ሌወታ ማፃፋ 4

ናጋራ ያርሾ

1 ጎዳይ ሙሰኮ ሀይሳዳ ያግስ፤ 2 ኔኒ እስራኤለ አሳስ ሀይሳዳ ያጋዳ ኦዳ፤ ኦንካ ቆፖና ናጋራ ኦኮ ዎይኮ ጎዳ ኪታታፐ እሱዋ መንኮ፥ 3 ዶረትዳ ካህነይ ናጋራ ኦድ አሳ ጎመን ጋኮ፥ እ ባ ኦዳ ናጋራ ግሾ ቦረይ ባይና ዎፋኖ ጎዳስ ናጋራ ያርሾ ኦድ ኤሆ። 4 ሄ ዎፋኑዋ ጌሻ ዱንካንያ ፐንገ ኤህድ፥ ሁጰን ባ ኩሽያ ዎድ ጎዳ ስንን ሹኮ። 5 ዶረትዳ ካህነይ ዎፋኑዋ ሱፈ ጉራ ኤክድ ጌሻ ዱንካንያ ገልስድ፥ 6 ባ ብራያ ሱን የድ ኤክድ ጌሻ ዱንካንያ ማጋራጁዋ ስንን ጎዳ ስንን ላፑን ቶሆ ዉርፆ። 7 ካህነይ ጉ ሱ ኤክድ ጌሻ ዱንካንያን ጎዳ ስንን ሳውያ እፃነ ጩይስያ በሳን ደእያ ካጨታ ትዮ። አትዳ ሱ ጌሻ ዱንካንያ ገልያ ፐንገ ባጋራ ደእያ ፁሳ ያርሾ በሳ ጋርሳን ጉሶ። 8 ናጋራ ያርሾስ ሹከትዳ ዎፋኑዋ ሞዋ ኡባ፥ ኡሎ አሹዋ ማእዳ ሞዋ፥ 9 ናምኡ ክላሆታ፥ ኤንታ ካምዳ ሞያነ ትርያ ፄራ ባጋ ኤኮ። 10 እስፈተ ያርሾስ ሹከትዳ ዎፋኑዋ ሞዋ ከስዳይሳዳ እያፐ ሞዋ ከሶ። ካህነይ ፁሳ ያርሾ ኦድ ያርሾ በሳን ፁጎ። 11 ሽን ዎፋኑዋ ጋልባ፥ እያ አሹዋ ኡባ፥ እያ ሁጵያ፥ እያ ቶሆታ፥ ኡሎ አሹዋ፥ ቶጭያ፥ 12 አሹዋፐ አትዳይሳ ኡባ ጉታፐ ካረ ከስድ ብዶ የግያ ዎጋ መላ ጌሻ በሲ ኤፍድ ያን ታማን ፁጎ።

13 እስራኤለ ማባራ ኡባይ ቆፖና ናጋራ ኦኮነ ጎዳ ኪታታፐ እሱዋ መንኮ ሄስ ኤንታፈ ቆሰትኮካ ኤንታዉ ባላ ግድድ ታይበታና። 14 ኤንቲ ኦዳ ናጋራ አኬክያ ዎደ ናጋራ ያርሾስ ሀንያ ዎፋኖ ጌሻ ዱንካንያ ስን ኤሆ። 15 ማባራ ጭማት ባንታ ኩሽያ ዎፋኑዋ ሁጰን ዎድ ጎዳ ስንን ሹኮ። 16 ዶረትዳ ካህነይ ዎፋኑዋ ሱፈ ጉራ ኤክድ ጌሻ ዱንካንያ ግዶ ገሎ። 17 እ ባ ብራያ ሱን የድ ኤክድ ማጋራጁዋ ስን ባጋራ ጎዳ ስንን ላፑን ቶሆ ዉርፆ። 18 ቃስ ጉ ሱ ኤክድ፥ ጌሻ ዱንካንያ ግዶን ጎዳ ስንን እፃነ ጩይስያ በሳን ደእያ ካጨታ ቦላ ትዮ። አትዳ ሱ ጌሻ ዱንካንያ ገልያ ፐንግያ ባጋራ ደእያ ፁሳ ያርሾ በሳ ጋርሳን ጉሶ። 19 ሞ ኡባ ኤክድ ያርሾ በሳን ፁጎ። 20 ሀ ዎፋኑዋካ ናጋራ ያርሾስ ሹከትዳ ዎፋኑዋ መላ ኦዳ ሺሻ። ሄሳዳ ኦድ፥ ካህነይ ናጋራ አቶተ ዎጋ ፖላና፤ አሳ ናጋራይ አቶ ጌተታና። 21 ካህነይ ዎፋኑዋ ጉታፐ ካረ ከስድ፥ ኮይሮ ዎፋኖይ ፁገትዳይሳዳ እያካ ፁጎ፤ ሄስ ማባራስ ያርሸትያ ናጋራ ያርሾ።

