ ባጋራ እምዳ ኪታ ኡባ፥ ጎዳይ እምዳ ጋላሳፐ ዶምድ ያና የለተ ጋካናዉ ናጎና እፅኮ፥ 24 ቃስ ሄሳ እስራኤለ ማባራይ ኤሮና ኦዳባ ግድኮ ማባራ ኡባይ ጎዳስ እስ ዎፋኖ ሳውያ ፁሳ ያርሾ ኦድ፥ ዎጋይ ኪተይሳዳ ካ ያርሹዋራነ ኡሻ ያርሹዋራ ያርሾ፤ ቃስ ናጋራ ያርሾ ኦድ እስ ኮለ ያርሾ። 25 ካህነይ ኩመ እስራኤለ ማባራስ ናጋራ አቶተ ያርሾ ሺሼስ። ኤንቲ ኤሮና ባልዳ ባንታ ናቁዋ ግሾ ጎዳስ ፁሳ ያርሾነ ናጋራ ያርሾ ያርሽዳ ግሾ ኤንታ ናጋራይ አቶ ጌተታና። 26 እስራኤለ ማባራይነ ኤንታ ግዶን ደእያ በተ አሳይ ኤሮና ሄ ባላ ኦዳ ግሾ አሳ ኡባ ናጋራይ አቶ ጌተታና።

27 "እስ አስ ኤሮና ናጋራ ኦኮ እስ ላይ ኮለ ናጋራ ያርሾ ኦድ ያርሾ። 28 ኤሮና ደእሸ ናጋራ ኦዳ ኡራስ ካህነይ ጎዳ ስንን ናጋራ አቶተ ዎጋ ፖሎ፤ እያ ናጋራይ አቶ ጌተታና። 29 ኤሮና ናጋራ ኦዳ ኡራስ ካህነይ ጎዳ ስንን ናጋራ አቶተ ዎጋ ፖሎ፤ እያ ናጋራይ አቶ ጌተታና።

30 "ሽን እስራኤለ አስ ግድን ዎይኮ በተ አስ ግድን ኤርሸ ኦቶሮን ናጋራ ኦያ ኡራይ ጎዳ ጫዬስ። ሄ ኡራይ ደርያ ግዶፈ ዮ። 31 ሄ ኡራይ ጎዳ ኪታ ኤርሸ ካዳ ግሾነ እያ ኪታ ካዉሽዳ ግሾ እያዉ ዮይ በሴስ። እያ ባላይ እያ ቦላ ግዶ" ያግስ።

ሳምባታ መንዳ ኡራ

32 እስ ጋላስ እስራኤለ አሳይ መላ ቢታን ደእሽን፥ እስ ኡራይ ሳምባታ ጋላስ ም ምፅሸ ኦይከትስ። 33 ሄ ኡራ አሳይ ሙሰኮ፥ አሮናኮነ እስራኤለ ማባራኮ ኤህዶሶና። 34 ኤንቲ እያ ቦላ ኦናባ ኤርቦና ግሾ ቃሾን ጋምእስዶሶና። 35 ሄሳፈ ጉየ ጎዳይ ሙሰኮ፥ "ሀ ኡራይ ሀይቃናዉ በሴስ፤ እስራኤለ ማባራይ ባንታ ጉታፐ ጋፃ ከስድ ሹቻን ጫድድ ዎ" ያግስ። 36 ያትን እስራኤለ ማባራ ኡባይ ጎዳይ ሙሰ ኪትዳይሳዳ፥ ጉታፐ ጋፃ ከስድ ሹቻን ጫድድ ዎዶሶና።

አፍላ ማጫራ ዎጋ

37 ጎዳይ ሙሰኮ፥ 38 "እስራኤለ አሳስ ሀይሳዳ ጋዳ ኦዳ፤ ህንተነ ያና የለተይ ህንተ አፍላ ጋፃን ማጫራ ከስድ ሄ ማጫራ ጋፃን ካሎሰ ቃጭና ስክተ። 39 ሄ ማጫራ ህንተ በእያ ዎደ ኡባን ታ ኪታታ፥ አኬክድ ፖሌታ፤ ታፐ ሃክድ ህንተ አይፍያ አሙዋነ ህንተ ዎዛና ቆፋ ካልድ ላመተከታ። 40 ሄ ማጫራ በእድ ህንተ ታ ኪታ ኡባ አኬክድ ፖላናነ ፆሳስ ዱማትዳይሳታ ግዳና። 41 ታኒ ጎዳ፥ ህንተ ፆሳ፤ ታ ህንተ ፆሳ ግዳናዉ ህንተና ግብፀፈ ከሳስ። ታኒ ጎዳ፥ ህንተ ፆሳ ያጋ" ያግስ።