ናጋራ አቶተ ጋላሳ
1 አሮና አደ ናይት ናምአይ ጎዳ ስን ሺቅድ ሀይቅዳፐ ጉየ፥ ጎዳይ ሙሰኮ ሀይሳዳ ያግስ፦ 2 ታኒ ታቦትያ ናጋራ አቶተ ካማ ቦላ ሻራን ግዳዳ ቆንጭያ ግሾ ማጋራጁዋፈ ጉየን ደእያ ኡባፈ ጌሻ በሳ ባ ኮይዳ ዎደ ገልድ ሀይቆና መላ ነ እሻ አሮናስ ኦዳ። 3 አሮን ናጋራ ያርሾስ እስ ዎፋኖ፥ ፁሳ ያርሾስ እስ ማራዘ ኤክድ ኡባፈ ጌሻ በሳ ገሎ። 4 አሮን ሊኖፐ ኦሰትዳ ጌሻ አዱሳ ቃምሰነ ጋርሳራ ማኤትያ ማኦ ማኦ። ሊኖፐ ኦሰትዳ ዳንጮ ዳንጮ፤ ሄሳዳ ባ ሁጰን ሊኖፐ ኦሰትዳ ፃ ቃጨ ዎ። ሄ ማኦት ጌሽ ግድያ ግሾ፥ ማአናፐ ስን ባ አሳተ ሜጨቶ።
5 እስራኤለ ማባራይ ናጋራ ያርሾስ ናምኡ ኮለታ፥ ፁሳ ያርሾስ እስ ማራዘ አሮናስ ኤሆ። 6 አሮን ባ ናጋራስነ ባ ሶ አሳ ናጋራ አቶተስ እስ ዎፋኖ ያርሾ። 7 ሄሳፈ ጉየ፥ ናምኡ ኮለታ ጌሻ ዱንካንያ ፐንገን ጎዳ ስን ኤሆ። 8 ሄ ናምኡ ዴሻታ ኤክድ እሱዋ ጎዳሳ፥ እሱዋ ቃስ አዛዘላሳ16:8 አዛዘላሳ፦ እብራወ ዶናን መላ ቢታ የደተይሳ ጉሱ። ግድ ኤንታ ቦላ ሳማ የጎ። 9 አሮን ሳማን ጎዳስ ግድዳ ዴሻ ኤክድ ናጋራ ያርሾ ኦድ ያርሾ። 10 ሽን ሳማን አዛዘላስ ግድዳ ዴሻ አሳ ናጋራ አቶተስ መላ ቢታ የዳናዉ ፓፃ ደእሽን ጎዳስ ሺሾ።
11 አሮን ባ ናጋራስነ ባ ሶ አሳ ናጋራ አቶተስ እስ ዎፋኖ ናጋራ ያርሾ ኦድ ሺሾ። ያትድ ባ ናጋራ ግሾ ሄ ዎፋኑዋ ሹኮ። 12 ጎዳ ስንን ደእያ ያርሾ በሳፈ እፃነ ጩይስያ ሚሸን ቦንቆ ኩንድ፥ ሊቅድ ጋጨትዳ ሳውያ እፃነ ናምኡ ኩጫ ኤክድ ማጋራጁዋ ግዶ ገሎ። 13 ጎዳ ስንን ደእያ ታማን እፃነ ዎ። እ ሀይቆና መላ እፃንያ ጩያይ ታቦትያ ቦላ ደእያ ናጋራ አቶተ ካማ ካሞ። 14 ዎፋኑዋ ሱፈ ጉራ ኤክድ፥ ባ ብራያ የድ ኤክድ አቶተ ካማ ስን ባጋ ዉርፆ። ናጋራ አቶተ ካማ ስን ባጋራ ደእያ በሳ ላፑን ቶሆ ዉርፆ።
15 ሄሳፈ ጉየ፥ አሳ ናጋራ ግሾ ግድያ ዴሻ ሹክድ፥ እያ ሱ ማጋራጁዋ ግዶ ኤህድ፥ ዎፋኑዋ ሱ ዉርፅዳይሳዳ ናጋራ አቶተ ካማነ ታቦትያ ስን ዉርፆ። 16 ኡባፈ ጌሻ በሳ እስራኤለ አሳ ቱናተፈነ ናጋራፐ ጌሼስ። ኤንቲ ቱናባ ኦሽን፥ ኤንታ ግዶን ደእያ ጌሻ ዱንካንያ ሀይሳዳ ኦድ ጌሾ። 17 አሮን ኡባፈ ጌሻ በሳ ገልድ፥ ባ ናጋራ፥ ባ ሶ አሳ ናጋራነ ኩመ እስራኤለ አሳ ናጋራ አቶተስ ያርሽድ ከያና ጋካናዉ፥ ኦንካ ጌሻ ዱንካንያ ግዶን ደኦፖ።
