ፃ ማፃፋ ቆንጨ
1 ቃስ ታኒ ቁ ጋዳ ፄልያ ዎደ ቦላራ ፕራያ እስ ፃ ማፃፋ በአስ።
2 ኪታንቾይ ታና፥ "ኔኒ አይ በአይ?" ያግድ ኦይችስ።
ታኒ ዛራዳ፥ "ታኒ ቦላራ ፕራያ እስ ፃ ማፃፋ በአይስ፤ ሄ ማፃፋ አዱሳተይ ላታሙ ዋ ቃስ ጎምፓይ ታሙ ዋ" ያጋስ።
3 እ ታኮ፥ "ሀ ፃ ማፃፋ ግዶን ቢታ ኡባ ቦላ ያና ባደይ ፃፈትስ። ሄ ማፃፋን እስ ባጋራ፥ ‘ካይሶ ኡባይ ቢታፈ ያና’፤ ቃስ ሀንኮ ባጋራ፥ ‘ዎርዶን ጫቅያ ኡባይ ያና’ ግያ ፁፈይ ፃፈትስ። 4 ‘ታኒ ሀ ባደ ኪታና፤ ሄ ባደይ ብድ፥ ካይሱዋ ሶነ ታ ሱንን ዎርዶ ጫቀይሳ ሶ ገላና። ሄ ኬ ገልድ ምነ ሹቻ ይሳና’ " ያገስ ኡባፈ ዎልቃማ ጎዳይ።
ዳቾን ኡትዳ ማጫሰ ቆንጨ
5 ሄሳፈ ጉየ፥ ታራ ሃሳያ ኪታንቾይ ታኮ ይድ፥ "አነ ቁ ጋዳ፥ ያባይ አይበኮ በአ" ያግስ።
6 ታኒ፥ "እ አይቤ?" ያጋዳ ኦይቻስ።
እ ዛሪድ፥ "ሀይስ ማክያ ዳቾ" ያግስ። ቃስ ጉጅድ፥ "ሀይስ አሳይ ሀ ቢታ ኡባን ኦዳ ናቁዋ ማላታ" ያግስ።
7 እርሳሰ ጌተትያ ብራታፐ ኦሰትዳ ዳቹዋ ካማ ደንያ ዎደ እስ ማጫስ ዳቹዋን ኡታሱ። 8 ኪታንቾይ፥ "ሀና ኢታተ ሌምሶ" ያግስ። እዮ ጉየ ዳቹዋን የግድ እርሳሰ ካማ ዛሪድ ካምስ።
9 ሄሳፈ ጉየ፥ ታኒ ቁ ጋዳ ፄልያ ዎደ ኤንታ ቀፍያን ጫርኮይ ደእያ፥ ፕራያ ናምኡ ማጫሳታ በአስ። ኤንታ ቀፈይ ጎሎ ቀፈ መላ ምኖ፤ ኤንቲ ዳቹዋ ሳአፐ ድንድ ኤክድ ፕራዶሶና።
10 ታኒ ኪታንቹዋኮ፥ "ሀይሳቲ ዳቹዋ አዉ ኤፎና?" ያጋዳ ኦይቻስ።
11 እ ዛሪድ፥ "ኤንቲ እያዉ ኬ ኬፃናዉ ሳናኦራ ቢታ ኤፎሶና። ኬይ ኬፀት ስምኮ ኤንቲ ሄ ዳቹዋ እያዉ ጊግዳ በሳን ዎና" ያግስ።