ሌወታ ማፃፋ 11

ቱናነ ቱና ግዶና ዶአታ

1 ጎዳይ ሙሰኮነ አሮናኮ፥ 2 እስራኤለ አሳስ ሀይሳዳ ያግድ ኦድተ፤ "ቢታ ቦላ ደእያ መሄታፐነ ዶአታፐ ህንተ ማናይሳት ሀይሳታ፤ 3 ሹቁለይ ጳልቀትዳይሳታነ ዋሞትያ መሄታ ሚተ። 4 ሽን ዋሞትሸ ሹቁለይ ጳልቀቶናይሳታነ ሹቁለይ ጳልቀ ግድድ ዋሞቶናይሳታ ሞፕተ። ግማለይ ዋሞቴስ፥ ሽን ሹቁለይ ጳልቀቶና ግሾ፥ ህንተዉ ቱና ግዶ። 5 ጉፓለይ ዋሞቴስ፥ ሽን ሹቁለይ ጳልቀቶና ግሾ፥ ህንተዉ ቱና ግዶ። 6 ኤሸይ ዋሞቴስ፥ ሽን ሹቁለይ ጳልቀ ግዶና ግሾ፥ ህንተዉ ቱና ግዶ። 7 ጉዱን ሞፕተ፤ እያዉ ሹቁለይ ጳልቀ፥ ሽን ዋሞቶና ግሾ፥ እ ህንተዉ ቱና። 8 ህንተ ሄሳታ ሞፕተ፤ ኤንታ ባዉታ ቦቾፍተ፤ ኤንቲ ህንተዉ ቱና።

9 "ሃ ግዶን ደእያ መተ ኡባፈ ህንተ ማናይሳት ሀይሳታ፤ አባ ግዶን ዎይኮ ሻፋ ሃ ግዶን ደእያ ኡባፈ ቀፈይነ ፖቆይ ደእያ ኡባ ሚተ። 10 ሽን አባ ግዶን ዎይኮ ጎግያ ሃን ደእያ ቀፈይነ ፖቆይ ባይና መተት ህንተዉ ቱና ግድያ ግሾ ሞፕተ። 11 ሀይሳቲ ህንተዉ ቱና፤ ኤንታ ሞፕተ፤ ኤንታ ባዉታ ቦቾፍተ። 12 ቀፈይነ ፖቆይ ባይና ሃ ግዶን ደእያ መተት ኡባይ ህንተዉ ቱና።

13 "ካፎታፐ ህንተዉ ቱና ግድዳይሳትነ ህንተ ማናዉ በሶናይሳት ሀይሳታ፤ አርጋን፥ አንኮ፥ ሞሎ ካፎ፥ 14 ፅሎ፥ ጵርጮ ቆሞ ኡባ፥ 15 ቁሮ ኡባ 16 ያንቾ፥ ሶሎ፥ ቆለ፥ ጉቶ ኡባ፥ 17 ጉ ጉቶ፥ ሀዛዞ፥ ዲድን፥ 18 ሃ ኩቶ፥ ሽአ አንኮ፥ ዳረ አንኮ፥ 19 ስላጎ፥ ሳብሳነ እያ ቆሞ ኡባ፥ አያና ካፎነ ሽርሽቆ።

20 "ቀፈራ ደእያ ኦይዱ ቶሆን ሄመትያ ላፋ መተት ኡባይ ህንተዉ ቱና። 21 ግዶሽን፥ ቀፈይ ደእያ ኦይዱ ቶሆን ሄመተይሳታፐ ኤንታ ቶሁዋፐ ቦላራ ጉፓናዉ ማድያ ቶሆይ ደኤይሳታ ሚተ። 22 ሄሳትካ፥ ቦለ ቆሞ ኡባ፥ ፃቆ ኡባነ ሰረ ኡባ። 23 ሽን ሀራ ቀፈራ ደእያ ኦይዱ ቶሆይ ደእያ መተት ኡባይ ህንተዉ ቱና።

24 "ሀይሳቲ ህንተና ቱንሳና፤ ኤንታ ባዉታ ቦችያ ኦንካ ኦማርስ ጋካናዉ ቱና ግዳና። 25 ኤንታ ባዉታ ደንያ ኦንካ ባ ማኡዋ ሜጮ፤ ሽን ኦማርስ ጋካናዉ እ ቱና ግዶ። 26 ሹቁለይ ደእሸ ጳልቀ ግዶናይሳት ዎይኮ ዋሞቶናይሳት ኡባይ ህንተዉ ቱና፤ ኤንታ ቦችያ ኦንካ ቱኔስ። 27 ኦይዱ ቶሆታን ሄመትያ ዶአ ኡባፈ ግንደራ ሄመተይሳት ህንተዉ ቱና፤ ኤንታ ባዉታ ቦችያ ኦንካ ኦማርስ ጋካናዉ ቱኔስ። 28 ኤንታ ባዉታ ደንያ ኦንካ ባ ማኡዋ ሜጮ፤ ሽን ኦማርስ ጋካናዉ እ ቱና። ኤንትካ ህንተዉ ቱና።

