ካህነታ ሹሞ ዎጋ
1 ጎዳይ ሙሰስ ሀይሳዳ ያግድ ኦድስ፤ 2 አሮናነ እያ አደ ናይታ፥ ኤንታራ እስፈ ካህነተ ማኡዋ፥ ትዮ ዛይትያ፥ ናጋራ ያርሹዋ ሹከትያ ኮርማ፥ ናምኡ ማራዘታነ፥ እርሾይ ገልቦና ኡከትዳ ኡይ ዎያ ጋይታ ኤካዳ ያ። 3 ቃስ እስራኤለ አሳ ኡባ ፄጋዳ ዱንካንያ ፐንገ ሺሻ።
4 ሙሰይ ጎዳይ ኪትዳይሳዳ ኦስ፤ አሳ ኡባይ ዱንካንያ ፐንገ ሺቅስ። 5 ሙሰይ አሳኮ፥ ታ ኦና መላ ጎዳይ ኪትዳይስ ሀይሳ።
6 ሙሰይ አሮናነ እያ አደ ናይታ ኤህድ ሃን ሜጭስ። 7 አሮና ማኡዋ ማይዝድ፥ ዳንጮ ዳንጭስስ፤ አዱሳ ማኡዋ ማይዝድ እያ ቦላ ኤፉደ ማኡዋ ማይዝስ። ኤፉድያ አሌቅስድ ዳድዳ ሳቅያን አሮና ፄሳራ ጋድ ቃችስ። 8 ኤፉድያ ቦላ ትራ ኪሰ ስክድ እያን ኡሪመነ ቱሚመ ዎስ። 9 አሮና ሁጰን ፃ ቃጨ ዎስ። ጎዳይ ሙሰ ኪትዳይሳዳ ፃ ቃጭያ ስን ባጋራ ጌሻ ዎርቃ ጉቸ ምስልያ ዎስ።
10 ሄሳፈ ጉየ ሙሰይ ትዮ ዛይትያ ኤክድ፥ ዱንካንያነ ዱንካንያ ግዶን ደእያ ሚሸ ኡባ ትይድ ዱማይስ። 11 ሄ ዛይትያፐ ኤክድ ያርሾ በሳ ቦላ ላፑን ቶሆ ዉርፅስ፤ እያ ሚሸታ፥ ሜቻ ከርያነ እያ ኡቱዋ ዱማያናዉ ሄ ዛይትያራ ትይስ። 12 ሄ ትዮ ዛይትያፐ ጉራ ኤክድ አሮና ሁጰን ትግድ እያ ዱማይስ። 13 ጎዳይ ሙሰ ኪትዳይሳዳ ሙሰይ አሮና አደ ናይታ ስን አድ ማኦ ማይዝድ ዳንጮ ዳንጭስስ። ኤንታ ሁጰን ፃ ቃጨ ዎስ።
14 ሙሰይ ናጋራ ያርሾስ ያርሸትያ ኮርማ ኤህስ፤ አሮንነ እያ አደ ናይት ሄ ኮርማ ሁጰን ባንታ ኩሽያ ዎዶሶና። 15 ሙሰይ ሄ ኮርማ ሹክድ እያ ሱን ባ ብራያ የድ ኤክድ፥ ያርሾ በሳን ደእያ ካጨታ ትይድ ያርሾ በሳ ጌሽስ። አትዳ ሱ ያርሾ በሳፈ ጋርሳን ጉስስ፤ ሄሳዳ ኦድ ያርሾ በሳ ፆሳስ ዱማይድ ጌሽስ። 16 ሙሰይ ኡሎ አሹዋ ካምዳ ሞዋ ኡባ፥ ትርያ ፄራ ባጋ፥ ክላሆታነ ኤንታ ካምዳ ሞዋ ኤክድ፥ ያርሾ በሳን ፁግስ። 17 ሽን ጎዳይ ሙሰ ኪትዳይሳዳ ኮርማ ጋልባ፥ አትዳ አሹዋነ ቶጭያ ጉታፐ ጋፃ ከስድ ፁግስ።
18 ሄሳፈ ጉየ ሙሰይ ፁሳ ያርሾስ ማራዘ ኤህስ፤ አሮንነ እያ አደ ናይት ሄ ማራዝያ ሁጰን ባንታ ኩሽያ ዎዶሶና። 19 ሙሰይ ሄ ማራዝያ ሹክስ፤ እያ ሱ ያርሾ በሳ ኦይዱ ማዛነታ ቦላ ዉርፅስ። 20 ሙሰይ ማራዝያ አሹዋ ቆሞን ቆሞን ቃንፀረስ፤ ሁጵያ፥ አትዳ አሹዋነ ሞዋ ፁግስ። 21 ጎዳይ ሙሰ ኪትዳይሳዳ ኡሎ አሹዋነ ገዳታ ሜጭድ፥ ኩመ ዶርሳ ጎዳስ ሳዎ ቶንኩ ግያ ፁሳ ያርሾ ኦድ ያርሾ በሳን ፁግስ።
