ዎዞ ዎጋ
1 ጎዳይ ሙሰኮ ሀይሳዳ ያግስ። 2 እስራኤለ አሳስ ሀይሳዳ ያጋዳ ኦዳ፤ እስ አስ ጎዳስ አሰ እማናዉ ቃንግኮ፥ ዎዞ ጋትያ ነ ጋማትዳይሳ መላ ሄ ኡራ ግሾ ሚሸ ቃንፆ። 3 ላታሙ ላይፈ ብድ ኡሱፑን ታሙ ላይ ጋካናዉ ደእያ አደ ግድኮ ጌሻ ዱንካነን ኤረትዳ ምዛነን ኡሱፑን ፄቱ ብራ ሳንትመ ቃንፆ። 4 ማጫ ግድኮ ሀስታሙ ብራ ሳንትመ ቃንፆ። 5 እቻሹ ላይፈ ብድ ላታሙ ላይ ጋካናዉ ደእያ አደ ግድኮ ላታሙ ብራ ሳንትመ ቃንፆ፤ ቃስ ማጫስ ግድኮ ታሙ ብራ ሳንትመ ቃንፆ። 6 እስ አጌናፐ ብድ እቻሹ ላይ ጋካናዉ ደእያ አደ ግድኮ እቻሹ ብራ ሳንትመ ቃንፆ፤ ቃስ ማጫስ ግድኮ ሄ ብራ ሳንትመ ቃንፆ። 7 ላይ ኡሱፑን ታማነ እያፐ ቦላ ግድዳ አደ ግድኮ፥ ታማነ እቻሹ ብራ ሳንትመ፤ ቃስ ማጫስ ግድኮ ታሙ ብራ ሳንትመ ቃንፆ። 8 ቃንግዳ ኡራይ ኔኒ ጋማትዳይሳ ቃንፃናዉ ዳንዳኦና ማንቆ ግድኮ፥ እ ባ ቃንገ ጋናዉ እምዳ ኡራ ኤህድ ካህንያ ስንን ኤሶ፤ ቃንገትዳ ኡራይ ቃንፃናዉ ዳንዳኤይሳ ኬና ቆፕድ ካህነይ ጋማቶ።
9 እስ አስ ጎዳስ ያርሾ ኦድ እማናዉ ቃንግዳይ መሄ ግድኮ ጎዳስ እመትያ መሄ ኡባይ ጌሽ ግዴስ። 10 ሄ መህያ ግሾ ሀራ መሄ እሞፎ፤ ዎይኮ እያ ሀራ መሄራ ላሞፎ። ሎኡዋ ኢታራ ዎይኮ ኢታ ሎኡዋራ ላሞፎ፤ ሽን እ ላምኮ፥ ኮይሮ መሄይነ ላመ እምዳ መሄይ ናምአይካ ጌሽ ግዶ። 11 እስ አስ ጎዳስ ያርሾ ኦድ እማናዉ ገፕዳ መሄይ ጌሽ ግዶና እፅኮ፥ ሄ ኡራይ ሄ መህያ ካህንያ ስን ኤሆ። 12 ሎኦ ግድን፥ ኢታ ግድን ካህነይ ሄ መህያ ጋማቶ፤ ካህነይ ጋማትዳይስ እያዉ ጋተ ግዶ። 13 ሽን ሄ መህያ ጎዳይ ዛሪድ ዎዛናዉ ኮይኮ፥ ሄ መህያ ጋትያ ቦላ ፄታፐ ላታሙ ኩሸ ጉጆ።
14 እስ አስ ባ ኬ ጌሽ ኦድ ጎዳስ ዱማይኮ፥ ሎኦ ግድን፥ ኢታ ግድን ካህነይ ሄ ኬ ጋማቶ፤ ካህነይ ጋማትዳይስ እያዉ ጋተ ግዶ። 15 ባ ኬ ጌሽ ኦድ ጎዳስ ዱማይዳ ኡራይ ዛሪድ ዎዛናዉ ኮይኮ፥ ሄ ኬ ጋትያ ቦላ ፄታፐ ላታሙ ኩሸ ጉጆ፤ ስሚድ ኬይ እያባ ግዴስ።
