ታይቦ ማፃፋ 27

ሰሎጳዳ ማጫ ናይታ ኦይሻ

1 ሰሎጳድ ሄፌራ ናአ፤ ሄፌር ጋላዳ ናአ፤ ጋላድ ማክራ ናአ፤ ማክር ምናሰ ናአ፤ ምናሰይ ዮሰፋ ናአ። ሰሎጳዳ ማጫ ናይት ማህሎ፥ ኖኦ፥ ሆግሎ፥ ምልኮነ ትርፆ። 2 ሀ ማጫ ናይት ጌሻ ዱንካንያ ፐንገን ሙሰ ስንን፥ ካህንያ አላዛራ ስንን፥ ሀላቃታ ስንንነ ማባራ ኡባ ስንን ኤቅድ፥ 3 "ኑ አዋይ መላ ቢታን ሀይቅስ፤ እ ባ ናጋራ ጋሶን ሀይቅስፐ አትሽን፥ ጎዳ ቦላ ደንድዳ ቆረ ካለይሳታ ግዶን ዴና። እያዉ አደ ናእ ባዋ። 4 ያትን፥ ኑ አዋይ አደ ናአ የልቦና ግሾ እያ ሱንይ እያ ኮቻ ግዶፈ ዋንድ ዪ? ኑ አዋ ዳቦታ ግዶን ኑስ ላታ ቢታ እማ" ግዶሶና።

5 ያትን፥ ሙሰይ ኤንታ ኦይሻ ጎዳ ስን ሺሽስ። 6 ጎዳይ ሙሰኮ፥ 7 "ሰሎጳዳ ማጫ ናይታ ኦይሻይ ልከ፤ ኤንታ አዋ ዳቦታ ግዶን ኔኒ ኤንታዉ ላታ ቢታ እማ፤ እያ ግሾይ ኤንታ ላታ ግዶ። 8 ቃስ እስራኤለ አሳኮ፥ ‘እስ አስ አደ ናአ የሎና ሀይቅኮ እያ ማጫ ናይት ላቶ። 9 እያዉ ማጫ ናእ ባይናባ ግድኮ እያ እሻት ላቶ። 10 እያዉ እሽ ባይናባ ግድኮ እያ አዋ እሻት ላቶ። 11 እያዉ አዋ እሽ ባይናባ ግድኮ እያ ማታ ዳቦይ ላቶ። ታኒ ጎዳይ ነና ኪትዳይሳዳ ሀይስ እስራኤለ አሳስ ዎጋ ግዶ’ " ያግስ።

ሙሰ በሳን እያሱ ዶረተ

12 ጎዳይ ሙሰኮ፥ "አባሪማ ዙማ ቦላ ከያዳ ታ እስራኤለ አሳስ እምዳ ቢታ በአ። 13 ነ በእዳፐ ጉየ፥ ነ እሻ አሮናዳ ነካ ሀይቃዳ ነ ማይዛታን ጋሄታና። 14 ፂና መላ ቢታን፥ ማርባ ሃ ማታን አሳይ ታ ቦላ ዙዙምዳ ዎደ ህንተ ናምአይ ኤንታ ስንን ታና ጌሽ ኦድ ቦንችቤከታ" ያግስ። (ማርባ ሃይ ፂና መላ ቢታን፥ ቃደሳ ጌተትያ በሳን ደእያ ፑልቶ።)

15 ሙሰይ ጎዳኮ፥ 16 "አሳ ኡባስ ደኦ እምያ ጎዳ ፆሳዉ፥ ነ አሳይ ሄንንቾይ ባይና ዉደ መላ ግዶናዳ፥ 17 ሀ አሳ ስንን ከያነ ገልያ ቃስ ኤንታ ካለድ ከስያነ ገልስያ እስ አስ ሀ ማባራ ቦላ ሹማ" ያግስ።

18 ጎዳይ ሙሰኮ፥ "አያናይ እያን ደእያ ናወ ናኣ እያሱ ኤካዳ ነ ኩሽያ እያ ቦላ ዎ። 19 እያ ካህንያ አላዛራ ስንንነ ማባራ ኡባ ስንን ኤሳዳ ኤንቲ በእሽን ሹማ። 20 እስራኤለ ኡባይ እያዉ ኪተታና መላ ነ ማታፐ እያዉ ሻካዳ እማ። 21 እካ ኡሪመን ጎዳ ሸንያ ኦይችድ ሻክያ ካህንያ አላዛራ ስንን ኤቆ። እያሱይነ እስራኤለ ማባራይ ኡባይ አላዛራ ኪታን ከዮነ ገሎ" ያግስ።

22 ሙሰይ ጎዳይ ኪትዳይሳዳ ኦስ፤ እያሱ ኤፍድ፥ ካህንያ አላዛራ ስንንነ ማባራ ኡባ ስንን ኤስስ። 23 ጎዳይ ኪትዳይሳዳ ሙሰይ ባ ኩሽያ እያ ቦላ ዎድ ሹምስ።