ኤረትዳ ባኣለ ጋላሳታ
1 ጎዳይ ሙሰኮ ሀይሳዳ ያግስ፤ 2 እስራኤለ አሳስ ሀይሳዳ ያጋዳ ኦዳ፤ ጌሻ ሺቆ ያግድ አዋጅሸ፥ ህንተ ቦንቻናዉ በሲያ ኤረትዳ ጎዳ ባለት ሀይሳታ።
3 ህንተ ኡሱፑን ጋላስ ኦሶ ኦታ፥ ሽን ላፑን ጋላሳይ ህንተ ሸምፕያ ሳምባታ ጋላስ። ሄ ጋላስ ጌሻ ሺቆ ሺቅተ፤ አይ ኦሶካ ኦፕተ፤ ህንተ ደእያ በሳ ኡባን ሄስ ጎዳስ ሳምባታ።
ፓስካ ባዓለነ ኡይ ባኣለ
(ታይቦ 28:16-25)
4 ኤንታ ዎደን ዎደን ጌሻ ሺቆ ኦድ ህንተ ቦንቻናዉ በሲያ ኤረትዳ ጎዳ ባለት ሀይሳታ፤ 5 ኮይሮ አጌናን ታማነ ኦይዳን ጋላስ ሳእ ኦማርስያ ዎደ ጎዳ ፓስካይ ዶሜስ።
6 ሄ አጌናን ታማነ እቻሻን ጋላሳን ጎዳስ ኡይ ባኣለ ጋላሳይ ዶሜስ። ሄሳ ግሾ ላፑን ጋላሳታን እርሾይ ገልቦና ኡይ ሚተ። 7 ሄ ጋላሳታፐ ኮይሮ ጋላስ ጌሻ ሺቆ ሺቅተ፤ ኦሶ ኦፕተ። 8 ላፑን ጋላስ ኡባ ጎዳስ ፁሳ ያርሾ ያርሽተ፤ ላፑን ጋላሳን ጌሻ ሺቆ ሺቅተ፤ ኦሶ ኦፕተ።
ባይራ ካ
9 ጎዳይ ሙሰኮ ሀይሳዳ ያግስ፤ 10 እስራኤለ አሳስ ሀይሳዳ ያጋዳ ኦዳ፤ ታኒ ህንተዉ እምያ ቢታ ገልድ ህንተ ካ ጫክያ ዎደ፥ ሄ ካ ኮይሮ ምርቅያ ካህንያስ ኤህተ። 11 ጎዳይ ህንተባ ኤካና መላ ሳምባታ ካልያ ዎንተ ጋላስ ካህነይ ሄ ምርቅያ ጎዳ ስንን ቁ ኦድ ዩሾ። 12 ህንተ ምርቅያ ዩሽዳ ሄ ጋላስ ቦረይ ባይና እስ ላይ ማራዘ ፁሳ ያርሾ ኦድ ጎዳስ ሺሽተ። 13 ሄ ያርሹዋራ እስፈ ሻማሆ ዛይተራ ሙኑቀትዳ ናምኡ ክሎ ግራመ ሎኦ ለ ካ ያርሾ ኦድ ሺሽተ። ሄስ ጎዳስ ሳዎ ቶንኩ ግያ ፁሳ ያርሾ ግዳና፤ እያራ እስፈ እስ ልትሮ ግድያ ዎይነ ኡሽ ሺሽተ። 14 ሀ ያርሹዋ ህንተ፥ ህንተ ፆሳስ ሺሽያ ጋላሳይ ጋካናዉ፥ ዋቻ ካፈ ቃየ ዎይኮ ጫጫ ዎይኮ ኡክድ ሞፕተ። ሄስ ህንተ ደእያ በሳ ኡባን ያና የለተስ መርና ዎጋ ግዶ።
ካ ሺሾ ባኣለ
(ታይቦ 28:26-31)