22 ካህነት ሹመትያ ዎደ ሺቅያ ናምአን ዶርሳ ሙሰይ ኤህስ፤ አሮንነ እያ አደ ናይት ሄ ዶርሳ ሁጰን ባንታ ኩሽያ ዎዶሶና። 23 ሙሰይ ሄ ማራዝያ ሹክስ፤ እያ ሱፈ ኤክድ፥ አሮናስ ኡሻቻ ሀይ፥ ኡሻቻ ኩሽያ ዎጋ ብራያነ፥ ኡሻቻ ቶሁዋ ዎጋ ብራያ ትይስ። 24 ቃስ ሙሰይ አሮና አደ ናይታ ስን አድ፥ ሄ ሱፈ ኤክድ፥ ኤንታ ኡሻቻ ሀይ፥ ኡሻቻ ኩሽያ ዎጋ ብራያነ ኡሻቻ ቶሁዋ ዎጋ ብራያ ትይስ። ያትድ፥ ሙሰይ አትዳ ሱ ያርሾ በሳ ኦይዱ ማዛነታ ቦላ ዉርፅስ።
25 ሞዋ፥ ጎይናፐ ብድ ዞኮ መቀ ጋካናዉ ደእያ ሞዋ፥ ትርያ ፄራ ባጋ፥ ክላሆታነ ኤንታ ካምዳ ሞዋነ ኡሻቻ ገዳ ኤክስ። 26 ጎዳ ስንን ደእያ ጋይታፐ እርሾይ ባይና ኡከትዳ እስ ኡይ፥ ኡከትድ ዛይተን ትየትዳ እስ ኡይነ ሌኦን ኡከትዳ ኡይ ኤክድ ሞዋ ቦላነ ኡሻቻ ገዳ ቦላ ዎስ። 27 እ ሄ ካ ኡባ አሮና ኩሸንነ እያ አደ ናይታ ኩሸን ዎን፥ ጎዳ ስንን ዩሾ ያርሾ ኦድ ያርሽዶሶና። 28 ሙሰይ ሄ ካ ኤንታ ኩሸፐ ኤክድ፥ ፁሳ ያርሹዋራ ጋድ፥ ካህነታ ሹምያ ዎደ ጎዳስ ሳዎ ቶንኩ ግያ ያርሾ ኦድ ያርሾ በሳን ፁግስ። 29 ቃስ ሙሰይ አንጋሱዋ ኤክድ፥ ዩሾ ያርሾ ኦድ ጎዳ ስንን ያርሽስ። ጎዳይ ሙሰ ኪትዳይሳዳ፥ ካህነታ ሹምያ ዎደ ያርሸትያ ማራዝያ አሹዋፐ ሄስ ሙሰ ጋክያ ግሾ።
30 ሙሰይ ትዮ ዛይትያፐነ ያርሾ በሳን ደእያ ሱፈ ኤክድ፥ አሮና ቦላነ እያ ማኡዋ ቦላ፥ እያ አደ ናይታ ቦላነ፥ ኤንታ ማኡዋ ቦላ ዉርፅስ፤ አሮናነ እያ ማኡዋ፥ እያ ናይታነ ኤንታ ማኡዋ ዱማይስ።
31 ሙሰይ አሮናነ እያ አደ ናይታኮ ሀይሳዳ ያግስ፤ አሹዋ ዱንካንያ ፐንገን ካተ፤ አሮንነ እያ አደ ናይት ታ ኪትዳይሳዳ ጋይታን ደእያ ጌሻ ኡይራ ሚተ። 32 ሄ አሹዋፐነ ኡይፈ ፓላህዳይ ደእኮ ታማን ፁግተ። 33 ካህነታ ሹምያ ዎጋይ ላፑን ጋላስ ኤክያ ግሾ ሄ ዎጋይ ፖለትያ ላፑን ጋላሳይ ዉራና ጋካናዉ ዱንካንያ ፐንገፈ ካረ ከዮፕተ። 34 ጎዳይ ኪትን ሀች ፖለትዳ ዎጋይ ህንተ ናጋራ ቁቻናሳ። 35 ዱንካንያ ፐንገን ላፑን ጋላስ ኩመ ጋላስነ ቃማ ጋምእተ፤ ጎዳ ዎጋ ናግተ፤ እፅኮ ህንተ ሀይቃና። ታና ጎዳይ ኪትዳይ ሀይሳ። 36 አሮንነ እያ አደ ናይት ጎዳይ ሙሰ ባጋራ ኪትዳባ ኡባ ኦዶሶና።