1 ሄሳ ግሾ፥ ነኖ ሀራታ ቦላ ፕርደይሶ፥ ኔኒ ጋሶያባይ ባዋ። ኔኒ ሀራታ ቦላ ፕርዳሸ፥ ሄ ኔኒ ፕርድያ ኡራ መላ ኦኮ፥ ኔኒ፥ ነ ቦላ ፕርዳሳ።✝2:1 ማቶ 7:1፤ ሉቃ 6:37. 2 ሄሳ መላ ኦሶ ኦይሳታ ቦላ ፆሳይ ፅሎ ፕርዳ ፕርደይሳ ኑ ኤሮስ። 3 ነኖ፥ ሄሳ መላ ኦሶ ኦይሳታ ቦላ ፕርደይሶ፥ ኤንቲ ኦይሳ መላ ኦይሶ፥ ኔኒ ፆሳ ፕርዳፈ አታናባ ዳኒ? 4 ዎይኮ ፆሳ ኬሀተ፥ ገንጫነ ዳንዳአ ዳሮተ ካዬ? ፆሳይ ነዉ ኬህዳይ ነና ናጋራፐ ዛራናዉ ግደይሳ ኤርክዬ?

5 ሽን ህንተዉ ሹቻ ዎዛንነ ስኦና ሀይ ደኤስ። ሄሳ ግሾ፥ ፆሳ ሀንቆይነ ፅሎ ፕርዳይ ቆንጭያ ጋላስ፥ ነ ቦላ ፕርዳይ ዳራና መላ ኦሳ። 6 ፆሳይ እሱዋስ እሱዋስ እያ ኦሱዋ መላ እማና።✝2:6 ማዝ 62:12፤ ሌም 24:12. 7 ሎኦ ኦሶን ምንድ፥ ጋላታ፥ ቦንቾነ ዮና ደኡዋ ኮየይሳታስ ፆሳይ መርና ደኡዋ እማና። 8 ሽን ባንታና ሲቀይሳታ፥ ቱማ እፀይሳታነ ኢታባ ኦናዉ ኮየይሳታ ቦላ ፆሳ ሀንቆይነ ፕርዳይ ያና። 9 ኢታባ ኦያ አሳ ኡባ፥ ኮይሮትድ አይሁደታ፥ ካልድ አይሁደ ግዶና አሳ መቶይነ ዋየይ ጋካና። 10 ሽን ፆሳይ ሎኦ ኦሶ ኦያ ኡባስ፥ ኮይሮትድ አይሁደታስ፥ ካልድ አይሁደ ግዶናይሳታስ ጋላታ፥ ቦንቾነ ሳሮተ እማና። 11 ፆሳይ ሶምኦ በእድ አሰ ሻከና።✝2:11 ዛረ 10:17.

12 ህገይ ባይና ናጋራ ኦዳ ኡባይ ህገይ ባይና ያና። ህገይ ደእሽን፥ ናጋራ ኦዳ ኡባይ ህገን ፕርደታና። 13 ፆሳ ስንን ፅለይሳት ህገ ናገይሳታፐ አትሽን፥ ህገ ስሳ ፃላላ ስኤይሳታ ግዶኮና። 14 ህገይ ባይና አይሁደ ግዶና አሳይ መን ህገይ ኪተይሳ ኦሶና። ኤንታዉ ፃፈትዳ ህገይ ባይና እፅኮካ ኤንቲ ባንታ ዎዛናን ህግያ ኤሮሶና። 15 ኤንታ ሀኖታይ፥ ህገ ኪታይ ኤንታ ዎዛናን ፃፈትዳይሳ በሴስ። ቃስ ኤንታ ካሀይ ኤንታ ቦላ ማርካቴስ። ኤንታ ቆፋይ እስ እስ ቶሆ ኤንታና ባላ ጌስ፤ እስ እስ ቶሆ ኤንታና ልከ ጌስ። 16 ታ ታማርስዳ ዎንገላ መላ ፆሳይ የሱስ ክርስቶሳ ባጋራ አሳ ዎዛናን ጌምዳ ቆፋ ፕርድያ ዎደ ሄስ ኤረታና።

17 ሽን ነ ነና አይሁደ ጋሳ፤ ህገን ዘምፓሳ፤ ፆሳን ጬቃሳ። 18 ነ ኦና መላ ፆሳይ ኮይያባይ አይበኮ ኤራሳ። ህግያ ታማርዳ ግሾ፥ ቱማ ግድያባ ዶራናዉ ኤራሳ። 19 ኔኒ ቆቀታ ካለይሳ፥ ቃስ ማን ደኤይሳታስ ፖኦ ግደይሳ ሻካ ኤራሳ። 20 ኔኒ ህግያፈ ደምዳ ኤራተንነ ቱማተን ኤያታ ኤርሰይሳነ ዮጋታ ታማርሰይሳ ግደይሳ ኤራሳ። 21 ያትን፥ ነ ሀራታ ታማርሰይስ ነ ነና አይስ ታማርስኪ? ኔኒ፥ "ካይሶቶፓ" ጋሸ፥ ኔኒ ነ ሁጰን ካይሶታዬ? 22 ኔኒ፥ "ላሞፋ" ጋሸ፥ ኔኒ ነ ሁጰን ላማዬ? ኔኒ ኤቃ እፃሸ፥ ኤቃይ ደእያ ኬ ቦንቃዬ? 23 ኔኒ ፆሳ ህግያን ጬቀታሳ፥ ሽን ህግያስ ኪተቶና እፃዳ ፆሳ ዬላያይ? 24 ጌሻ ማፃፋን፥ "ህንተ ጋሶን ፆሳ ሱንይ አይሁደ ግዶና አሳታን ጫየቴስ" ጌተትድ ፃፈትስ።✝2:24 እሳ 59:7-8.

25 ነ ህገስ ኪተትኮ፥ ነ ቃፃረተስ ማደይ ደኤስ፥ ሽን ኔኒ ህግያስ ኪተቶና እፅኮ ነ ቃፃረተይ ቃፃረትቦና መላ ግዴስ። 26 አይሁደ ግዶና አስ ቃፃረቶና ደእሸ፥ ህግያስ ኪተትኮ፥ ፆሳይ እያ ቃፃረትዳ መላ ታይበኔ? 27 ህንተ፥ አይሁደ አሳት፥ ህንተዉ ፃፈትዳ ህገይነ ቃፃሮይ ደእሽን፥ ህንተ ህገስ ኪተቶና እፅኮ፥ አይሁደ ግዶና አሳይ ቃፃረቶና እፅኮካ ህገስ ኪተትድ፥ ህንተ ቦላ ፕርዳና።*2:27 ህንተ ቦላ ፕርዳና፦ ኤንታ ሀኖታይ ዎይኮ ኤንታ ኪተተይ ህንተ ቦላ ፕርዳና።

28 ህዛ፥ ሱንን አይሁደ ግድዳ ኡባይ ቱማ አይሁደ ግደና። ቃስ ካረ አሳተ ቃፃሮይ ቱማ ቃፃሮ ግደና። 29 ሽን ቱማ አይሁደተ ጋ ባጋን አይሁደ ግደይሳ። ቱማ ቃፃረተ ፆሳ አያናን ኦሰትያ ዎዛና ቃፃረተፈ አትሽን፥ ፃፈትዳ ህግያን ኦሰትያ አሳተ ቃፃሮ ግደና። ሄ ኡራይ ጋላታ ፆሳፈ ኤኬስፐ አትሽን፥ አሳፐ ግደና።✝2:29 ዛረ 30:6.