15 ህንተ ዩሾ ያርሾ ምርቅያ ኤህዳ ሳምባታ ዎንተ ጋላሳፐ ዶምድ፥ ላፑን ሳምንታ ታይብተ። 16 ላፑን ሳምባታ ካልያ ዎንተ ጋላሳይ ጋካናዉ እሻታሙ ጋላስ ታይብተ፤ ዋቻ ካፈ ያርሾ ጎዳስ ሺሽተ። 17 ህንተ ደእያ በሳፈ ናምኡ ክሎ ግራመ ግድያ ሎኦ ልያን እርሾ የግድ ኡክዳ ናምኡ ኡይ ዩሾ ያርሾስ ኤክድ ዪተ። ሄስ ዋቻ ካፈ ጎዳስ ሺቅያ ያርሾ ግዴስ። 18 ሄ ኡይራ እስፈ ቦረይ ባይና እስ ላይ ግድዳ ላፑን ዶርሳ ኡርገታ፥ እስ ዎፋኖነ ናምኡ ማራዘታ ሺሽተ። ኤንታ ካ ያርሾራነ ኡሻ ያርሾራ እስፈ ጎዳስ ፁገትያ ሳዎ ቶንኩ ግያ ያርሾ ኦድ ያርሽተ። 19 ቃስ እስ ኮለ ናጋራ ያርሾስ፥ እስ ላይ ግድዳ ናምኡ ዶርሳ ኡርገታ እስፈተ ያርሾስ ሺሽተ።
20 ካህነይ ባይራ ካ፥ ኡይነ ናምኡ ዶርሳ ኡርገታ ዩሾ ያርሾ ኦድ፥ ጎዳ ስንን ቁ ኦድ ዩሾ። ሄሳት ጎዳስ ጌሽ፤ ካህነታስ ቃስ ግሾ። 21 ሄ ጋላስ ህንተዉ ጌሻ ሺቆ ግዳና መላ አዋጅተ፤ ኦሶ ኦፕተ። ሀይስ ህንተ ደእያ በሳ ኡባን ያና የለተስ መርና ዎጋ ግዶ።
22 ህንተ ቢታን ካፅዳ ካ ጫክያ ዎደ ጋድያ ጋፃ ጋካናዉ ጫኮፍተ፤ ጫክሽን አትዳ ፖሽልያ ቆሮፕተ፤ ሄሳ ማንቆታስነ በተ አሳስ አጋግተ። ታኒ ጎዳ ህንተ ፆሳ።
ሞይዘ ፑኖ ባኣለ
(ታይቦ 29:1-6)
23 ጎዳይ ሙሰኮ ሀይሳዳ ያግስ፤ 24 እስራኤለ አሳስ ሀይሳዳ ያጋዳ ኦዳ፤ ላፑን አጌናን ኮይሮ ጋላሳ ሸምፖ ጋላስ ኦድ ቦንችተ፤ ሀሳይሶ ሞይዘ ፑንሸ ጌሻ ሺቆ ሺቅተ። 25 ሄ ጋላስ ጎዳስ ፁሳ ያርሾ ሺሽተፐ አትሽን፥ ኦሶ ኦፕተ።
ናጋራ አቶተ ጋላሳ
(ታይቦ 29:7-11)
26 ጎዳይ ሙሰኮ ሀይሳዳ ያግስ፤ 27 ላፑን አጌናን ታማን ጋላሳይ ናጋራ አቶተ ጋላስ፤ ሄ ጋላስ ጌሻ ሺቆ ሺቅተ። ሄ ጋላስ ህንተና ካዉሽተ፤ ጎዳስ ፁሳ ያርሾ ሺሽተ። 28 ሄ ጋላሳይ ጎዳ ህንተ ፆሳ ስንን ህንተ ናጋራይ ቁሸታና መላ ህንተ ናጋራ አቶተ ጋላስ ግድያ ግሾ ሄ ጋላሳን ኦሶ ኦፕተ። 29 ሄ ጋላስ ባናተ ካዉሾና አስ ኦንካ ባ አሳ ግዶፈ ኩረቶ። 