1 እስ አስ ባ በእዳባ ዎይኮ ባ ኤርያባ ማርካታና መላ ኦይሸትድ ማርካቶና እፅኮ ሄ ኡራይ ናጋራ ኦዳ ግሾ ሴረቶ።
2 እስ አስ ኤሮና ደእሸ ቱናባ፥ ሄስካ፥ ሀይቅዳ ዶአ ዎይኮ መሄ ዎይኮ ሳአራ ጎሸትያ ዶአታ ቦችኮ፥ ሄስ ቱና ግደይሳ እ ኤሮና እፅኮካ ቱና ግድያ ግሾ ባላ ግዴስ።
3 እስ አስ ኤሮና ደእሸ አሳ አሳተፈ ጎግድ ቱንስያባ ቦችኮ፥ ሄስ ቱና ግደይሳ እ ኤሮና እፅኮ፥ ቱና ግድያ ግሾ ባላ ግዴስ።
4 እስ አስ ኢታባ ግድን ሎኦባ ኦናዉ ኤሶን ጫቅኮነ ባ ጫቅዳይሳ ዶግድ፥ ጉየፐ እ አኬክዳ ዎደፐ ዶምድ ባላ ግዴስ።
5 እስ አስ ሀ ኦደትዳ ባላታፐ እሱዋ ኦዳባ ግድኮ ባ ኦዳ ናጋራ ፓፆ። 6 እ ባ ኦዳ ናጋራ ግሾ ጎዳስ ባ መህያ ግዶፈ ማጫ ዶርሰ ዎይኮ ማጫ ዴሸ ናጋራ ያርሾ ኦድ ሺሾ። ካህነይ ኤክድ ሄ ኡራ ናጋራ ቁሸስ ያርሻና።
7 እስ አስ ባ ኦዳ ናጋራ ግሾ ያርሻናዉ ዶርሰ ዎይኮ ዴሸ ሻማናዉ እያዉ ጋተይ ጋኮና እፅኮ ናምኡ ኩራቾታ ዎይኮ ናምኡ ሆለታ፥ እሱዋ ናጋራ ያርሾስ ቃስ እሱዋ ፁሳ ያርሾስ ኦድ ጎዳስ ኤሆ። 8 እ ኤንታ ካህንያስ እሞ፤ ካህነይ ናምኡ ሆለታፐ እሱዋ ቆያ ምርቅድ ዱናሽን፥ ናጋራ ያርሾ ኦድ ሺሾ። 9 ያትድ ሱፈ ጉራ ኤክድ፥ ያርሾ በሳ ማታን ዉርፆ፤ አትዳ ሱ ያርሾ በሳ ጋርሳን ጉሶ፤ ሄስ ናጋራ ያርሾ። 10 ሀንኮ ሆልያ ቃስ ህገይ ኪተይሳዳ ፁሳ ያርሾ ኦድ ፁጎ። ካህነይ ሀይሳዳ ኦድ፥ ኡራይ ኦዳ ናጋራ ቁሽሳናዉ ያርሾ ያርሼስ፤ ሄ ኡራ ናጋራይ አቶ ጌተታና።
11 ሽን እስ አስ ናምኡ ሆለ ዎይኮ ናምኡ ኩራቾ ኤሀናዉ ጋተይ ጋኮና እፅኮ፥ እስ ክሎ ግራመ ሎኦ ለ ባ ናጋራ ግሾ ያርሾ ኦድ ኤሆ። ሄ ለይ ናጋራ ያርሾ ግድያ ግሾ ዛይተይ ዎይኮ እፃነይ እያ ቦላ ጉዠቶፎ። 12 እ ሄሳ ኤህድ ካህንያስ እሞ፤ ካህነይ ሄ ልያፈ እስ ኩጫ ኤክድ፥ ጎዳስ ሺቅያ ካ ያርሹዋራ ጋድ፥ ቆፍሶ ኦድ ያርሾ በሳን ፁጎ፤ ሄስ ናጋራ ያርሾ። 13 እስ አስ ሀ ናጋራታፐ እሱዋ ኦኮ ሀይሳዳ ኦድ እያ ናጋራ ቁሽሴስ፤ ሄ ኡራ ናጋራይ አቶ ጌተታና። ሄ ያርሹዋፈ አትዳይስ ካ ያርሹዋዳ ካህንያስ ግዶ።
ናቆ ያርሾ
14 ጎዳይ ሙሰኮ ሀይሳዳ ያግስ፤ 15 ኦንካ ጎዳ ናቅኮነ ጌሻ ሚሸታ ቱንስድ ቆፖና ናጋራ ኦኮ ባ ናቁዋስ ባ መህያ ግዶፈ ቦረይ ባይና እስ ማራዘ ጎዳስ ኤሆ። እያ ጋተይ ጌሻ ዱንካነን ኤረትዳ ምዛነ ግናን ጭገቶ፤ ሄስ ናቆ ያርሾ። 16 እ ጌሻ ሚሸታ ቦላ ናጋራ ኦዳ ግሾ ኮይሮ ጭጋናዉ በሲያ ጋትያ ቦላ ፄታፐ ላታሙ ኩሸ ጉጅድ ካህንያስ እሞ። ካህነይ ሄሳ ማራዝያራ ጋ ያርሽድ ኡራ ናቁዋ ቁሽሴስ፤ እያ ናጋራይ አቶ ጌተቴስ።
17 እስ አስ ቆፖናሽን፥ ጎዳ ኪታታፐ እሱዋ መንድ ናጋራ ኦኮ እ ሄሳ ኤሮና እፅኮካ ባላ ግድያ ግሾ ባ ናጋራን ሴረቶ። 18 እ ባ መህያፐ ቦረይ ባይናነ ጋተ ኩንያ እስ ማራዘ ናቆ ያርሾስ ካህንያኮ ኤሆ። ካህነይ ሄ ማራዝያ ያርሽድ ኡራ ናቁዋ ቁሽሴስ፤ እያ ናቆይ አቶ ጌተቴስ። 19 እ ቱማፐ ጎዳ ናቅዳ ግሾ ሄስ ናቆ ያርሾ።