ፆሳይ ይሁዳ አንጃና
1 ባልጎይ ጋክያ ዎደ ጎዳይ እራ እማና መላ ዎስተ። ጎዳይ እራ ቶክዳ ሻራ ኪቴስ፤ አሳስ እራ እሜስ፤ ጎሻን አታክልተ ዶልስስ። 2 ኤቃት ሀዳባ ኦዶሶና፤ ማሮት ዎርዶ ቆንጨ በኦሶና፤ አሙሄይሳት ዎርዶ አሙሆ ኦዶሶና፤ ሀዳ ምን ምንሶና። ሄሳ ግሾ፥ አሳይ ይዳ ዶርሳዳ ቶይላቶሶና፤ ኤንታ ሄምያ አስ ባይና ግሾ፥ ኤንቲ ቆሄትዶሶና።
3 ጎዳይ ሀይሳዳ ያጌስ፦ "ታ ሀንቆይ ሄንንቾታ ቦላ ኤፅ ከይስ፤ ሄ ካለይሳታ ታኒ ሴራና። ኡባፈ ዎልቃማ ጎዳይ ባ ዉድያ ይሁዳ ሄሜስ። እ ኤንታ ኦላስ ጊግዳ ዎልቃማ ፓራ መላ ኦና። 4 ይሁዳ አሳ ግዶፈ ቁስተ ሹቻ መላ፥ ዱንካነ ሸ መላነ ኦላ ቶራ መላ ሀንዳ ካለይሳት ከያና። 5 ባንታ ሞርከታ ኦግያ ኡርቃዳ የያ ምኖ ኦላንቾታ መላ ግዳና። ጎዳይ ኤንታራ ደእያ ግሾ፥ ኤንቲ ኦለትድ ፆናና።
6 "ታኒ ይሁዳ አሳ ምንና፤ ዮሰፋ አሳ አሻና። ታኒ ኤንታዉ ቃትያ ግሾ፥ ኤንታ ዛራዳ ኤሀና። ኤንቲ ታኒ ካሰካ ኤንታ የጋቦና አሳ መላ ግዳና። ታኒ ጎዳ ኤንታ ፆሳ ግድያ ግሾ፥ ኤንታ ዎሳ ስአና። 7 እስራኤለ አሳይ ምኖ ኦላንቾ መላ ግዳና፤ ዎይነ ኡይዳ አሳዳ ኤንታ ዎዛናይ ኡፋይታና። ኤንታ ናይት ሄሳ በእድ፥ ሀሹ ጋና፤ ኤንታ ዎዛናይ ጎዳን ኡፋይታና።
8 "ታኒ ታ አሳ ሱይቃዳ ፄጋና፤ ኤንታ እስፈ ሺሻና። ታኒ ኤንታ ዎዛና፤ ኤንቲ ካሰይሳዳ ዳራና። 9 ታኒ ኤንታ ካዎተታ ግዶን ላልኮካ ኤንቲ ባንታ ደእያ ሃሆ ቢታን ግድድ ታና ሀሳያና። ቃስ ኤንትነ ኤንታ ናይቲ ደኦን ዳናነ ባንታ ቢታ ስማና።
10 "ታኒ ኤንታ ግብፀ ቢታፈ ዛራና፤
አሶረ ቢታፈ ኤንታ ሺሻና።
ኤንታዉ ኡትያ በሲ ያና ጋካናዉ
ታኒ ኤንታ ጋላዳ ቢታንነ
ልባኖሰ ቢታን ኩንና።
11 ኤንቲ መቶ አባ ግዶራ አያ ዎደ
ታኒ ጎዳይ አባ ሴራና።
ጪሞ ግድዳ ናይለ ሻፋይ መላና።
አሶረ ቢታ ኦቶሮይ ካዉያና፤
ግብፀ ካዎተ ፃምአይ መቃና።
12 ታኒ፥ ኤንታ ጎዳይ ኤንታ ምንና፤
ኤንቲ እያ ሱንን ሄመታና።
ታኒ ጎዳይ ሀይሳ ኦዳይስ" ያጌስ።