30 ሄ ጋላስ ኦሶ ኦያ ኡራ ኦናካ ታኒ እያ አሳ ግዶፈ ኩራና። 31 ሄ ጋላስ ኦሶ ኦፕተ። ሀይስ ህንተ ደእያ በሳ ኡባን ያና የለተስ መርና ዎጋ ግዶ። 32 ሄስ ህንተዉ ዱማትዳ ሸምፖ ጋላስ፤ ሄ ጋላስ ህንተናተ ካዉሽተ። ሄ አጌናን ኡዱፉን ጋላስ ኦማርሳፈ ዶምድ፥ ታማን ጋላስ ኦማርስ ጋካናዉ ህንተ ሳምባታ ቦንችተ።
ሻቃራ ባኣለ
(ታይቦ 29:12-40)
33 ጎዳይ ሙሰኮ ሀይሳዳ ያግስ፤ 34 እስራኤለ አሳስ ሀይሳዳ ያጋዳ ኦዳ፤ ላፑን አጌናን ታማነ እቻሻን ጋላሳፐ ዶምድ፥ ላፑን ጋላስ ጋካናዉ ጎዳስ ሻቃራ ባኣለ። 35 ሄ ጋላሳታፐ ኮይሮ ጋላሳን ጌሻ ሺቆ ሺቅተ፤ ኦሶ ኦፕተ። 36 ላፑን ጋላስ ኡባን ጎዳስ ፁሳ ያርሾ ሺሽተ፤ ሆስፑን ጋላሳን ጌሻ ሺቆ ሺቅተ። ጎዳስ ፁሳ ካ ያርሾ ሺሽተ። ሄ ጋላሳይ ባልያ ዉርሰ ጋላስ ግድያ ግሾ፥ ኦሶ ኦፕተ።
37 ፁሳ ያርሾ፥ ካ ያርሾ፥ ሀራ ያርሾታነ ኡሻ ያርሾ ኮሽያ ዎደን ጎዳስ ሺሻናዉ ጌሻ ሺቆ ኦድ አዋጃና ጎዳ ባለት ሀይሳታ። 38 ሀ ያርሾት ጎዳ ሳምባታታፐ፥ ጎዳስ እምያ እሞታታፐ፥ ቃንገ እሞታታፐነ ዶሳን እምያ እሞታታፐ ዱማ።
39 ህንተ ጋደን ካፅዳ ካ ሺሽዳፐ ጉየ፥ ታማነ እቻሻን ጋላሳፐ ዶምድ ላፑን ጋላስ ጋካናዉ ጎዳ ባኣለ ቦንችተ። ኮይሮ ጋላሳይነ ሆስፑን ጋላሳይ ህንተዉ ዱማ ሸምፖ ጋላስ ግዳና። 40 ኮይሮ ጋላስ ሎኦ ም አይፈ፥ ዛምባ ታሸ፥ ጭልኦ ም ሀይነ ሻፋ ጋፃን ድጭያ ም ሀይ ኤክድ፥ ጎዳ ህንተ ፆሳ ስንን ኡፋይትሸ ላፑን ጋላስ ባኣለ ቦንችተ። 41 ሄ ባልያ ላይን ላይን ላፑን አጌናን ላፑን ጋላስ ጎዳ ቦንችተ። ሄስ ያና የለተስ መርና ዎጋ ግዶ። 42 ሄ ላፑን ጋላሳ ሻቃራን ደእተ፤ እስራኤለ አስ ግድዳ ኡባይ ሄ ሻቃራን ደኦ። 43 ታኒ ህንተና ግብፀ ቢታፈ ከስዳ ዎደ ሻቃራን ዳና መላ ኦዳይሳ ያና የለተይ ኤራና። ታኒ ጎዳ ህንተ ፆሳ።
44 ሄሳዳ ኦድ፥ ሙሰይ ጎዳ ባለታ ቦንችያ ዎጋ እስራኤለ አሳስ ኦድስ።