እስራኤለይ ስምቤና
1 እስራኤለ አሳይ፥ "ሃይተ! አነ ጎዳኮ ስሞስ። እ ኑና መንረስ፥ ሽን እ ኑና ኮላና፤ እ ኑና ማዱንፅስስ፥ ሽን እ ኑ ማዱን ቃቻና። 2 ናምኡ ጋላሳፐ ጉየ እ ኑና ፓና፤ ሄን ጋላሳን ኑ እያ ስንን ዳና መላ ኑና ደንና። 3 አነ ጎዳ ኤሮስ፤ እያ ኤራናዉ ምንድ ካሎስ። ፃልቀይ ዶለይሳዳ እ ቆንጫና፤ ቶርቸ እር የይሳዳ እ ኑኮ ያና" ያግዶሶና።
4 ጎዳይ፥ "ታ ህንተና ኤፍሬማ አሳ ዋቶ? ታ ህንተና ይሁዳ አሳ ዋቶ? ህንተ ሲቆይ ዎንታ ፃሳ መላ፤ ኤለስድ ይያ አካ መላ። 5 ሄሳ ግሾ፥ ታኒ ናበታ ባጋራ ህንተና ቃንፀረስ፤ ታ ዶናፐ ከይዳ ቃላን ህንተና ዎስ። ታ ፕርዳይ ህንተ ቦላ ፖኦዳ ዋጋግ ጋና። 6 ታ ያርሾ ግዶናሽን ማሮታ ኮያይስ፤ ፁሳ ያርሾ ግዶናሽን ፆሳ ኤሮ ኮያይስ።
7 "ሽን ኤንቲ አዳመዳ፥ ጫቆ መንዶሶና፤ ያን ታዉ አማነቶና እፅዶሶና። 8 ጋላዳ ካታማይ ሱ ጉክያ ኢታ ኦሶ ኦያ አሳይ ኩምዳ ካታማ። 9 ፓንጋት አሰ ዎናዉ ቆሰትድ ናገይሳዳ ካህነታ ጩጋይ ሄሳዳ ናጎሶና። ሴከማ ካታማ ኤፍያ ኦግያን ናግድ አሰ ዎኦሶና፤ ኤንቲ ዬላያ ዎራን ኦሶ ኦሶና። 10 ታኒ እስራኤለ አሳ ግዶን ዳጋንያባ በአስ። ኤፍሬማ ግዶን ላይማተ ደኤስ፤ እስራኤለይ ቱንስ።
11 "ይሁዳ፥ ታኒ ታ አሳ ድኡዋ ዛርያ ዎደ ነዉ ቃስ ጫካ ዎደ ጊግሳስ።