22 አሳ ካለያ ሹማታፐ እሶይ ቆፖና ናጋራ ኦኮነ ጎዳ ፆሳ ኪታፐ እሱዋ መንኮ ሄ ኡራይ ባላ። 23 እ ባ ኦዳ ናጋራ አኬክዳፐ ጉየ፥ ቦረይ ባይና እስ ኮለ ኤሆ። 24 ሄ ኮልያ ሁጰን ባ ኩሽያ ዎድ ፁሳ ያርሾይ ያርሸትያ በሳን ጎዳ ስንን ሹኮ፤ ሄስ ናጋራ ያርሾ። 25 ካህነይ ባ ብራያ ሱን የድ ኤክድ፥ ፁሳ ያርሾ በሳን ደእያ ካጨታ ቦላ ትዮ፤ አትዳ ሱ ቃስ ፁሳ ያርሾ በሳ ጋርሳን ጉሶ። 26 እስፈተ ያርሾስ ሺቅዳ ሞዋ ኡባ ፁግዳይሳዳ ሀ ኮልያ ሞዋ ፁጎ። ሄሳዳ ኦድ፥ ካህነይ ሄ ኡራ ናጋራ ቁሽሴስ፤ ሄ ኡራ ናጋራይ አቶ ጌተታና።

27 ማባራፐ እስ አስ ቆፖና ናጋራ ኦኮነ ጎዳ ኪታፐ እሱዋ መንኮ ሄ ኡራይ ባላ ግዴስ። 28 እ ባ ኦዳ ናጋራ አኬክዳፐ ጉየ ቦረይ ባይና ማጫ ዴሽ ባ ናጋራ ግሾ ኤሆ። 29 ባ ኩሽያ ሄ ዴሸ ሁጰን ዎ፤ ያትድ ፁሳ ያርሾ በሳን ናጋራ ያርሾ ኦድ ሹኮ። 30 ሄሳፈ ጉየ፥ ካህነይ ሄ ዴሸ ሱን ባ ብራያ የድ ኤክድ ፁሳ ያርሾ በሳን ደእያ ካጨታ ቦላ ትዮ። አትዳ ሱ ኡባ ያርሾ በሳፈ ጋርሳን ጉሶ። 31 እስፈተ ያርሾስ ሹከትዳ መህያፐ ሞዋ ከስዳይሳ መላ ሄ ዴሸ ሞዋ ቃር ከስድ፥ ያርሾ በሳን ጎዳስ ሳዎ ቶንኩ ግያ ያርሾ ኦድ ፁጎ። ሄሳዳ ኦድ፥ ካህነይ ሄ ኡራ ናጋራ ቁሽሴስ፤ እያ ናጋራይ አቶ ጌተታና።

32 ሄ ኡራይ ባ ናጋራ ግሾ ያርሸይ ዶርሰ ግድኮ፥ ቦረይ ባይና ማጫ ዶርሰ ግዶ። 33 እ ባ ኩሽያ ሄ ዶርሰ ሁጰን ዎ፤ ያትድ፥ ፁሳ ያርሾ መሄ ሹክያ በሳን ሹኮ። 34 ሄሳፈ ጉየ፥ ካህነይ ዶርሰ ሱን ባ ብራያ የድ ኤክድ ፁሳ ያርሾይ ያርሸትያ በሳን ደእያ ካጨታ ቦላ ትዮ። አትዳ ሱ ያርሾ በሳፈ ጋርሳን ጉሶ። 35 እስፈተ ያርሾስ ሹከትዳ መህያፐ ሞዋ ከስዳይሳዳ ሄ ዶርሰ ሞዋ ቆር ከስድ፥ ያርሾ በሳን ጎዳስ ፁሳ ያርሾ ኦድ ፁጎ። ሄሳዳ ኦድ፥ ካህነይ ሄ ኡራ ናጋራ ቁሽሴስ፤ እያ ናጋራይ አቶ ጌተታና።