ዛካርያሳ ማፃፋ 3

ካህነ ሀላቃ ማኡዋ

1 ሄሳፈ ጉየ፥ ካህነ ሀላቃይ እያሱይ ጎዳ ኪታንቹዋ ስንን ኤቅዳይሳነ ፃላሄይ እያሱ ሞታናዉ እያፐ ኡሻቻ ባጋራ ኤቅዳይሳ ታና ቆንጨን በስስ። 2 ጎዳይ፥ "ፃላህያዉ፥ ጎዳይ ነና ሴሮ፤ የሩሳላመ ዶርዳ ጎዳይ ነና ሴሮ! ሀ አደይ ታማፐ አትዳ ዱንቻ መላ ግደኔ?" ያግስ።

3 እያሱይ ቅታትዳ ማኦ ማእድ ኪታንቹዋ ስንን ኤቅስ። 4 ኪታንቾይ ባ ስንን ኤቅዳይሳታ፥ "እያ ቦላፈ ሀ ቅታ ማኡዋ ቃርተ" ያግስ። ቃስ እያሱኮ፥ "ሄኮ፥ ታኒ ነ ናጋራ ኔፐ ድጋስ፤ ቦንቾ ማኡዋ ነና ማይዛና።" 5 ታኒ፥ "ጌሻ ፃ ቃጭያ እያ ሁጰን ፃፅተ" ያግስ። ኤንቲ ኪትዳይሳዳ ኦዶሶና፤ ማኦ ማይዝዶሶና። ጎዳ ኪታንቾይ ሄ ዎደ እያ ምየን ኤቅስ።

6 ሄሳፈ ጉየ፥ ጎዳ ኪታንቾይ እያሱኮ፥ 7 ኡባፈ ዎልቃማ ጎዳይ ሀይሳዳ ያጌስ፤ "ኔኒ ታ ኦግያን ሄመትኮነ ታ ኪታ ናግኮ፥ ኔኒ ታ ኬ አይሳና፤ ታ ዳባባን አዋታና። ቃስ ሀይሳን ኤቅዳይሳታራ እስፈ ገልያነ ከይያ ማታ ነዉ እማና። 8 ካህነ ሀላቃ እያሱ፥ ሀይሳ ስአ! ስንራ ያና ሎኦባስ ማላታ ግድዳይሳትነ ኔራ ኦይሳት ሀይሳ ስኦ! ታኒ፥ ‘ታሸ’ ጌተትያ ታ አይልያ ኤሀና። 9 ሄኮ፥ ታኒ እያሱ ስንን ሹቹ ዎና፤ ሄ ሹቻ ቦላ ላፑን አይፈት ደኦሶና። ታኒ ሄ ሹቻ ዎጫዳ እያ ቦላ ፁፈ ፃፋና፤ ሀ ቢታ ናጋራ እስ ጋላስ ድጋና" ያጌስ ኡባፈ ዎልቃማ ጎዳይ።

10 "ሄ ጋላስ ህንተ ኡባይ ህንተ ዎይነነ ህንተ ባላሰ ጋርሳን ኡትድ ህንተ ሾሩዋ ፄጋና" ያጌስ ኡባፈ ዎልቃማ ጎዳይ።