18 ሄሳፈ ጉየ፥ ጎዳ ስንን ደእያ ያርሾ በሳ ከይድ እያ ጌሾ። ዎፋኑዋ ሱፈነ ዴሻ ሱፈ ጉራ ኤክድ፥ ያርሾ በሳ ዩሹዋን ደእያ ካጨታ ትዮ። 19 ሄ ሱን ባ ብራያ የድ ኤክድ ላፑን ቶሆ ዉርፆ፤ ሄሳዳ ኦድ እስራኤለ አሳ ቱናተፈ ሄ ያርሾ በሳ ጌሾ።
20 አሮን ኡባፈ ጌሻ በሳ፥ ጌሻ ዱንካንያነ ያርሾ በሳ ጌሽያ ዎጋ ፖልዳፐ ጉየ፥ ፓፃ ደእያ ዴሻ ሺሾ። 21 አሮን ባ ናምኡ ኩሽያ ፓፃ ደእያ ዴሻ ሁጰን ዎድ፥ እስራኤለ አሳ ናቆ ኡባ፥ ኤንታ ማካላ ኡባ፥ ኤንታ ናጋራ ኡባ ፓፆ። ያትድ ሄ ዴሻ ሁጰን ሄሳ ቶሶ፤ ሄ ዴሻ ኤፋና መላ ጊግስዳ ኡራ ቦላ መላ ቢታ የዶ። 22 ዴሻይ ኤንታ ናጋራ ኡባ ቶክድ፥ አስ ባይና በሲ መላ ቢታ ቦ።
23 ሄሳፈ ጉየ፥ አሮን ጌሻ ዱንካንያ ብድ ኡባፈ ጌሻ በሳ ገሎ። ሊኖፐ ኦሰትዳ ካሰ እ ማእድ ገልዳ ማኡዋ ቃርድ ያን ዎ። 24 ጌሻ በሳን ባ አሳተ ሜጨትድ፥ ባ ካሰ ማኡዋ ማእ ከይድ ባ ናጋራነ አሳ ናጋራ አቶተስ ፁሳ ያርሾ ያርሽሶ። 25 ናጋራ ያርሹዋ ሞዋ ያርሾ በሳን ፁጎ።
26 ባዞ የደትያ ዴሻ ኤፍዳ ኡራይ ባ ማኡዋ ሜጮ፤ ባ አሳተ ሜጨቶ፤ ያት ስሚድ ጉታ ገሎ።
27 ናጋራ አቶተስ አሮን ኤንታ ሱ ኡባፈ ጌሻ በሳ ኤህዳ ዎፋኑዋነ ዴሻ ጋልባ፥ አትዳ አሹዋነ ቶጭያ ጉታፐ ጋፃ ከስድ ፁጎ። 28 ሄሳ ፁግዳ ኡራይ ባ ማኡዋ ሜጮ፤ ባ አሳተ ሜጨቶ፤ ሄሳፈ ጉየ፥ ጉታ ገሎ።
29 ሀይስ ህንተዉ መርና ዎጋ ግዶ፤ ላፑን አጌናይ ገልዳ ታማን ጋላስ ህንተና ካዉሽተ፤ ቢታ አዉ ናአ ግድን ዎይኮ ሀራ ቢታ አስ ግድን፥ አይ ኦሶካ ኦፍተ። 30 አይስ ጊኮ ሄ ጋላሳይ ህንተ ናጋራ አቶተ ደምያ ጋላስ፤ ህንተ ጎዳ ስንን ህንተ ናጋራ ኡባፈ ጌያና። 31 ሄስ ህንተዉ ግታ ሳምባታ ሸምፖ ጋላስ ግዳና። ሄ ጋላስ ህንተና ካዉሽተ፤ ሄስ ህንተዉ መርና ዎጋ ግዶ። 32 ቃስ ባ አዋ በሳን ካህነ ግዳና መላ ትየትያነ ዱማትያ ካህነይ ጌሽ ግድዳ ሊኖፐ ኦሰትዳ ማኡዋ ማእድ፥ ናጋራ አቶተ ዎጋ ፖሎ። 33 እ ኡባፈ ጌሻ በሳ፥ ገሻ ዱንካንያ፥ ያርሾ በሳ፥ ካህነታነ እስራኤለ አሳ ኡባ ጌሾ። 34 እስራኤለ አሳ ኡባ ናጋራ አቶተስ ላይን ላይን እስ ቶሆ ኦናዉ ሀይስ ህንተዉ መርና ዎጋ ግዶ። ጎዳይ ኪትዳይሳዳ ሙሰይ ኦስ።