16 እስ አስ ባ ላታ ጋድያፐ ሻክድ ጌሽ ኦድ ጎዳስ ዱማይኮ፥ ሄ ጋድያ ጋተይ እያን ዘረትያ ዘረን ጋማተቶ። ሄስካ ናምኡ ፄታነ ላታሙ ክሎ ግራመ ባንጋ ዘርያ ጋደ ግድኮ፥ እሻታሙ ሳቅለ ቃንፆ። 17 እ ባ ጋድያ እሻታማን ላይ ባለፐ ዶምድ ጌሽ ኦድ ጎዳስ ዱማይኮ፥ ሄ ጋድያ ኩመ ጋትያ ቃንፆ። 18 ሽን እ ባ ጋድያ እሻታማን ላይ ባለይ አን፥ ጌሽ ኦድ ጎዳስ ዱማይኮ፥ ካልድ ደእያ እሻታማን ላይ ባለይ ጋካናዉ ደእያ ላይታ ካህነይ ታይብድ፥ እያ ኩመ ጋትያፐ ዎ። 19 ሄ ጋድያ ጌሽ ኦድ ጎዳስ ዱማይዳ ኡራይ ዛሪድ ዎዛናዉ ኮይኮ፥ ጋማተትዳ ጋትያ ቦላ ፄታፐ ላታሙ ኩሸ ጉጆ፤ ስሚድ ጋደይ እያባ ግዴስ። 20 ሽን እ ጋድያ ዛሪድ ዎዛናፐ ስን ሀራ አሳስ ባይዝኮ፥ ሄ ጋድያ ዎዛናዉ ዳንዳኤና። 21 እሻታማን ላይ ባለይ ጋክን ጋደይ የደትያ ዎደ ሄ ጋደይ ናምአን ጉየ ስሞና ጎዳስ ጌሽ ግዶ፤ ሄ ጋደይ ካህነታባ ግዴስ።
22 እስ አስ ሀራ አሳፐ ሻምዳ ጋድያ ጌሽ ኦድ ጎዳስ ዱማያናዉ ኮይኮ፥ 23 ካልያ እሻታማን ላይ ባለይ ጋካናዉ ደእያ ጋትያ ካህነይ ጋማትኮ፥ ኡራይ ሄ ጋላስ ጋማትዳ ጋትያ ቃንፆ፤ ሄ ሚሸይ ጎዳስ ዱማትዳ ሚሸ ግዳና። 24 እሻታማን ላይ ባለይ ጋክያ ዎደ ሄ ጋደይ ኮይሮ ላታን ኤክድ ባይዝዳ ኡራስ ስሜስ።
25 ኤንታ ጋተይ ጌሻ ዱንካንያን ኤረትዳ ምዛነን ጋማተቴስ። (እስ ሳቅለይ ላታሙ ጌራ ግዴስ)።
26 ሽን ኦንካ ባይራ የለትዳ መሄ ጎዳስ ዱማይድ ሺሻናዉ ዳንዳኤና፤ እ ካሰካ ጎዳባ። ሚዝ ዎይኮ ዶርሰ ግድን ጎዳባ። 27 ሄ መሄይ ጌሽ ግዶና እፅኮ፥ እ ጋማተትዳ ጋትያ ቦላ እቻሻፐ እስ ኩሸ ጉጅድ እያ ጎዳይ ዛሪድ ዎዞ። እ ዎዞና እፅኮ፥ ጋማተትዳ ጋትያን ሀራ አሳስ ባይዘቶ።
28 እስ አስ ጎዳስ ዱማይድ እምዳባይ አይባ ግድኮካ፥ አሰ ዎይኮ መሄ ዎይኮ እያ ላታ ጋደ ግድን፥ ባይዘተናነ ዎዘተና። እ ዱማይዳባ ኡባይ ጎዳስ ኡባፈ ጌሽ። 29 አሳ ግዶፈ ሀይቃና መላ ፕርደትዳ አስ ኦንካ ዎዘቶፎ፤ ሄ ኡራይ ሀይቆ።
30 ጋደን ካፅዳ ካ ዎይኮ ም አይፈ ግድን ታማፈ እሶይ ጎዳባ። ሄስ ጎዳስ ጌሽ። 31 እስ አስ ባ አስራታ ዎዛናዉ ኮይኮ፥ እያ ጋትያ ቦላ ፄታፐ ላታሙ ኩሸ ጉጅድ ዎዞ። 32 ሚዛ አስራታ ዎይኮ ዶርሳ አስራታ ዎይኮ ዴሻ አስራታ ግድን፥ ሄንንቹዋ ፃምአፈ ጋርሳራ አያ ታማፈ እሶይ ጎዳስ ጌሽ። 33 ታማን መሄይ ኢታ ግድን፥ ሎኦ ግድን ዶሮፖ፤ ዎይኮ እያ ሀራራ ላሞፎ። ላምኮ፥ ኮይሮይነ ላመ እምዳ ናምአይ ጎዳስ ጌሽ ግዶሶና፤ ዛሪድ ዎዛናዉ ዳንዳኤተና።
34 ሲና ዙማ ቦላ ጎዳይ ሙሰ ባጋራ እስራኤለ አሳ ኪትዳ ኪታይ ሀይሳ።