29 "ሳአራ ሄመተይሳታፐ ሀይሳቲ ህንተዉ ቱና። ኤንትካ ግሮ፥ ኤጨረ፥ ዱማ ዱማ ኮቸ፥ 30 ጌገ፥ ሀይላሾ፥ ኮርቸ፥ ዋካላነ ሻቃንቾ። 31 ሳአራ ሄመትያ ኡባፈ ሀይሳቲ ህንተዉ ቱና፤ ኤንታ ባዉታ ቦችያ ኦንካ ኦማርስ ጋካናዉ ቱና ግዴስ። 32 ኤንታ ባዉታ ቦችያ አይ ሚሸይካ ቱና ግዴስ፤ ም ሚሸይ ዎይኮ ማኦይ ዎይኮ ጋልብ ዎይኮ ኦጎሮይ ቱና ግዴስ። ኤንታ ባዉታይ ቦችዳ ሚሸ ኡባይ ሃን ሙከትድ ኦማርስ ጋካናዉ ጋምኦ፤ ሄሳፈ ጉየ ጌሽ ግዳና። 33 ኤንታፈ እሱዋ ባዉታይ ኦቶ ግዶን ዎድ በንትኮ፥ እያ ግዶን ደእያባ ኡባይ ቱና፤ ሄ ኦቱዋ መንተ። 34 አይ ካ ግድን ሄ ኦቱዋ ግዶን ደእያ ሃፈ ፆክኮ፥ ሄ ካይ ቱና ግዴስ፤ ኡየትያባ ግድን፥ ሄ ኦቱዋ ግዶን ደእኮ ቱና ግዴስ። 35 ሄ ባዉታፐ እሶይ ዎዳ ሚሸ ኡባይ ቱና፤ ጮጨ ዎይኮ ኦቶ ግድኮካ መንተ፤ ኤንቲ ህንተዉ ቱና። 36 ሄ ባዉታይ ቦችዳ ኡባይ ቱና ግድኮካ ፑልቶይነ ሃ ኦል ቱነና። 37 ኤንታ ባዉታፐ እሶይ ዘረ ካ ቦላ ዎኮ፥ ሄስ ቱነና። 38 ሽን ሄ ዘረ ቦላ ሃ ጉክድ ስምን፥ ኤንታ ባዉታፐ እሶይ እያ ቦላ ዎኮ፥ ሄ ዘረይ ህንተዉ ቱና።

39 "ሜተትያ መሄታፐ እሶይ ባዉትኮ፥ እያ ባዉታ ቦችያ ኦንካ ኦማርስ ጋካናዉ ቱና። 40 ኦንካ ሄ መህያ ባዉታፐ ሚኮ፥ ባ ማኡዋ ሜጮ፤ ኦማርስ ጋካናዉ እ ቱና። ኦንካ እያ ባዉታ ቶክድ ደንኮ፥ ባ ማኡዋ ሜጮ፤ ኦማርስ ጋካናዉ እ ቱና።

41 "ሳአራ ጎሸትያ መተ ኡባይ ህንተዉ ቱና፤ እያ ሞፕተ። 42 ኡሎራ ጎሸትያባ ግድን፥ ኦይዱ ቶሆራ ሄመትያባ ግድን፥ ዳሮ ቶሆይ ደእያባ ግድን፥ ሳአራ ጎሸትያ መተ ኡባይ ህንተዉ ቱና ግድያ ግሾ ሞፕተ። 43 ሀ ሳአራ ጎሸትያ መተታን ህንተና ቱንሶፕተ፤ ኤንታ ጋሶን ህንተ አሳተ ቱንሶፕተ። 44 ታኒ ጎዳ፥ ህንተ ፆሳ። ታኒ ጌሽ ግድያ ግሾ፥ ህንተና ዱማይድ ጌሽ ግድተ። ሳአራ ጎሸትያባታን ህንተ አሳተ ቱንሶፕተ። 45 ታኒ ህንተዉ ፆሰ ግዳናዉ ህንተና ግብፀ ቢታፈ ከስዳ ህንተ ጎዳ። ሄሳ ግሾ፥ ታኒ ጌሽ ግድያ ግሾ፥ ህንተካ ጌሽ ግድተ።

46 "መሄ፥ ካፎ፥ ሃ ግዶን ቃፅያ መተ ኡባነ ሳአራ ሄመትያ መተ ኡባ ዎጋይ ሀይሳ። 47 ሄሳን ህንተ ቱናነ ቱና ግዶናይሳታ ግዶን፥ ቃስ ሜተትያነ ሜተቶና መተታ ግዶን ደእያ ዱማተ ሻክድ ኤራና።"